වැල

කොස් ඉදුනාම හයියට හැපෙන එක වරකාය. අනිත් එක එනම් ලිස්සලා යන එක 'වැල' ය. කඳ කෙළිං තියෙන ශාක වර්ග ගස් ය. කඳ කෙළිං නැතිව කොහේ හරි එතිලා වෙලිලා හැදෙන ශාක විශේෂ 'වැල්' ය. මේවාට අමතරව තවත් වැල වර්ගයක් තිබේ. ඒවා නම් ලිංගික දර්ශන ඇතුලත් කාම ප්‍රකාශනයන් ය. ඒ වැල ලංකාවේ තහනම්ය. කරන්න තහනම් නැති උනාට බලන්න තහනම් ය.

මුළින් බැලුවේ වැල පත්තරය. හැමෝටම හොරෙන් පන්තියට ගේන වැල පත්තරය සහජීවනයෙන් පිටු වෙන වෙනම බෙදාගෙන රස වින්දෙමු. මාට්ටු උනොත් සොරි ය.වැල පත්තරය ශිෂ්‍ය නායකයින්ගේ හස්ත කර්මාන්ත සඳහා රාජ සන්තක කර ගනිති. පත්තරවල රූපවලට වඩා ඇත්තේ කතාවය. ඒක කියවන එක වෙනම ලල් එකක්ය. තැනින් තැන ඇති ඡායාරූපද කළුසුදු ඒවාය. පින්තූර තත්ත්වයෙන් බාලය. නමුත් ඒ කාලයේ ඒවාට වඩා දේවල් තිබුණේ ඉතා කළාතුරකින්ය. එහෙම කළාතුරකින් පිටරටවලින් ගෙන්වූ වර්ණ කාම සඟරා ළඟ තිබූ වරප්‍රසාදිත පන්තියේ උන් ද සිටියෝය. උන් අනික් උන් අතර ගෞරව බුහුමානයට පාත්‍ර වූහ. එකම පත්තරය නවලා දිග ඇරලා නැමුම් පාරවල් දිගේ ඉරිලා ගියත් විසි කරන්නේ නැත. එකල සිටියෝ සම්පත් නාස්තියට එරෙහි වූවෝ වූහ.

ඉන්පසු ආවේ වීඩියෝ කැසට් යුගය හෙවත් VHS යුගයයි. ඒවා පත්තර මෙන් සඟවා තබා ගැනීමට අපහසු තරමේ ප්‍රමාණයෙන් විශාල වීය.එමෙන්ම යටිතල පහසුකම්ද ඇවැසි විය. වීඩියෝ කැසට් යන්ත්‍රයක් හෙවත් 'ඩෙක් එකක්' තිබුණේ එහෙමත් කෙනෙක් ළඟය.එනිසා ගෙදර වැඩිහිටියන් නැති වෙලාවක් බලා කොල්ලෝ කල්ලි ගැසී වැල බැලූහ. එය වෙනම සංස්කෘතියක් වීය. සජීවී විචාර, ඇගැයීම් මෙන්ම නැවත විකාශය කිරීම් සමඟ විශයානුබද්ධ දැනුම බෙදාගැනීමේ මහඟු අවස්තාවක් ඔවුන්ට හිමි වූ අතර කැසට් පටවල බැඳුනු දිලීර හෙවත් පුස් ඉවත් කිරීම වෙනමම කලාවක් ලෙස වර්ධනය විය.

ඉනුත් පසු පැමිණියේ VCD සමයයි. වීඩ්යෝ කැසට් මෙන් නොව ප්‍රමාණයෙන් කුඩා වීමත් පොතක් අතර පහසුවෙන් සඟවා ගෙන යා හැකි වීමත් නිසා මේවා යොවුන් පරපුර අතර සීඝ්‍රයෙන් ජනප්‍රිය වී ගියේය. CD මුද්‍රණය කළහැකි එනම් රයිටරයක් සහිත පරිගණකයක හිමිකරුවෙකු එකල සැලකුණේ ජීවමාන දෙවියෙකු වැඩ සිටින දේවාලයක කපු මහතෙකු මෙන්ය. පරිගණක අහිමි මුත් CD යන්ත්‍ර හිමි උන්, එවන් කොල්ලන්ට දොල පිදේනි දෙමින්, පොල් ගසමින්, උන් වටා කැරකුණේ තමන්ට ඇවැසි වැල CD මුද්‍රණය කරවා ගැනීමටය. මෙම CD කාටත් හොරෙන් සඟවා තැබීමත් නැවත නැවත භාවිත කිරීමත් නිසා ඇතිවන් සීරීම් සමඟ රූපවල කොටු වැටීම සහ වීඩියෝව හිරවී නැවතීම වැනි අභාග්‍යසම්පන්න ඉරණම්වලටද මුහුන දීමට සිදු විය. ජීවිතේට දත් මදින්නේ නැති උන් දත් බෙහෙත් භාවිතා කොට CD පිරිසිඳු කිරීම ආරම්භ කිරීමත් සමඟ දත් බෙහෙත් වෙළඳාමද ඉහළ ගියේය.

ඉන්පසු DVD ද පැමිණි අතර ගුණාත්මයෙන් වැඩි වැල වැඩි ප්‍රමාණයක් එක තැටියක අන්තර්ගත කළ හැකි වීම නිසා කොල්ලන්ගේ නින්ද අඩු විය. එළි පහළියට බැසීම මෙන්ම කෑම බීම පවා අඩු විය. ඉස්සර සාලයේ තිබූ පරිගණක කාමර තුළට රිංගවා ගැනිනි.සමාජ ආශ්‍රය අඩු වීම නිසා සමාජයෙන් කොන් වූ කොල්ලන්ගේ පෝෂණයද අඩු වීම නිසා කෘශ වී ගියෝය. නමුත් සතතාභ්‍යාසයේ යෙදුණු සුරත නම් වැඩී වර්ධනය වීය.

අන්තර්ජාල ප්‍රවිශ්ඨය පහසු හා වේගවත් වීම සමඟ පැරණි වැල සංස්කෘතීන් සියල්ල අභාවයට ගොස් ඇති අතර යෞවනයන් තව දුරටත් එකිනෙකාගෙන් ඈත් වෙමින් පවතී.

මිනිසුන් එකිනෙකා ප්‍රේම කළ යුතුය. නිසි වයසේදී විවාහ විය යුතුය. ලිංගිකව එක් වී දරුවන් බිහි කළ යුතුය. මිනිස් ඝාතන නොකළ යුතුය. පහර දීම්, මංකොල්ල කෑම් නොකළ යුතුවාක් මෙන්ම බොරු කීම, මත්ද්‍රව්‍ය භාවිතය හා අනියම් සම්බන්ධතා නොපැවැත්විය යුතුය.

නමුත් නීතියට අනුව වැල බැලීම තහනම්ය. එනම් සැවොම කළ යුතුයැයි සමාජ සම්මත ලිංගික ක්‍රියා නැරඹීම අසම්මතය. නමුත් මිනී මැරීම්,පහර දීම් ආදිය ඇතුලත් චිත්‍රපට පවුලේ සැවොම එකට ඉඳ නරඹති. අත්පොලසන් දෙති. බොරු කීම්, වංචා කිරීම් මෙන්ම අනියම් සබඳතා ටෙලි නාට්‍යයවල සුලභය. කවුරුත් ඒවා තහනම් කිරීමට පෙළඹෙන්නේ නැත.

වැල බැලීමෙන් ඒවායේ තිබෙන දේ කරන්නට පෙළඹෙන බවට සමාජ මතයක් ඇත. වැලවල ගොඩක් ඇත්තේ බොරුවය. ස්පයිඩර් මෑන් චිත්‍රපට බලා කවුරුත් බිත්ති දිගේ නගින්නේ නැත. සුපර් මෑන් චිත්‍රපට නරඹා වාහන උස්සා විසි කරන්නට යන්නේ නැත. වැලවල ඇති අසාමාන්‍ය දෑ අත් හදා බලන්නට යන්නේ මානසික රෝගීන්ය.එහෙම උන් මහා ගොඩක් නැත.

නමුත් සමහර අවස්ථාවලදී අනෙක් පාර්ශ්වය නොදැනුවත් වීම නිසා අකරතැබ්බ සිදු වෙනවාය. කොල්ලෝ වැල බැලුවාට කෙල්ලන්ට බලන්න දෙන්නේ නැත. අඩුම තරමේ උන් තමන් වැල බලන බව කෙල්ලන් ඉදිරියේ පිළි ගන්නේද නැත. ඉතින් බැන්දාට පසු වැල බැලූ කොල්ලාට සාමාන්‍යකරණය වී ඇති ගුද රමණය අත් හදා බලන්නට ගිය විට වැල නොබැලූ කෙල්ලට එය ජුගුප්සාජනක අද්භූත අද්දැකීමක් වනවා නියතය. දික්කසාදයකින් පවා කෙළවර විය හැක.

වැල බලා මානසික පීඩනය මෙන්ම ශුක්‍ර තරළයද මුදා හැරීමෙන් ලැබෙන මානසික සහනය පුද්ගලයෙකුගේ අනෙකුත් කටයුතු සඳහා මහත් පිටිවහලක් වේ. ලිංගික පීඩනය අඩු වීම නිසා බස්වල ජැක් ගැසීම් ආදී සුළු සුළු අතවරයන් යම් තරමකින්හෝ පහළ යා හැක. පුළුල් පරාසයක ලිංගික අත්දැකීම් ලැබෙන බැවින් තමන්ගේ ලිංගික ජීවිතය නැවුම්ව හා ක්‍රියාශීලීව පවත්වා ගැනීමටද වැල දායක කර ගත හැක. ඔසප් දින මෙන්ම ගර්භනී අවධියේ ශාරීරික අපහසුතා නිසා ලිංගිකව එක්වීමට අපහසු දිනවලදී යම් සහනයක් ලබා ගැනීමට වැලවල පිහිට පැතිය හැක.

ලිංගිකත්වය මහා කුණුහරුපයක් සේ සිතීම නවතා ( කුණු හරුප සියල්ලම එක්කෝ ලිංගික අවයව හෝ ක්‍රියාව කේන්ද්‍ර කොටගෙන නිර්මාණය වී ඇත.) එහි සුන්දරත්වය අත් විදිමු. වැලවලට සමාජයේ නිසි තැන දෙමු. ඕනෑම හොඳ දෙයක් මෙන් නරකටද භාවිතා කළ හැකි නිසා මනාව දැනුවත් වී සිහි බුද්ධියෙන් භාවිතා කරමු. සැනසෙමු.

ස්තූතියි!!!

සත්තුංගේ සංසර්ග රටා

ඔන්න ඉස් ඉස්සෙල්ලම ලෝකේ බැක්ටීරියා කියන ඒක සෛලික ජීවීන් ඇති උනාලු නේ.ඒ අය ප්‍රජනනය කළේ ඒ කියන්නේ වර්ගයා බෝ කළේ ද්වීඛණ්ඩනය කියන ක්‍රමයෙන්.ඒ කියන්නේ එකෙක් දෙකට කැඩිලා දෙන්නෙක් වෙනවා.හැබැයි මේ ක්‍රමේදි දෙකට කැඩෙන එකාගෙ ලක්ෂණ ඔක්කොම අඩුපාඩුවක් නැතුව අළුතෙන් හැදෙන දෙන්නට ලැබෙනවා.

මේකේදි පොඩි පොඩි වෙනස්කම් සෛල අතරේ ඇති උනත් ලොකු වෙනසක් වෙන්නෙ නැති එක පාඩුවක්.ඒ කියන්නේ දෙකට බෙදෙන මුල් මව් සෛලයේ මොකක් හරි ජානමය දුර්වල කමක් තිබ්බොත් ඒ දුර්වල කම දරු සෛල දෙකටම ලැබෙනවා.ඒ දරු සෛල බෙදිලා හැදෙන හැම සෛලයකටම මේ දුර්වල ජානය යනවා.ඒ කියන්නේ මොකක් හරි ලෙඩක් හරි පරිසර තත්ත්වයකට හරි ඒ දුර්වල ජානය නිසා මුහුණ දෙන්ඩ බැරි උනොත් අර සෛල පරම්පරාවම එක පාර විනාශ වෙලා යෑමේ අවධානමක් තියෙනවා.ඒක නිසා තමයි පරිණාමයේ ඊළඟ පියවර විදිහට ලිංගික ප්‍රජනනය ඇති වෙන්නේ.

ඔය අපි කවුරුත් දැකලා තියෙන මුහුද යට තියෙන කොරල් හදන ජීවීන් ප්‍රජනනය කරන්නෙ මෙහෙමයි. ඒ අය ඩිම්බ වගේම ශුක්‍රාණුත් නිකම්ම මුහුදු වතුරට නිදහස් කරනවා.එතකොට වතුරෙදි මේවා දෙකක් එකතු වෙලා අළුත් ජීවියෙක් හැදෙන්ඩ අවස්ථාවක් තියෙනවා. මෙයාලට මෙහෙම කරන්ඩ වෙලා තියෙන්නේ ඒ අයට නිදහසේ එහේ මෙහේ යන්ඩ බැරි නිසා.

ඊට පස්සේ අපි බලමු මාළු ප්‍රජනනය කරන හැටි.

මාළුංගේ ගෑනු සතායි පිරිමි සතායි දෙන්නා පොඩි ආලිංගන නැටුමකට පස්සේ ගෑනු සතා බිත්තර ටික වතුරට දානවා.එතකොට පිරිමි සතා එයාගේ ශුක්‍රාණු ටික අර බිත්තර උඩට දානවා.ඒ ක්‍රියාවෙදි මේ බිත්තර ශුක්‍රාණුවකිං සංසේචනය වෙන්ඩ තියෙන අවස්ථාව ටිකක් වැඩියි.හැබැයි මේ ක්‍රියාවෙදිත් සිද්ද වෙන්නේ බාහිර සංසේචනයක්.ඒ කියන්නේ සංසේචනය සිද්ද වෙන්නේ ගෑනු සතාගේ ශරීරයෙන් බැහැරදි.


අපි හැමෝම ආසා කරන, අපේ ජීවිත වෙනස් කරපු විප්ලවය හෙවත් 'සංසර්ගය' මුලින්ම කරන්න පටං ගන්නේ එසේ මෙසේ සතෙක් නෙමෙයි.ඒ තමයි මෝරා. "සිරියාමේ සාරා නැගේවි හද මෝරා" කියලා උපහාර ගීත එහෙමත් ලියැවෙන්නේ ඒ හින්දා වෙන්ඩ ඇති.
හැබැයි මෝරාගේ ශිෂ්ණය ප්‍රාථමික නිසා සහ ඔවුන්ගේ ශරීරවල පිහිටීම නිසා මෝරාට මෝරිව මේ වැඩේ කරන වෙලාවේ අල්ලගෙන තියා ගන්ඩ බැහැ.අනික වතුරේ පා වෙවී මේක කොරද්දි මෝරි පාවෙලා අහකට යනවා නෙව.ඒ හින්දා මෝරා මේ වැඩේ කරන්නේ මෝරිගේ උරහිස් වරල කටිං හපලා අල්ලගෙන.ඉතිං පරිණාමයේදී ඔය පරණ ජාන අපිටත් හම්බ වෙලා තියෙන හින්දා තමයි ඔය ආදර හැපීම් හෙවත් love bite අපි අතරේ තියෙනවා ඇත්තෙ.හැබැයි මෝරුංගේ තුවාල සුව වීමේ හැකියාව බොහොම විශිෂ්ඨයි.අපේ එච්චර විශිෂ්ඨ සුව වීමේ හැකියාවක් නැති හින්දා හපද්දි හෙමිං හපන එක ඇඟට ගුණයි.

කිඹුලා කියන්නේ ලෝකේ ගොඩාක් ඉස්සර ඉඳං හිටපු සතෙක්.මෝරාට වඩා දියුණු උනත් කිඹුලට තියෙන්නෙත් අපරිණත ශිෂ්ණයක්.උගේ ශිෂ්ණය තියෙන්නේ උගේ ඇඟ ඇතුලේ හැංගිලා.සංසර්ගය වෙලාවෙදි මේක ශරීරයෙන් එලියට එනවා කියලා තමා කියන්නේ.ඒ කියන්නේ කිඹුලට හෙළුව වහ ගන්ඩ ඇඳුම් ඕනෙම නෑ.

"අලි කෙළියයි මහරජ" කියාගෙන ඇමතිතුමා රාජ සභාවට දුවගෙන ආවලු. "ඔහෙ කෙළපු දෙං මගෙ අලිනේ" කියලා රජතුමා කිව්වලු.ඇත්තට අලි කෙළියත් හෙණ කෙළියක් තමයි.උන්ට අපිට වගේ ඉරියව් මහා ගොඩක් තියෙනවා කියලයෑ.එකම විදිහටනේ හැමෝම, හැමදාම.වැඩේ කියන්නේ අලියා අලි බිරිඳගේ කොන්දට උගේ ඉස්සරහා කකුල් දෙක තියලා හිටගෙන මේ වැඩේ කළා වගේ නෙමෙයි ලු. කාලයක් තිස්සේ මේ විදිහට වෙද්දි අලි බිරිඳගේ කොන්ද, උකුළ වගේ අස්ථිවල පිපිරීම් ඇති වෙනවලු.සුලුපටු බරක් කියලද?

ප්‍රජනන කාර්යයෙං සත්තු වගේම මිනිස්සුත් බලාපොරොත්තු වෙන්නේ තමුංගේ ජානවල පැවැත්ම.ඒ කියන්නේ තමුංගේ ජාන ටික ඊළඟ පරම්පරාවට දායක කරන එක.සත්තු කසාද බඳින්නැති හින්දා උං ගෑනු සතා ලවා තමුංගේ ජාන සහිත පැටවු ඇති කරන්ඩ විවිධ විදිහට හැඩ ගැහිලා ඉන්නවා.උදාහරණයක් විදිහට පිරිමි සත්තු රණ්ඩු වෙලා අනිත් පිරිමිංව එළවලා දාලා ගෑනු සතා එක්ක රමණයේ යෙදෙනවා.එතකොට ගෑනු සතාගෙං බිහිවෙන්නේ අර තරඟයෙන් දිනන පිරිමි සතාගේ පැටවු විතරයි.

බත් කූරො වර්ගයක් වෙන ඩැම්සෙල් මැස්සාට තියෙනවා අපූරු ශිෂ්ණයක්.ඒක හරියට බුරුසුවක් වගේ.ඌ සංසර්ගය කරන කොට ගෑනු සතාගේ යෝනි මාර්ගය පිහදැමිලා ඇතුලේ තියෙන දේවල් එළියට එනවා.ඉතිං බැරි වෙලාවත් මූට කළිං වෙනින් පිරිමි සතෙක් රමණයේ යෙදිලා තිබ්බොත් ඒ සතාගේ ශුක්‍රාණු ටික ඔක්කොම වගේ ගෑනු සතාගේ යෝනි මාර්ගයෙන් පිහ දැමිලා ඉවත් වෙනවා.ඒ කියන්නේ පස්සේ සංසර්ගයේ යෙදෙන එකා උගේ ශුක්‍රාණු විතරක් ගෑනු සතාගේ ඩිම්බ වෙත යන එක ගැන වග බලා ගන්නවා.

එහෙම තමං සංසර්ගයේ යෙදුනාම තමුංගේ ජාන විතරක් තියෙන පැටව් බිහි වෙයි කියන එක සහතික කරන්ඩ තව ක්‍රමයක් සමහර සත්තු ළඟ තියෙනවා.ඒ තමයි ශුක්‍ර තරලය යෝනි මාර්ගයට ඇතුල් උනාම ඒක හයි වෙලා ඇබයක් විදිහට ක්‍රියා කරනවා.එතකොට වෙනත් පිරිමි සතෙක් සංසර්ගයේ යෙදුනත් ඒ සතාගෙ ශුක්‍රාණුවලට ගෑනු සතාගේ ඩිම්බ වෙත ළඟා වෙන්ඩ තියෙන ඉඩ අඩු වෙලා යනවා.මිනිස්සුංගෙත් ශුක්‍ර තරලය ඒ විදිහට ඝණ බවට පත් වෙලා සුළු වෙලාවක් තියෙනවා.හැබැයි ඒකෙං මේ අවශ්‍යතාව ඉටු වෙනවද කියල නං දන්නේ නෑ.

ශුක්‍ර තරලයෙං ඇබයක් හැදෙන එකට වඩා සාර්ථක, වඩා නිර්භීත ක්‍රමයක් සිද්ද වෙනවලු මී මැස්සොංගේ. උංගේ පිරිමි සතා ලිංගිකව එක් වෙන්නේ රැජිනත් එක්ක විතරනේ.ඉතිං පිරිමි සත්තු අතරේ තියෙන ලොකු තරඟෙකිං පස්සේ එක පිරිමියෙක්ට රැජිනත් එක්ක සංසර්ගයේ යෙදෙන්ඩ අවස්ථාව හම්බවෙනවා.හැබැයි ශුක්‍ර මෝචනයෙන් පස්සේ පිරිමි සතාගේ ශිෂ්ණය කැඩිලා රැජිනගේ යෝනිය ඇතුලේ හිර වෙනවා.පිරිමි සතා එහෙමම මැරිලා යනවා.ඒකෙං රැජිනට වෙනත් පිරිමි සතෙක් එක්ක සංසර්ගයේ යෙදෙන්ඩ තියෙන අවස්ථාව නැති වෙලා යනවා.

මී මැස්සංගේ පිරිමි සත්තු රමණ සංග්‍රාමයට එකතු වෙන්නේ ගෙවල් ඉඩං එහෙම ලියලා දීලා, නෑයින්ට යාළුවන්ට සමු දීලා එහෙම වෙන්ඩ ඇති.හැබැයි රැජින කොහොම හරි අමාරුවෙං මේ ශිෂ්ණ ඇබය ගලෝ ගෙන වෙනින් උං එක්කත් සංසර්ගයේ යෙදෙනවා කියලා තමයි කියන්නේ.මී මැස්සොංගේ උනත් ගෑනු සතා චපලයි නේද?

කෝටු වන්දා ද කොහෙද කියන මේ කෝටු කෑල්ලක් වගේ පේන සතා මී මැස්සා තරං මෝඩ නෑ.ඌ සංසර්ගයෙන් පස්සේ කෝටු වන්දිගේ ඇඟේ එල්ලිලාම ඉන්නවා ටික වෙලාවක් යනකං.ඒකෙං වෙන එකෙක්ට ආයේ සංසර්ගය කරන්ඩ තියෙන අවස්ථාව නැති වෙලා යනවා..බල්ලන්ගේ සිද්දියත් මේ හේතුව හින්දම වෙන්ඩ ඇති කියලයි මට හිතෙන්නේ.

ආදර මකුණා කියලා හඳුන්වන මේ කෘමි සතා සංසර්ගයෙන් පස්සේ සදහටම ගෑනු සතාගේ යෝනි මාර්ගයේ ශිෂ්ණය හිර කර ගන්නවා.ඊට පස්සේ ඌ ගෑනු සතාත් එක්කම ගෑනු සතා යන එන දිහාවලට ඇදිලා යමින් ඉඳලා ටික කාලෙකින් මැරිලා යනවා.මැරිච්ච සැමියගේ මිනියත් එල්ලගෙන ගෑනු සතාට ජීවත් වෙන්න වෙනවා.පිරිමි සතාගේ ශරීරය නරක් වෙලා වැටෙන කල්ම.කොහොම හරි බිත්තර දාන කාලෙට කලිං පිරිමි සතාගේ සිරුර ගැලවිලා යනවා.

ජර්මන් කැරපොත්තා කියන්නේ වඳ කරන්ඩ අමාරු කරදරකාරයෙක් කියලයි කියන්නේ.ඒකට හේතුවක් විදිහට ඒ අය කියනවා මේ කැරපොත්තාගේ ගෑනු සතා හෙවත් කැරපොත්තීට එක පාරක් පිරිමි සතෙක් එක්ක සංසර්ගයේ යෙදුනොත් ඒ ශුක්‍රාණු ටික ඇඟ ඇතුලේ තියාගෙන ජීවිත කාලෙම සැරින් සැරේට බිත්තර දැමීමේ හැකියාවක් තියෙන හින්දලු.ඒ කියනෙන සංසර්ගයෙ යෙදිච්ච කැරපොත්තියෙක් ගෙදරකට ආවොත් ආයේ ඉතිං දිගටම ඌට බිත්තර දදා පරම්පරාව බෝ කරන්ඩ පුළුවං කියන එක.

ප්‍රජනනය ගැන කතා කරද්දි මේ ලිංගික තේරීම කියන එක ගැනත් කතා කරන්ඩ ඕනේ.සාමාන්‍යයෙන් ලෝකේ සත්තු ගත්තම පිරිමි සතා තමයි ලස්සන, උත්තුංග, තේජවන්ත, ශක්තිමත්.පිරිමි සතා තමුංගේ ශාරීරික අංගෝපාංග පෙන්නපුවහම තමයි ගෑනු සතා සංසර්ගයට කැමති වෙන්නේ.
උදාහරණයක් විදිහට මොණරුංගේ නං උගේ පිල.ලොකුම ලස්සනම පිල තියෙන එකාට තමයි මොනරී කැමැත්ත දෙන්නේ.ඇත්තුංගේ නං ලොකුම දල තියෙන සද්දන්ත ශරීරයක් තියෙන ඇතාට තමයි ඇතින්න කැමති වෙන්නේ.ජිරාෆ්ලගේ දිගම බෙල්ල තියෙන ශක්තිමත්ම සතාට තමයි ජිරාෆි කැමති වෙන්නේ.එහෙම උනාම මොකද දන්නවද වෙන්නේ.ඒ පිරිමි සතාගේ ශාරීරික ලක්ෂණ තීරණය වෙන්නේ උගේ ජානවලින් නිසාත් එහෙම විශේෂ ලක්ෂණ තියෙන එකාට වැඩිපුර සංසර්ග අවස්ථා හිමිවෙන නිසාත් උගේ ඒ ලක්ෂණ පරම්පරා ගත වෙනවා.ඒ කියන්නේ ඊගාව පරම්පරාවට අර කියපු විශේෂ ලක්ෂණය ලැබෙනවා.

අයිරිෂ් එල්ක් කියන ගෝන්නුංට ලස්සන ලොකු අං තට්ටුවක් තිබ්බලු.ඒත් මේ ලිංගික තේරීම නිසා රමණ අවස්ථා වැඩිපුර ලැබිලා තියෙන්නේ උං අතරින් ලොකුම අං තට්ටුව තියෙන එවුන්ට.ඒකෙං වෙලා තියෙන්නේ කාලයත් එක්කම පරම්පරාවෙන් පරම්පරාවට මේ අං තට්ටුව එන්ඩ එන්ඩ විශාල වෙලා මේ ගෝනාගේ ශරීරයට දරාගන්ඩ බැරි තරමට අං තට්ටුව ලොකු වීම නිසා උං වඳ වෙලා ගියා කියලා තමයි කියන්නේ.

ශරීර ප්‍රමාණයට සාපේක්ශව ලොකුම පුරුෂ ලිංගය තියෙන්නේ මිනිස්සුන්ට.අපේ ආදී මුතුන් මිත්තියෝ සංසර්ගයේදී පිරිමියාගේ බලලා තියෙන්නේ මොනවා වෙන්ඩ ඇද්ද?

ජිබ්‍රෝල්ටාවල ඉන්න මැකාකු වඳුරෝ ගැන පර්යේෂණ කරපු අය කියනවා මේ වැඳිරියෝ සංසර්ගයේදී කෑ ගහනවා කියලා.ඒ ගොල්ලො ඒ ගැන හොයලා බලද්දි දැනගෙන තියෙනවා එහෙම සංසර්ගයේදී කෑ ගහපු ගෑනු සත්තු ගැබ් ගැනීමේ හැකියාව වැඩියි කියලා.ඒ එහෙම ගෑනු සතා කෑ ගැහුවාම පිරිමි සතාගේ ශුක්‍ර මෝචනය ඉක්මං වෙනවලු.ඉතිං ගැබ් ගන්ඩ නං ශුක්‍ර මෝචනයක් තියෙන්ඩ එපායැ.

ගණිකා වෘත්තියේදී වැඩි ගැණුම්කරුවන් ප්‍රමාණයක් දවසකදී සතුටු කළොත් වැඩි ආදායමක් ලබා ගන්ඩ ගණිකාවන්ට පුළුවං.ඒ සඳහා එක් එක් ගැනුම්කරුවා ඉක්මනින් සුරාන්තයට පත් කරන්ඩ උවමනා වෙනවා. ඉතින් ගණිකාවෝ මේ උපක්‍රමය හෙවත් කෑ ගැසීම, සිය ගැණුම්කරුගේ උත්තේජනය වැඩි කරන්ඩ පාවිච්චි කරනවා කියලා තමයි කියන්නේ.එතකොට ඒ ගැණුම්කාරයාට ඉක්මනින් ශුක්‍ර මෝචනය වෙන හින්දා ගණුදෙනුව ඉක්මනට ඉවර වෙනවා. දැක්ක නේද මැකාකු වඳුරංගේ සොයා ගැනීම මිනිස්සු පාවිච්චි කරන හැටි.

මේ මැකාකු වඳුරෝ ගොඩක්ම ප්‍රසිද්ධ වෙලා තියෙන්නේ උංගේ සංසර්ග ප්‍රමාණය හින්දා.සාමාන්‍යයෙං මුං පැයකට එක් වතාවක්වත් රමණයේ යෙදෙනවලු.හැබැයි ඒ සංසර්ගයේ පරමාර්ථය දරුවන් බිහිකිරීම නෙමෙයි. මිත්‍රත්වය ප්‍රකාශ කිරීම, තමුංගේ බලය පෙන්වීම වගේ මානසික කාරණා පෙරටු කරගෙන සංසර්ගයේ යෙදෙනවා කියලා තමයි කියන්නේ.ඒ කියන්නේ වලියක් ෂේප් කර ගන්ඩ ඕනේ උනාම ගෑනු වඳුරා පිරිමි එකාට සංසර්ග අවස්ථාවක් දෙනවලු. එතකොට පිරිමි එකා වලිය අමතක වෙලා සංසර්ගයේ යෙදෙනවලු.

මේ කිව්ව එක එක සත්තුංගේ ප්‍රජනන රටා අපිට කොච්චර අදාලයිද කියලා හිතලා බලන්ඩ ඈ.....

ඇයි මම එහෙම ලිව්වේ...?

මම ලියපු ප්‍රජනන සෞඛ්‍ය ලිපි පෙළ කියවපු මගේ මිත්‍රයෙක් මට කියුවා "උඹ ලියලා තියෙන විදිහට කියවන එකාට හිතෙන්නේ සෙක්ස් තියෙන්නේ එන්ජෝයි කරන්ඩ මිසක් ළමයි හදන්ඩ නෙමෙයි කියලා." ඉතිං මම ඌට දීපු උත්තරේට තව ටිකක් අතිනුත් දාලා ඇත්තටම මම ඒ ලිපි පෙළ ලියන්ඩ හේතු වුනු සංසිද්දීන් සහ මගේ දැක්ම ටිකක් පැහැදිලි කරන්ඩයි හදන්නේ.සරත් අයියත් දවසක් කොමෙන්ට් එකක දාලා තිබ්බා කට්ටිය ලිංගිකත්වයට පෙළඹෙයිදෝ වගේ අදහසක් එන කොමෙන්ට් එකක්.ඒ කොමෙන්ට් එකට උත්තර දෙද්දිත් මම පොරොන්දු උනා ඒ ගැන මගේ අදහස වෙනම ලිපියක ලියනවා කියලා.

ප්‍රජනනය සහ ලිංගිකත්වය කියන්නේ දෙකක්ය කියලා මම මේ ලිපි පෙළ පටන් ගන්න කොටම කිව්වා.ප්‍රජනනය කියන්නේ ඊළඟ පරම්පරාව බිහි කරන ක්‍රියාවලියට.නමුත් ප්‍රජනනය කියන්නේ ලිංගිකත්වයේ එක් පැතිකඩක් විතරයි.මිනිස්සු අනිත් සත්තු වගේ නෙමෙයි.අවුරුද්ද පුරාම ලිංගිකව එක්වෙනවා.ඒ වගේම මිනිසාගේ උසස් බුද්ධිය නිසා අපේ සංවේදී ඉන්ද්‍රියයන්ගෙන් ලැබෙන සංවේදනයන් තෘප්තිමත් කරගැනීමේ හැකියාව ලැබිලා තියෙනවා.අපි කෑම කන්නේ අනිත් සත්තු වගේ නෙමෙයි.හොඳ රස තියෙන ඒවා තෝරලා.රස නැත්තං රස කර ගන්ඩ අපි කටයුතු කරනවා.අපේ ආඝ්‍රාන සංවේදනය වෙනුවෙන් සුවඳ විළවුන් පාවිච්චි කරනවා.සංගීතය කියන්නේ ශ්‍රවනය පිනවන්න නිපදවූ ක්‍රමයක්.මේ වගේම ලිංගික ක්‍රියාවත් වඩාත් තෘප්තිමත් දෙයක් කරගන්ඩ මිනිසුන් පෙළඹිලා ඉන්නවා.ලිංගික එක්වීම තෘප්තිමත් දෙයක් උනේ නැත්තං කවුරුත් ලිංගිකව එක් වෙන එකක් නෑනේ.ඒ නිසා පරිණාමයෙන් දැනට ඉන්න සත්තුන්ට ලිංගික ක්‍රියාව තෘප්තිමත් දෙයක් බවට පත් වෙලා තියෙනවා.මිනිස්සු වන අපි ඇඳුම් ඇඳීමෙන්, සුවඳ, රූප, ආදිය භාවිතයෙන් මේ ලිංගික ක්‍රියාව තවත් වර්ණවත් කරගෙන රසවත් කරගෙන ඉන්නවා.


මේ සම්බන්ධයෙන් එක එක අයට තම තමන්ගේ ආගම දහම අනුව එක එක මත ඇති.ඒ උනත් තමුන් ලිංගික සතුට ලබන එක වැරැද්දක් කියලා කවුරුවත් හිතන එකක් නෑනේ.අබ්‍රහ්මචාරී කවුරු හරි ඒක වැරැද්දක්ය කියලා දැක්කත් අනිත් අය ඒ තෘප්තිය ලබන එක වැරැද්දක් විදිහට දකියි කියලා මම හිතන්නේ නෑ.

මගේ මිත්‍රයා අහපු කරුණ එක්ක සෘජුවම සම්බන්ධ වෙන්නේ උපත් පාලනය කියන එකනේ.මේ ගැන මේ දවස්වල සමාජයේ හරියට කතා වෙනවා නොවැ.ගැහැනු ළමයෙක් සාමාන්‍යයෙන් අවුරුදු 13-14 වගේ වෙද්දි වැඩි වියට පත් වෙනවා.ඊට පස්සේ සාමාන්‍යයෙන් අවුරුදු 55 විතර වෙද්දි තමයි ආර්ථවහරණය ඒ කියන්නේ ඔසප් වීම නවතින්නේ.එතකොට මේ ලිංගික සාඵල්‍යතාව ඇති අවුරුදු 40දි අවුරුද්දකට එක දරුවා ගානේ දරුවෝ 40ක් හැදීමේ සම්භාවිතාවක් තියෙනවනේ.ඒක අපි 10ට අඩු කරමුකෝ.එතකොට දෙන්නෙක් (සැමියා හා බිරිඳ ) දරුවො 10ක් හදනවා කියන්නේ ජන ගහනය පස්ගුණයකින් වැඩි කරන්ඩ දායක වෙනවා නේද?

ලංකාව කියන්නේ රබර්වලින් හැදිච්ච දෙයක් නෙමෙයිනේ.මිනිස්සු වැඩි වෙද්දි ඉඩම් වැඩි වෙන්ඩ.මේක කියවන ඔයාලා උනත් දැකලා තියෙන දෙයක් වෙන්ඩ ඇති ඉස්සර අපි පොඩි කාලේ (මට සාපේක්ෂව අවුරුදු 15කට විතර කළිං ) අපේ ගෙදර වත්තෙන් පැන්නම එක දිගටම තියෙන්නේ මහා විශාල ඉඩම්.බට තුවක්කු හදාගෙන ඒවට කිරිල්ල කඩන්ඩ, ඇඹුල් පේර එරමිණියා කඩන්ඩ පැය ගාණක් උනත් ඇවිදලා එන්ඩ තිබිච්ච මහා ලොකු වතු ඔක්කොම මේ වෙද්දි කෑලි කෑලිවලට කැඩිලා කම්බි වැටවල් ගහලා නේද?හැම පුංචි පර්චස් දහයේ පහළවේ ඉඩංවල කුකුල් කොටු වගේ බාගෙට සිමෙන්ති ගල්වලින් බැඳපු ගෙවල්.හැම එකේම හොටු පෙරාගත්තු කැහැටු පොඩි එවුන්.මේ ගොල්ලන්ට දෙන්ඩ රස්සා තියෙනවද?නොමිලේ උගන්නන්ඩ, සෞඛ්‍යයට වියදම් කරන්ඩ ආණ්ඩුවට සල්ලි තියෙනවද?

තමුන්ගේ ජාතිය වැඩි කරගන්ඩ කියලා හෝ ගාලා ළමයි හදන්ඩ කියන අය මේවට මොනවා හරි සැළැස්මක් හදලා තියෙනවද?දුප්පත් මිනිස්සු තමුන්ගේ ප්‍රශ්න, දුක හැමදේම අමතක කරන්නේ බීමෙන් සහ රමණයෙන්.ඒ මිනිස්සුන්ට උපත්පාලන ක්‍රම ගැන අවබෝධයක් නොදී උපත් පාලනය විජාතික කුමන්ත්‍රණයක් කියලා කිව්වම මොකද වෙන්නේ?.අනිත් එක ඔවුන්ව ජාතිවාදයෙන් වගේ දේකින් කුළප්පු කරන්ඩ හරි ලේසියි.හොඳට බලන්ඩ ඔය ළමයි හදන්ඩ කියලා වේදිකාවල මුර දෙන ඇත්තෝ ළමයි කීයද හදලා තියෙන්නේ කියලා.ඒක සිංහල වේවා, දෙමළ වේවා, මුස්ලිම් වේවා ....කිසිම වෙනසක් නෑ.හොඳට සල්ලි තියෙන උගත් එවුන් ළමයි හදන්නේ උපරිම තුනයි.එහෙම කරලා අනිත් උන්ට කියනවා ජාතිය බේරගන්ඩ ළමයි හදන්ඩ කියලා.මේවා තමයි හොඳම ජෝක්.....

 දේවවාදී ආගම්වලින් මේ උපත්පාලනය ප්‍රතික්ෂේප කරනවනේ.එයාලා කියන විදිහට දේව ක්‍රමයට පිටින් යෑමක් තමයි උපත් පාලන ක්‍රම අනුගමනය කිරීම.ඒ උනාට 'කොයිටස් ඉන්ටරප්ටස්' හෙවත් ධාතු පිටවීමට පෙර ශිෂ්ණය පිටතට ගැනීම කුරාණයේ පවා සඳහන් වෙනවා කියලා තමයි අන්වර් මහත්මයා කියලා තිබ්බේ.අනිත් එක කැලැන්ඩර් ක්‍රමය හෙවත් ඔසප් චක්‍රයේ නිසරු කාලයේ ලිංගිකව එක්වීමත් මේ අය අනුගමනය කරන බව මම වාට්ටුවල සහ ක්ලිනික්වල හම්බ උනු අයගෙන අහගෙන තියෙනවා.කොන්ඩම් එකක් පාවිච්චි කිරීම දේව ක්‍රියාවට පිටින් යෑමක් උනාට ඔය උඩ කිව්ව ක්‍රම පාවිච්චි කරලා දෙවියන්ගේ කනෙන් රිංගන එක අවුලක් නෑ!!! මේවට මට හිනා හිනා......

සාමාන්‍යයෙන් පිරිමි ගැහැනු දෙගොල්ලොම අවුරුදු 15 විතර වෙනකොට ලිංගිකව පරිණත වෙනවා.ලිංගික හැඟීම් ඇතිවෙන්ඩ පටන් ගන්නවා.ඒත් දැන් තියෙන ආර්ථික ක්‍රමය යටතේ කට්ටියට බඳින්ඩ වෙන්නේ අඩුම තරමේ අවුරුදු 25වත් පැන්නට පස්සේ.ඒ කියන්නේ අවුරුදු දහයක් මේ තරුණ ඇත්තන්ගේ ඉවසීම පරීක්ෂා කරනවා.ඒ උනාට ඇත්තටම ඒ විදිහට ඒ අය ඉවසගෙන ඉන්නේ නෑනේ.සිදුහත් කුමාරයත් අවුරුදු 16 වෙනකොට බැන්දා නෙව.ඇයි මේ අපිට විතරක් තහංචි? බැන්දා නොබැන්දා කියලා ලිංගික ආශාවේ අඩු වැඩි වීමක් නෑනේ.ඒ නිසා මේ තරුණ ප්‍රජාව දංවැල් දාලා, තහංචි දාලා හිරකරගෙන ඉන්නවට වඩා තනි තීරණ ගන්ඩ හැකි වැඩිහිටියන් උනාට පස්සේ ඒ අයගේ ලිංගික නිදහස ලබා දුන්නයි කියලා මොකද වෙන්නේ? වැදගත් වෙන්නේ අනවශ්‍ය ගැබ් ගැනීම් නවත්තන්න උපත් පාලන ක්‍රම ගැන හොඳ දැනුවත් කිරීමක් විතරයි නේද?ඒ වගේම නියම විදිහට ලිංගිකත්වය රසවිඳින්ඩ නියම ලිංගික දැනීමකුත් තිබුණොත් වඩාත් හොඳයි නේද?

වික්ටෝරියානු යුගයේ ස්වයං වින්දනයේ යෙදීම වැලැක්වීමට මේ උපකරණය ඇන්දුවාලු.....

අනියම් සම්බන්ධතා, ලිංගිකව සම්ප්‍රේශනය වන ආසාදන, අනවශ්‍ය ගැබ් ගැනීම් සහ ගබ්සාවන් වගේ ගැටළු බොහෝ දුරට අඩු කරගන්ඩ නිවැරදි ලිංගික දැනුමක් ලබා දීමෙන් පුළුවන් කියලයි මම විශ්වාස කරන්නේ.අනික දෙන්නෙක් අතරේ ඇති බැඳීම බොහොම ශක්තිමත් කරගන්ඩ සහ ජීවිතේ ගොඩක් ප්‍රශ්න අඩු කර ගන්ඩ හොඳ ලිංගික සතුටක් ලැබීම වැදගත් කියන එකට බොහෝ දෙනෙක් එකඟ වෙනවා නොඅනුමානයි.

අපේ කොලු පැටව් කෙලි පැටව් මෙව්වා එක තියෙන්නේ චූ කරන්ඩ විතරක් නෙමෙයි කියලා දැනගත්තට පස්සේ ඒ ගැන හොයන්ඩ කොච්චර උත්සාහ කළත් නිසි දැනුමක් ගෙදරින් හෝ පාසැලෙන් ලැබෙන්නේ නෑ නේද? ඉතිං මුන් යාළුවන්ගෙන් ලබා ගන්නා අක්‍රමවත් දැනුම නිසා විනාසයක් කරගෙන නවතින්ඩ තියෙන ඉඩ වැඩියි.සිංහලෙන් මේ ගැන නිසි දැනුමක් ලබා දෙන්ඩ මට හැකි විදිහට මම ගත්ත පුංචි උත්සාහයක් තමයි මේ ලිපි පෙළ.

++++++++++++++++++++++++++++++++++++++++++++++++++++++++++++++++++

කලිං ලිපියට දාන්ඩ තිබ්බ සින්දුවක් දාන්ඩ අමතක උනානේ.ඔන්න ඒක මේකේ දානවා.කට්ටිය බාගන්ඩ හොඳේ.

කෝච්චි බයිලා

වැදගත් විශය 16 ( Sex Education in Sinhala )

ස්ථිර පවුල් සැලසුම් ක්‍රම

මේක එක්කෝ ස්ත්‍රියට හෝ පුරුෂයාට කර ගන්න පුළුවන්.


ස්ත්‍රියට සිදුකරන ස්ථිර උපත් පාලන ක්‍රමයට කියන්නේ ටියුබෙක්ටමි කියලා.අපි පාවිච්චි කරන්නේ LRT  හෙවත් Ligation and Resection of the Tubes කියන නම.

මේකෙදි සිද්ද වෙන්නේ ඩිම්බකෝෂවල ඉඳලා ගර්භාශයට ඩිම්බය රැගෙන එන පැලෝපීය නාල දෙකම කපලා කෙළවරට ගැටයක් දාන එක.ඒ මඟින් ඩිම්බය ගර්භාශයට එන එක වළක්වන එක හරහා සහ ශුක්‍රාණුවලට ඩිම්බය හමුවීම වැළැක්වීම හරහා උපත් පාලනය ලබා දෙනවා.

මේ ක්‍රමය ස්ථිර එකක්.ඒ කියන්නේ නැවත යථා තත්ත්වයට පත් කරන්න බැරි ක්‍රමයක්.බැහැ කිව්වට බැරිම නෑ.නමුත් නැවත පැලෝපීය නාළ සම්බන්ධ කරලා ශල්‍යකර්මයක් සිද්ධ කළාට එච්චර සාර්ථක නෑ.ඒ වගේම නැවත සම්බන්ධ කරන තැන පොඩි අවහිරතාවයක් තිබුනොත් තවත් ගැටළුවක් ඇතිවෙන්ඩ පුළුවන්.ශුක්‍රාණු කුඩා හින්දා ඒවට පොඩි අවහිරයෙන් රිංගලා ගිහිල්ලා පැලෝපීය නාළ කෙළවරේදී ඩිම්බය සංසේචනය කරන්ඩ පුළුවන් උනාට ඩිම්බය විශාල නිසා අවහිරයක් තියෙන තැනකින් එන්ඩ අපහසුයි.ඒවගේ වෙලාවට ගර්භාශයෙන් පිටත සිදුවෙන ගැබ් ගැනීම් හෙවත් ectopic pregnancy ඇති වෙන්ඩ අවධානමක් තියෙනවා.මේ තත්ත්වය දරුවට කොහොමත් බලපානවා වගේම අම්මගේ ජීවිතේටත් තර්ජනයක් වෙන්ඩ පුළුවන්.නමුත් මේ අවධානම් ඔක්කොම ඇතිවෙන්නේ නැවත පැලෝපීය නාළ සම්බන්ධ කරන්ඩ ගියොත් විතරයි.ඒ ඇරෙන්ඩ මේ ක්‍රමය නිසා හෝ ශල්‍යකර්මය නිසා මොනවත් බරපතල ආබාධ ඇතිවෙන්නේ නෑ.

නමුත් මේ ක්‍රමයේ වාසි තමයි තමන්ගේ පවුල සම්පූර්ණ කළාට පස්සේ තවත් දරුවෙක් බලාපොරොත්තු වෙන්නේ නැත්නම් මේ ක්‍රමය බොහොම ලාභදායී මෙන්ම විශ්වාසවන්ත පවුල් සැලසුම් ක්‍රමයක් වීම.මම දන්න විදිහට තවමත් ස්ථිර පවුල් සැලසුමකට යොමු වෙන කෙනෙකුට රජයෙන් රුපියල් 500ක් දෙනවා.

නමුත් මේ ක්‍රමය ස්ථිර එකක් නිසා ආවට ගියාට මේක වෛද්‍යවරු කරන්නේ නෑ.

• කාන්තාව අවුරුදු 26ට වඩා වැඩි වෙන්ඩ ඕනේ.
• අඩුම ගානේ දරුවො දෙන්නෙක්වත් ඉන්ඩ ඕනේ.
• දෙවෙනි දරුවාට වයස අවුරුදු දෙකකට වඩා වැඩි වෙන්ඩත් ඕනේ.
• ඒ වගේම ගෑනු කෙනාට මේ ගැන පහදලා දීලා ඇයගේ නිදහස් කැමැත්ත ලැබෙන්ඩ ඕනෙ වගේම 
• ඇගේ සහකරුවාගේ කැමැත්තත් ලබාගන්න එක අනිවාර්යයි.

මෙය ඉතාකුඩා ශල්‍යකර්මයක් මඟින් සිද්ද කරන්නක්.ඒ සඳහා ක්‍රම තුනක් තියෙනවා.

• එකක් තමයි සිසේරියන් සැත්කමකදී දරුවා බිහි කිරීමෙන් පසු ඒ අවස්ථාවේදී පැලෝපීය නාළ ගැට ගසා කපා වෙන් කිරීම.
• අනිත් එක තමයි උදර බිත්තියේ කුඩා කැපුමක් හරහා සිදු කරන mini-laparotomy නම් ශල්‍යකර්මය.
• උදර බිත්තිය කපන්නේ නැතුව කුඩා සිදුරු කීපයක් විද කැමරාවක් ඇතුළු කර ඒ ආධාරයෙන් කරන laparoscopy ක්‍රමය.

මෙහි මුලින් සඳහන් කළ ක්‍රමය හැර අනිත් දෙක ඉතාමත් සුළු ශල්‍යකර්ම.උදේට ඇවිත් ශල්‍යකර්මය කරගෙන හවස් වෙද්දි ගෙදර යන්ඩ පුළුවන්.

මේ ක්‍රමයෙන් ලිංගිකව සම්ප්‍රේශනය වන රෝග සඳහා ආරක්ෂාවක් ලැබෙන්නේ නම් නෑ.ඒ වගේම මාසික ශුද්ධිය හෙවත් ඔසප් වීමටත් මෙයින් බලපෑමක් වෙන්නේ නෑ.

වාසෙක්ටමි හෙවත් පුරුෂයාට සිදු කරන ස්ථිර පවුල් සැලසුම් ක්‍රමයෙත් ටියුබෙක්ටමි ක්‍රමයේ වගේම වාසි තියෙනවා.ඒ වගේම මේ ක්‍රමයත් නැවත යථා තත්ත්වයට පත් කරන එක ලේසි නෑ වගේම එච්චර සාර්ථකත් නෑ.

මේකෙදි සිද්ධ කරන්නේ මේ කළිං ලිපියෙදි විස්තර කරපු ශුක්‍ර නාල කපලා ගැට ගහන එක.විනාඩි දහයක් විතර යන බොහොම පුංචි ශල්‍යකර්මයක් නිසා ඉස්පිරිතාලේ නවතින්ඩ ඕනෙත් නෑ.

මේක කරන්ඩත් LRT කරනවා වගේ දරුවො දෙන්නෙක්වත් ඉඳීම, දෙවෙනි දරුවා අවුරුදු දෙකට වඩා වැඩි වීම අවශ්‍යයි වගේම සහකාරියගේ වයස 26ට වඩා වැඩි වීම අවශ්‍ය වෙනවා.

මේක ගොඩක් හොඳ පවුල් සැලසුම් ක්‍රමයක් උනාට මේ ශල්‍යකර්මය කරපු ගමන් මේකේ ප්‍රථිපල ලැබෙන්නේ නෑ.ශුක්‍රාණු කියන්නේ ඩිම්බයක් වගේ එකක් දෙකක් හැදෙන දෙයක් නෙමෙයිනේ.මිලියන ගණන්වලින් හැදෙන නිසා මේ ශුක්‍ර නාළ මඟින් කැපුවට එයින් ඉහළ ඉතුරු වුනු ශුක්‍රාණු සම්පූර්ණයෙන් ඉවත් වෙලා යන්ඩ මාස තුනක්වත් යනවා.ඒ නිසා මාස තුනක් විතර යනකම් වෙනත් උපත්පාලන ක්‍රමයක් පාවිච්චි කරන්ඩ වෙනවා.ඒ වගේම මාස තුනකට පස්සේ ශුක්‍ර තරල පරීක්ෂාවක් (seminal fluid analysis) කරලා ශුක්‍රතරලය ශුක්‍රාණුවලින් තොර බව තහවුරු කරගන්ඩ සිද්ද වෙනවා.මේක එච්චර වියදමක් හෝ අපහසුවක් ඇති පරීක්ෂණයක් නෙමෙයි.කරන්ඩ තියෙන්නේ දවස් තුනක් සංසර්ගයේ යෙදීමෙන් සහ ස්වයං වින්දනයේ යෙදීමෙන් වැළකී ඉඳලා අදාල ලැබ් එකෙන් ලබා දෙන පුංචි භාජනයට ශුක්‍ර තරලය එකතු කරලා ලැබ් එකට ගිහින් දෙන එක.මේ ශුක්‍ර තරලය ලබා ගන්ඩ ඕනේ තනියෙන් මහන්සි වෙලා කියලා මතක් කරන්ඩ කැමතියි.

මේක කරපුවාම තමන්ගේ ලිංගික හැකියාව අඩුවෙයි කියලා බය වෙන්ඩ ඕනේ නෑ.එහෙම කිසිම ප්‍රශ්නයක් වෙන්නේ නෑ.මොකද වෘෂණවල හෝමෝන නිපදවීමට මේ ක්‍රමය කිසිම බාධාවක් කරන්නේ නැති නිසා.ඒ වගේම සුරාන්තයේදී ශුක්‍ර තරලය නිකුත් වීමත් සිද්ද වෙනවා.ඒක නවතින්නෙත් නෑ.එකම වෙනස මේ ශුක්‍ර තරලයේ ශුක්‍රාණු නැති වීම විතරයි.

ඒ වගේම මේ ක්‍රමයෙනුත් ලිංගිකව සම්ප්‍රේශනය වන රෝගවලටනම් ආරක්ෂාවක් ලැබෙන්නේ නෑ.

ඔන්න ඉතිං උපත් පාලන ක්‍රම ගැනත් මම දන්න ටික ඉවරයි.ඊළඟට ටිකක් භයානක වගේම දැන ගැනීම ඉතාමත් වැදගත් 'ලිංගිකව සම්ප්‍රේශනය වන රෝග' ගැන කතා කරමු.හැබැයි ඉතිං මට වෙලාවක් ලැබෙන හැටියට තමයි ඈ.........

වැදගත් විශය 15 ( Sex Education in Sinhala )

හරි අදත් උපත්පාලන ක්‍රමවලින් වැදගත් කීපයක් ගැන කතා කරමු නේද?.

අහලා තියෙනවද නෝ ප්ලාන්ට් එහෙම නැත්තං අතේ තැන්පත් කරන උපත්පාලන කූරු ගැන? නෝප්ලාන්ට් කියන්නේ ඒකේ වෙළඳ නාමයක්.ඒ වෙළඳ නාමය යටතේ ආව නිශ්පාදනයේ කූරු 6ක් අඩංගු උනා.මේ කූරු හයම අතේ උඩ බාහුවේ සමට යටින් තැන්පත් කරනවා.ඒ කූරුවල ඇති ප්‍රොජෙස්ටෙරොන් හෝමෝනය ඉතා කුඩා මාත්‍රාවකින් ශරීරයට නිකුත් වෙලා ඩිම්බ මෝචනය වැළැක්වීම සහ ගැබ්ගෙල ශුක්‍රාණුවලට ගමන් කිරීමට නුසුදුසුභාවයට පත් කිරීම හරහා උපත් පාලනය සිද්ද කරවනවා.කූරු හයක් සහිතව වෙළඳපොලට ආව නෝප්ලාන්ට් දැන් භාවිතා වෙන්නේ නෑ.දැන් ප්‍රචලිතම වෙළඳනාමය තමයි 'ජඩෙල්' කියන්නේ. ජඩෙල්වල තියෙන්නේ කූරු දෙකක් විතරයි.මේ කූරු බොහොම නම්‍යශීලී ඒවා නිසා කිසිම අපහසුවක් දැනෙන්නේ නෑ.ඒ වගේම මේවා තැන්පත් කිරීමේදී අදාල ප්‍රදේශය හිරිවැට්ටීමට ලක් කරන නිසා වේදනාව පිළිබඳ ගැටළුවක් ඇති වෙන්නෙත් නෑ.

ඇඟිලි දෙක මැදින් අතේ හමට යටින් තියෙන පුංචි කූර පේනවද?

දැනට තියෙන උපත්පාලන ක්‍රම අතරින් ආරක්ෂිතම ක්‍රමයක් විදිහට ජඩෙල් හඳුන්වන්න පුළුවන්.ඒක ගැබ් ගැනීමකට එරෙහිව 99.9%ක් පමණ ආරක්ෂාවක් ලබා දෙනවා.මෙය ගර්භාශයේ සහ ඩිම්බකෝෂ පිළිකා ඇතිවීමේ අවධානම අඩු කරනවා වගේම ඔසප් වීමේදී වේදනාව ඇතිකරවන එන්ඩොමෙට්‍රියෝසිස් නම් තත්ත්වයට ප්‍රථිකර්මයක් විදිහටත් යොදාගන්ඩ පුළුවන්.නමුත් මේත් එක්ක ඔසප් චක්‍රය අක්‍රමවත් වීම හෝ ඔසප් වීම සම්පූර්ණයෙන්ම නවතින්න පුළුවන්.ඔසප් වීම නැවතුනා කියලා ශරීරයට කිසිම හානියක් සිද්ධ වෙන්නේ නෑ.ඒ නිසා ඒ ගැනනම් බය වෙන්ඩ ඕනේ නෑ.ඒ වගේම මේ ක්‍රමයෙදිත් ආහාර රුචිය වැඩි වීම නිසා මහත් වීම සිද්ධ වෙන්ඩ පුළුවං.කෑම පාලනය සහ ව්‍යායාම මඟින් ඒ තත්ත්වය පාලනය කර ගන්ඩ හැකියාව තියෙනවා.මේක අවුරුදු පහක් ක්‍රියාත්මක වෙනවා.පෙති ගන්නවා වගේ දවස ගානේ ගන්ඩ සිද්ධ නොවීම මේකේ තවත් වාසියක්.ඒ වගේම මේක අවශ්‍ය වෙලාවකදි ඉවත් කර ගත්තම බොහොම කෙටි කාලෙකින් නැවත් ගැබ් ගැනීමේ හැකියාවත් ලැබෙනවා.

මේකේ මිලනම් ටිකක් වැඩියි.රුපියල් 6000ක් විතර වෙනවා.ඒ වගේම තැන්පත් කරගන්ඩත් තව 2000ක් විතර ගියොත් ඔක්කෝටම රු.8000ක් විතර යනවා.නමුත් මේක අවුරුදු පහක් ක්‍රියාත්මක නිසා සතියක වියදම රුපියල් 30ක් වගේ ගාණක් වෙන්නේ.සතියකට තුන් පාරක් ලිංගිකව එක්වෙන දෙන්නෙකුට කොන්ඩම්වලට යන වියදමම තමයි ජඩෙල් එකක් දැම්මත් යන්නේ.

ජඩෙල් ගැන අහලා නැති උනාට ලූප් ගැනනම් කවුරුත් වගේ අහලා ඇති කියලා හිතනවා.ලූපය එහෙම නැත්තං IUCD කියන්නේ ගර්භාශය ඇතුලේ තැන්පත් කරන පුංචි ප්ලාස්ටික් කෑල්ලක්.මේ වගේ බාහිර ද්‍රව්‍යයක් තියෙන කොට ගර්භාශයේ එන්ඩොමෙට්‍රියමේ ඇතිවෙන ප්‍රතික්‍රියා නිසා ගැබ් ගැනීමක් සිද්ද වෙන්නේ නෑ.ඉස්සර විවිධ හැඩතලවල ලූප් භාවිතා කළාට දැන් බහුලව භාවිතා කරන්නේ 'T' අකුරක හැඩය ගත්තු ලූප්.

විවිධ හැඩවලින් යුක්ත ලූප්

ලංකාවේ බහුලවම භාවිතා වෙන්නේ 'කොපර් T' කියන ලූපය.මේකේ ප්ලාස්ටික් කෑල්ලේ තඹ කම්බියක් ඔතලා තියෙනවා.මේ තඹවලට තියෙනවා ශුක්‍රාණු වගේම ඩිම්බත් විනාශ කිරීමේ හැකියාවක්.මේ කොපර් T කියන ලූපය රුපියල් 400ක් විතර තමයි වෙන්නේ.ඒ වගේම රජයේ රෝහල්වලින් සහ පවුල් සැලසුම් සායනවලින් මේක නොමිලේ ලබා දෙනවා වගේම තැන්පත් කරලත් දෙනවා.කොපර් T එකක් සාමාන්‍යයෙන් අවුරුදු දහයක් වගේ දීර්ඝ කාලයක් පාවිච්චි කරන්ඩ පුළුවං.ඒ වගේම මේක ඉවත් කරපු ගමන් නැවත ගැබ් ගැනීමේ හැකියාවත් ලැබෙනවා.ගැටළුවක් විදිහට මම දකින්නේ සමහරුන්ට තමන් ලූපයක් දාගෙන ඉන්නේ කියලා අමතක වෙන එක.ඒකෙ ඉතිං ලොකු ගැටළුවක් නෑ.නමුත් වැඩිපුර ඔසප් රුධිරය පිට වීම නම් ඇතිවෙන්ඩ පුළුවන්.ඒකත් ටික දවසකින් සාමාන්‍ය තත්ත්වයට හැරෙන්ඩ පුළුවන්.ඒ වගේම මේකේ හෝමෝන අඩංගු නැති නිසා මහත් වෙන්ඩ තියෙන හැකියාවත් අඩුයි.

කොපර් T ලූපය

මේක ගර්භාශයට ඇතුල් කරන්නේ ඒ සඳහා පුහුණුව ලබපු තැනැත්තෙකු විසින්.ඒ සඳහා මිනිත්තු පහක් දහයක් වගේ බොහොම සුළු කාලයක් තමයි ගත වෙන්නේ.ලූපය දැම්මට පස්සේ ගර්භාශයේ ඉඳං ගැබ්ගෙල හරහා යෝනි මාර්ගය ඇතුලට පුංචි නූලක් පැමිණ තියෙනවා දකින්න පුළුවන්.මේ නූල එළියට පේන්නේ නෑ.තමන්ටම යෝනි මාර්ගයට ඇඟිල්ල දාලා පරීක්ෂා කරලා බලන්ඩ පුළුවන්.ඉඳලා හිටලා එහෙම පරීක්ෂා කරලා බලන එක හොඳයි.මොකද කළාතුරකින් ලූපය ඉවතට හැලෙන්න පුළුවන්.එහෙම උනොත් උපත් පාලනය සිද්ධ වෙන්නෙ නෑනේ.ඒ නිසා විශේෂයෙන් ඔසප් වීමෙන් පස්සේ නූල යෝනි මාර්ගය තුල අහුවෙනවද කියලා පරීක්ෂා කරලා බලන එක හොඳයි.ඒ වගේම කියන්ඩ ඕනෙ දෙයක් තමයි මේ ලූපය නිසා ලිංගික කාර්යට කිසිම බාදාවක් වෙන්නේ නෑ.

තවත් වැදි දියුණු කළ ලූප් වර්ගයක් තමයි මිරේනා කියන වෙළඳ නාමය යටතේ එන්නේ.මේ ලූපයේ තඹ අඩංගු වෙන්නේ නැති උනාට දවසකට ඉතාම කුඩා ප්‍රමාණයකින් ප්‍රොජෙස්ටෙරොන් හෝමෝනය නිදහස් කරන්ඩ හැකියාවක් තියෙනවා.ඒ හෝමෝන ගර්භාශය මත සෘජුවම ක්‍රියා කරන හින්දා ශරීරයේ අනෙකුත් ප්‍රදේශවලට හෝමෝනයෙන් වෙන බලපෑම ඉතාම අඩුයි.මිරේනා එකක් අවුරුදු පහක් පාවිච්චි කරන්ඩ පුළුවන්.මේක එන්ඩොමෙට්‍රියෝසිස් කියන තත්ත්වයේදී ඇතිවෙන වේදනාව වගේම ඔසප් වීමේදී අධිකව රුධිරය පිටවීම පාලනය කරන්ඩත් ප්‍රථිකර්මයක් විදිහට බාවිතා කරන්ඩ පුළුවන්.මේකේ අතුරු අබාධ අඩු නිසාම ගාණ නම් ටිකක් සැරයි.මිරේනා එකක් සාමාන්‍යයෙන් රුපියල් 25000-27000ක් විතර වෙනවා.ඒත් ඉතින් ගන්ඩ පුළුවන්නම් ගොඩක් හොඳ උපත් පාලන ක්‍රමයක්.අනිත් හැම අතින්ම වගේ කොපර් T එකට සමානයි.

මිරේනා

ඔන්න දැං තමයි වැදගත්ම එක ගැන කියන්ඩ යන්නේ.හොඳට කියවලා මතක තියාගන්ඩ ඕනේ මේක ගැන නම්.

අනාරක්ෂිත ලිංගික ක්‍රියාවකින් පස්සේ, ඒ කියන්නේ කිසිම උපත්පාලන ක්‍රමයක් අනුගමනය නොකර හදිසි තීරණ මත සිද්දවෙන ලිංගික ක්‍රියාවකට පස්සේ මොනවද කරන්ඩ පුළුවං??

මේකට ගන්ඩ පුළුවං ආරක්ෂක ක්‍රම කිහිපයක් තියෙනවා.එකක් තමයි 'ප්‍රොස්ටිනෝර්-2' කියන්නේ.මේ කියන්නේ අනාරක්ෂිත ලිංගික සම්බන්ධයක් පැවැත්තුවට පස්සේ ගැබ් ගැනීම වලක්වන්ඩ ගන්නා පෙති වර්ගයක්.මේකෙන් ගබ්සා වීමක් නම් සිද්ධ වෙන්නේ නෑ.ඒක හින්දා තමුන් ගැබ් ගත්තට පස්සේ මේක බොන්න යන්න එපා.ගබ්සා කිරීම ලංකාවේ නීතියෙන් තහනම් වගේම ජීවිතේටත් ලොකු තර්ජනයක්.ඒ නිසා ගබ්සාවක් දක්වා යන්ඩ කලින් ගැබ් ගැනීම වලක්වා ගත්තොත් හොඳයිනේ.අනාරක්ෂිත ලිංගික සම්බන්ධයකට පස්සේ චුට්ට වෙලාවකින් කට්ටියට තාර්කික ශක්තිය ලැබෙනවනේ.එතකොට තමයි දැං මොකද කරන්නේ කියලා කම්පා වෙන්ඩ පටං ගන්නේ.ඒ නිසා හොඳම දේ තමයි හදිස්සි නොවී හැම තිස්සේම ලිංගික සම්බන්ධයක් මනා සැලැස්මක් සහිතව පවත්වන එක.උදාහරණයක් විදිහට බැඳපු දෙන්නෙක් නම් අසල්වැසියන්ගෙන් නෑදෑයින්ගෙන් වගේම ළමයින්ගෙනුත් කරදරයක් නැති නිදහස් තමුන්ගෙම කියලා වෙලාවක් කළිං ඉඳං සැලසුම් කරගෙන හොඳ උත්තේජනයක් යටතේ එකතු වෙනවානම් උපත් පාලන ක්‍රමය අමතක වෙන්නේ නෑනේ.නොබැඳපු දෙන්නෙක් නම් ඒකත් කාටවත් අහු නොවෙන තැනක් කළිං සැලසුම් කරගෙන වෙලාවක් වෙන් කරගෙන එහෙම ලෑස්ති වෙනවා නම් උපත්පාලන ක්‍රමයක් අමතක වෙන්නේ නෑනේ.

හරි ඔන්න නොවැලැක්විය හැකි හේතුවක් හින්දා අනාරක්ෂිත ලිංගික එක්වීමක් සිද්ධ උනා කියමුකෝ.එතකොට තමයි මේ ප්‍රොස්ටිනෝර්-2 කියන පෙති පාවිච්චි කරන්ඩ ඕනෙ.මේ පෙති පැකට්ටුවක තියෙන්නේ පෙති දෙකක් විතරයි.ලිංගික සම්බන්ධතාවයෙන් පස්සේ හැකිතරම් ඉක්මනට එක පෙත්තක් ගන්ඩ ඕනේ.පරක්කු වෙන්ඩ වෙන්ඩ මේ පෙත්තෙන් ලැබිය හැකි ආරක්ෂාව අඩු වෙනවා.පැය 72ක් ඒ කියන්නේ දවස් තුනක් ඇතුලත ගත්තොත් ප්‍රථිපලය හොඳයි.පැය 24ක් ඇතුලත ගන්ඩ පුළුවන්නම් ප්‍රථිපලය වඩාත් හොඳයි.ඊටත් පරක්කු වෙන්ඩ වෙන්ඩ ප්‍රථිපලය අඩු වෙලා යනවා.හැකි ඉක්මනින් එක පෙත්තක් අරගෙන පැය 12කට පස්සේ අනිත් පෙත්ත ගැනීම හෝ පෙති දෙකම එකවර අර ගැනීම හෝ කරන්ඩ පුළුවන්.

පෙත්තක් අරගෙන පැය දෙකක් ඇතුලත වමනේ ගියොත් නැවත පෙත්තක් අරගන්ඩ ඕනේ.පෙති දෙකම ගත්තු වෙලාවක පැය දෙකක් ඇතුලත වමනේ ගියොත් පෙති දෙකක්ම ආපහු ගන්ඩ ඕනේ.

ප්‍රොස්ටිනෝර්-1 කියලත් පෙති ජාතියක් තියෙනවා.ඒකේ තියෙන්නේ පෙති එකයි.හැකි ඉක්මනින් ඒ පෙත්ත ගන්න එක තමයි කරන්ඩ තියෙන්නේ.එහෙම නැත්තං මිතුරි පෙති පැකට් එකක් අරගෙන ඒකේ කහ පාට පෙතිවලින් හතරක් හැකි ඉක්මනින් අරගෙන පැය දොළහකට පස්සේ තවත් හතරක් අරගන්න එකත් කරන්ඩ පුළුවං.

මෙතනදි මතක තියාගන්ඩ ඕනේ දේ තමයි මේක දිගින් දිගටම උපත් පාලන ක්‍රමයක් විදිහට පාවිච්චි කරන්ඩ හොඳ නෑ.මොකද මේකෙදි හෝමෝන විශාල ප්‍රමාණයක් සිරුරට මුදා හැරෙනවා.ඒකෙන් ඇතිවන අතුරුඵල එච්චර හොඳ නෑ.හැම දෙයක්ම එහෙමයිනේ.සීනි ටිකක් කෑවම රසයි ඇඟට හොඳ ශක්තිය ලබා දෙන දෙයක් උනාට සීනි ගොඩ ගොඩ ගොඩක් කල් කෑවොත් දියවැඩියාව හැදෙන්ඩ ඉඩ තියෙනවා වගේ මේකත් එහෙමම තමයි.

තවත් ක්‍රමයක් තමයි අනාරක්ෂිත ලිංගික එක්වීමකට පස්සේ ඉක්මනින්ම ගිහිල්ලා ඒ වෙනකොටත් ගර්භනී නොවන බව තහවුරු කරගෙන ලූපයක් දාගන්ඩ පුලුවන්.ඒකෙන් ඒ වෙලාවේ ගැබ් ගැනීම නවතිනවා වගේම ඉස්සරහටත් ආරක්ෂාවක් ලබා දෙනවනේ.ප්‍රොස්ටිනෝර් ගත්තත් වෙනත් උපත් පාලන ක්‍රමයකට යන එක තමයි හොඳ.

ප්‍රොස්ටිනෝර්-1 පෙත්තක් රුපියල් 150ක් විතර වෙනවා.ප්‍රොස්ටිනෝර්-2 පෙති දෙකක් තියෙන පැකට් එකක් රුපියල් 100ක් තමයි වෙන්නේ.මිතුරි පැකට් එකක් රුපියක් 100ක් විතර උනාට රජයේ තැන්වලින් ගොඩක් අඩු මිලට ගන්ඩ පුළුවන්.

වැදගත් විශය....14 ( Sex Education in Sinhala )

අද බලමු එහෙමනං බොහොම ප්‍රසිද්ධ වෙච්ච උපත් පාලන කොපු හෙවත් කොන්ඩම් ගැන.මේක සම්බන්ධව දීර්ඝ ඉතිහාසයක් තියෙනවා.හරියටම විශ්වාස නැති උනත් ඊජිප්තුවේ මිනිස්සු පැරෆින් ඉටි තවරපු ලිනන් රෙදි උපත් පාලන කොපු විදිහට පාවිච්චි කළා කියලා කතාවක් මම අහලා තියෙනවා.කොහොම හරි 17-18 වෙනි ශතවර්ෂවලදි මිනිස්සු සත්ත්ව බඩවැල්වලින් හදපු කොන්ඩම් පාවිච්චි කරලා තියෙනවා.

ඊට පස්සේ කාර්මික විප්ලවයත් එක්ක රබර්වලින් හදපු කොන්ඩම් භාවිතයට එනවා.කොහොම නමුත් හැම දේකදිම වගේ මේකෙදිත් ආගමික මැදිහත් වීම සිද්ධ වෙනවා.ඇමරිකාවේ මුලින් කොන්ඩම් තහනම් කරන්ඩ යෙදුනත් පස්සේ මේකේ වැදගත්කම අවබෝධ වීමත් එක්ක ඒ නීති ලිහිල් වෙනවා.දැන් බහුලව තියෙන්නේ ලේටෙක්ස් කියන රබර් වර්ගයෙන් හදපු කොන්ඩම්.නමුත් සමහර අය මේ ලේටෙක්ස්වලට අසාත්මික නිසා පොලියුරිතේන් වගේ වෙනත් රසායනික සංයෝගවලින් හදපු කොන්ඩමුත් වෙළඳ පොලේ මිළ දී ගන්ඩ තියෙනවා.

කොන්ඩම්වලින් උපත් පාලනයට අමතරව ලිංගිකව සම්ප්‍රේශනය වෙන රෝග සඳහාත් යම් ආරක්ෂාවක් ලබා දෙනවා.නිසි විදිහට කොන්ඩමයක් පාවිච්චි කළොත් ඒඩ්ස් ඇතුළුව බොහොමයක් ලිංගිකව සම්ප්‍රේශනය වෙන රෝගවලින් වැලකෙන්න පුළුවන්.

කොන්ඩමයක් නිසි විදිහට පළඳින්නේ මෙහෙමයි.මේ කොන්ඩමය එන්නේ ඉහළ රූපයේ තියෙනවා වගේ ආවරණයක.කොන්ඩමය ඉවතට ගන්න කියලා මේ ආවරණය කටින් ඉරන්ඩ හෝ කතුරකින් කපන්ඩ යන්ඩ එපා.මොකද කොන්ඩමයේ පුංචි හරි සිදුරක් ඇති උනොත් ඒකෙන් ලැබිය යුතු ආරක්ෂාව ලැබෙන්නේ නෑනේ.ඒ වගේමයි මේ කොන්ඩම හැමතිස්සෙම ළඟ තියා ගන්න එක හොඳයි. (මොකද හදිස්සියක් උනොත් එහෙම මේවා හොය හොය ඉන්ඩ මහන්සි නොවී වැඩේ කරලා පස්සේ පසු තැවෙන්ඩයි වෙන්නේ ) ඒ උනාට මේවා සාක්කුවේ කාසි යතුරු වගේ දේවල් එක්කවත් පර්ස් එකේවත් දාගෙන යන්ඩ හොඳ නෑ.මොකද ඒකෙනුත් කොන්ඩමය පළුදු වෙන්ඩ පුළුවං නිසා.

කොන්ඩමය ආවරණයෙන් එළියට ගන්නේ අතින් ඉරලා.ඔය දැති තියෙන පැත්තෙන් අල්ලලා ඉරුවාම පහසුවෙන් ආවරණය ඉරෙනවා.

ඊට පස්සේ එළියට ගත්තු කොන්ඩමය තියෙන්නේ මේ රූපයේ වගේ.හරියට ඉස්කෝලේ ගිහිල්ලා ගෙදර ඇවිත් හදිස්සියට ගලවපු මේස් එකක් වගේ රෝල් කරලයි තියෙන්නේ.

දැං කරන්ඩ ඕනේ මේ මැද තියෙන ඉහළට ඉස්සුනු තැන වම් අතේ දබර ඇඟිල්ලෙනුයි මහපට ඇඟිල්ලෙනුයි මිරිකලා අල්ලගන්න එක.එතකොට ඒ කෑල්ලේ තියෙන වාතය ටික ඉවත් වෙලා යනවා.ඊට පස්සේ මේක ශිෂ්ණයේ ඉහළ කෙළවරෙන් තියලා අර රෝල් කරලා තියෙන එක දිග ඇරෙන පැත්තට ශිෂ්ණය ආවරණය වෙන විදිහට දිග අරින එකයි කරන්ඩ ඕනෙ.

හොඳට මතක තියාගන්ඩ කොන්ඩමය කෙළවරේ තියෙන පුංචි ඉඩ තියෙන්නේ ශුක්‍ර තරලය එකතු වෙන්ඩ.ඒ ඉඩේ වාතය ඉතුරු උනොත් සංසර්ගයේදී පුපුරලා යන්ඩ පුළුවං.ඒ නිසා හොඳට වාතය ඉවත් වෙන විදිහට තද කරලා කොන්ඩමය පළඳින්න ඕනේ.අනිත් එක තමයි ශුක්‍ර තරලය පිට උනාට පස්සේ ශිෂ්ණයේ ප්‍රාණවත් භාවය නැතිවෙලා යනවනේ.එතකොට කොන්ඩමය ශිෂ්ණයෙන් ගැලවිලා ශුක්‍ර තරලය යෝනි මාර්ගය අවට තැවරෙන්ඩ පුළුවං.එතකොටත් ගැබ් ගැනීමේ අවධානමක් තියෙනවා.ඒක හින්දා ශුක්‍ර තරලය පිට උනාට පස්සේ ශිෂ්ණය ප්‍රාණවත්ව තියෙද්දිම යෝනි මාර්ගයෙන් පිටතට ගන්ඩ ඕනේ.

ඒ වගේම මේක ලිංගිකව සම්ප්‍රේශනය වෙන රෝගවලට ආරක්ෂාවක් විදිහට පළඳිනවානං කොන්ඩමය ගලවද්දි කඩදාසියකින් හෝ ටිෂූ කොළයකින් අල්ලලා කොන්ඩමයේ තැවරී ඇති යෝනි ස්‍රාවයන් අතේ නොගෑවෙන විදිහට පරිස්සමෙන් ගලවලා ඉවත් කරන්ඩ ඕනේ.මොකද මේ යෝනි ස්‍රාවයන් හරහානේ රෝගයන් පැතිරෙන්නේ.පුරුෂයින්ගේ නම් ශුක්‍ර තරලය හරහා තමයි රෝගයන් පැතිරෙන්නේ.ඉතින් මුඛ සංසර්ගයේදී ශුක්‍ර තරලය හෝ සියුම් තුවාලවලින් පිටවන රුධිරය තැවරීමෙන් මුඛය හරහා රෝග බෝවීමේ අවධානමක් තියෙනවා.ඒ නිසා තමයි විවිධ රසවලින් සහ සුවඳින් යුක්තව කොන්ඩම් හදලා තියෙන්නේ.ඒ නිසා මතක තියාගන්ඩ අනාරක්ෂිත ඒ කියන්නේ තමුන්ට හරියටම විශ්වාස නැති කෙනෙක් එක්ක ලිංගිකව එක් වෙද්දී කොන්ඩමයක් හැම විටම පළඳින්න හෝ පළඳවන්න.

ගුද සංසර්ගයේ දී සාමාන්‍ය යෝනි සංසර්ගයකට වඩා තද බවක් තිබීමත් ගුදය සංසර්ගයකට හැඩ ගැසී නොතිබීමත් නිසා කුඩා තුවාල ඇතිවීමේ අවස්ථාව වැඩියි.ගුද රමණයකින් ලිංගිකව සම්ප්‍රේශනය වෙන රෝග වැළඳීමේ අවධානම යෝනික සංසර්ගයක මෙන් පනස් ගුණයක් කියලයි කියන්නේ.සාමාන්‍ය කොන්ඩමයන් ගුද රමණයට සුදුසු වෙන්නේ නෑ.ඒවා පහසුවෙන් ඉරී යන්ඩ පුළුවං.ඒ නිසා ඒ වෙනුවෙන් නිපද වූ ඝණකම් කොන්ඩමත් මිලදී ගන්ඩ තියෙනවා.

කොන්ඩම පළදීන්නැතුව ඉන්ඩ කට්ටිය කියන නිදහසට කාරණයක් නේ සංවේදී භාවය අඩුවෙනවා කියන එක.හරියට ඇඳුං ඇඳං නානවා වගේ කියලනේ කියන්නේ.මේක ඇත්තටම මානසික කාරණයක්. සංවේදීභාවය සුළු වශයෙන් අඩු වෙන්ඩ පුළුවං.ඒ උනත් අවධානමක් ගන්නවට වඩා ඒක හොඳයිනේ නේද?.ඉතිං මේ සංවේදීභාවය අඩු වෙනවා කියන අයට තුනී බවෙන් වැඩි කොන්ඩමත් නිපදවලා තියෙනවා.ඒ වගේම කොන්ඩමය මතුපිට ගැටිති සහ රැළි සහිතව නිපදවූ කොන්ඩම සංවේදීභාවය වැඩි කරනවා කියලයි කියන්නේ.

තවත් කොන්ඩම වර්ගයක් තියෙනවා පිරිමියාගේ සුරාන්තය පමා කරවන.මේ කොන්ඩමයේ ශිෂ්ණයේ කෙළවර සංවේදීභාවය අඩුකරවන බෙන්සොකේන් කියන රසායනිකය තවරලා තියෙනවා.ඒකෙන් ශුක්‍ර මෝචනය සැලකිය යුතු ලෙස පමා කරවනවා.

ඒ වගේම ශිෂ්ණයේ සෘජු භාවය වැඩි කරවන රසායනිකයක් අඩංගු කොන්ඩමයකුත් නිපදවලා තියෙනවා.ඒකනම් තවම ලංකාවේ නෑ මම හිතන්නේ.

කාන්තා කොන්ඩමය

මේක ලංකාවේ එච්චර ජනප්‍රිය නැති උනත් මිළ දී ගන්ඩ තියෙනවා.මේක නිසි විදිහට පාවිච්චි කළොත් සාමාන්‍ය කොන්ඩමයට වඩා ලිංගිකව සම්ප්‍රේශනය වෙන රෝගවලට ආරක්ෂාවක් ලබා දෙනවා.මේක තරමක් විශාල කොන්ඩමයක්.මේක එක කෙළවරක් විවෘතයි.අනිත් කෙළවර වහලයි තියෙන්නේ.කොන්ඩමය ඇතුලේ රබර් වළල්ලක් තියෙනවා.මේ රබර් වළල්ල කොන්ඩමය ඇතුලෙම පොඩි වෙන විදිහට අල්ලගෙන යෝනි මාර්ගයට ඇතුළු කරගන්ඩ ඕනේ.එතකොට ඒ වළල්ල ගිහින් ඇතුලෙදි දිග ඇරිලා ගැබ් ගෙල වටේට සවි වෙනවා.එතකොට ගැලවිලා වැටෙන්නේ නෑ.

මේ කොන්ඩමය පැළඳුවාම පිටත ඉතුරු වෙන කොටසෙන් බාහිර සහ අභ්‍යන්තර යෝනි තොල් ද ආවරණය වෙන නිසා තමයි මෙහි ලිංගිකව සම්ප්‍රේශනය වන රෝගවලට ඇති ආරක්ෂාව වැඩි වෙන්නේ.

වැදගත් විශය....13 ( Sex Education in Sinhala )

දේශපාලනය, සත්ව පාලනය වගේම උපත් පාලනයත් සමාජයේ අත්‍යවශ්‍ය අංගයක් විදිහටයි මම දකින්නේ.අධි ජනනය කියන දේ පරිණාමයට වැදගත් උනාට මිනිස්සු පරිණාමයට අවශ්‍ය කරන ස්වභාවික වරණය කියන ක්‍රියාවලිය බොහෝ දුරට පාලනය කරගෙන තියෙන හින්දා මිනිස්සුන්ගේ සංඛ්‍යාව පෘථිවියට දරාගන්ඩ බැරි තරමට වර්ධනය වෙලා.

මිනිස්සුන්ගේ ලිංගික ක්‍රියා අනිත් සත්තුන්ගේ වගේ ප්‍රජනනයටම සීමා නොවුනු දෙයක් කියලත් කළිං ලිපියක කිව්වා වගේ මතකයි.මිනිස්සුන්ගේ ලිංගික ක්‍රියා මග්න් දෙදෙනෙක් අතර ඇති බැඳීම ශක්තිමත් කරවනවා.ඒ වගේම අපි කරන ගොඩක් දේවල් ඒ ක්‍රියාවේ මූලික අවශ්‍යතාවයෙන් බැහැරවනේ සිද්ධ වෙන්නේ.උදාහරණ්යක් විදිහට අපි කේක් කෑල්ලක් කන්නේ කොකාකෝලා එකක් බොන්නේ බඩගින්නටවත් තිබහටවත් නොවෙන අවස්ථා වැඩියිනේ.ඉතිං ඒ නිසා මිනිස්සු ප්‍රජනනයට මිනිස්සුංව යොමු කරවන්ඩ ලිංගිකත්වය තෘප්තිමත් ක්‍රියාවක් වෙලා තියෙන එකෙන් ප්‍රයෝජන අරගෙන ඒක කොච්චර දුර අරගෙන ගියාද කියනවනං ඇත්තටම දැං වෙද්දි දරුවෙක් පිළිසිඳ ගැනීම කියන්නේ ලිංගික ක්‍රියාවේ අතුරුපලයක් හෝ අහිතකර ප්‍රතිඵලයක් ලෙස සළකන තත්ත්වයටම වර්ධනය වෙලා.

ඉතිං සමහරු උපත් පාලනය වැරැද්දක් විදිහට දකිනවා උනාට මුළු ලෝකෙම මිනිස්සුංගෙං පුරවලා ලෝකෙම විනාශ කරගන්නවට වඩා උපත් පාලනය කරන එක හොඳයි නේද?අනිත් එක තමයි නිසි විදිහට උපත් පාලන ක්‍රමයක් භාවිතා කළොත් ගැබ් ගැනීම් වලක්වා ගන්ඩ පුළුවං වගේම ලංකාවේ මේ සිද්ධ වෙන ගබ්සා කිරීම අඩු කිරීමට හෝ නැත්තටම නැති කිරීමට හැකියාවක් ලැබේවි.

උපත් පාලන ක්‍රමයක් විදිහට දැනට තියෙන සාර්ථකම ක්‍රමය තමයි ලිංගිකව එක් වීමෙන් වැළකී සිටීම.ඒ උනාට මේ ජීවත් වෙන ටික කාලේ මොකටද නිකං විඳව විඳව ඉන්නේ.අනුන්ට කරදරයක් නොකර සතුටෙං හිටියා කියලා වැරැද්දක් විදිහට කාටවත් ඒක විවේචනය කරන්ඩ බෑනේ.ඒක හින්දා මේක කරන්ඩ පුළුවං කට්ටිය කරගෙන යන්ඩ.අනිත් අය මේ පහළ විස්තර කරන ක්‍රමවේදයක් පාවිච්චි කළාට කමක් නෑ.

හරි දැං අපි සරළම ක්‍රමවලිං පටං ගම්මු.අතීතයේ ඉඳං පැවතිච්ච ක්‍රමවේද වලින් එකක් තමයි 'දින දර්ශන ක්‍රමය'කට්ටියට මතක ඇතිනේ කලිං ලිපියක ඔසප් චක්‍රය ගැන කතා කළා.ඉතිං මේ ඔසප් චක්‍රයේ ඩිම්බයක් නිකුත් වෙන වෙලාවටනේ ශුක්‍රාණුවකට ගිහිල්ලා ඒක සංසේචනය කරලා පිළිසිඳ ගැනීමක් සිද්ද වෙන්ඩ පුළුවං.මේ දින දර්ශන ක්‍රමයෙදි සිද්ද වෙන්නේ මෙහෙම ඔසප් චක්‍රයේ ඩිම්බය නිකුත් වීමට ඉඩ ඇති දවස් මග ඇරලා අනිත් දවස්වලදි ලිංගිකව එකතු වෙන එක.මේක අසාර්ථක ක්‍රමයක්.මොකද ගැහැනු අයගේ ඔසප් චක්‍රය හරියට පිළිවෙලට සිද්ධ නොවෙන්න පුළුවං.එහෙම උනොත් ඉතිං බබා හම්බ උනා තමයි.ඒක නිසා මේ ක්‍රමය අනුගමනය නොකළ යුතු එකක් විදිහටයි මමනං දකින්නේ.මොකද ගැබ් ගැනීමක් වගේ දෙයක් සම්බන්ධව අවධානමක් ගන්න එකේ තේරුමක් නෑනේ.

අනිත් සාම්ප්‍රධායික ක්‍රමය තමයි ශුක්‍ර තරලය පිට වීමට පෙර ශිෂ්ණය යෝනි මාර්ගයෙන් පිටතට ගැනීම.මේකත් හරිම අසාර්ථක ක්‍රමයක්.මොකද සුරාන්තයේදී ශුක්‍ර තරලය පිට උනාට ඇත්තටම ඊට කළිං ඉඳලම ටික ටික ශුක්‍ර තරලය මුදා හැරෙනවා.අනික හොඳම ශුක්‍රාණු ටික පවතින්නෙත් මේ මුළින්ම පිට වෙන ශුක්‍ර තරලයේ.ඒ නිසා උපත් පාලන ක්‍රමයක් විදිහට අසාර්ථකයි වගේම මේ ක්‍රමය නියම ලිංගික තෘප්තියක් ලබාගන්න එකටත් බාධා කරන්ඩ පුළුවං.ඇයි ඉතිං පටං ගත්තු වෙලාවෙ ඉඳං ඔළුවේ වැඩ කරන්නේ පත්තු වෙන්ඩ කළිං තුවක්කුව එළියට ගන්න එක ගැනනේ.

දැං අපි බලමු ලංකාවේ ගොඩක් අය පාවිච්චි කරන උපත් පාලන පෙති ගැන.

සාමාන්‍යයෙන් බහුලවම තියෙන්නේ 'මිතුරි' කියන වෙළඳ නාමය යටතේ නේ.මේ මිතුරි පෙතිවල අඩංගු වෙන්නේ සාමාන්‍යයෙන් ගැහැනුන්ගේ ශරීරයේ නිපදවෙන ඊස්ට්‍රජන් සහ ප්‍රොජෙස්ටෙරොන් කියන හෝමෝන දෙක.මේ හෝමෝන දෙක ශරීරයට ඇතුළු උනාම ඒවා සාමාන්‍ය ස්ත්‍රී කායික ක්‍රියා යාමනයට දායක වෙනවා වගේම ගිහිල්ලා පිටියුටරියෙන් FSH සහ LH කියන හෝමෝන ස්‍රාවය වීම වළක්වනවා.එතකොට ඩිම්බකෝෂවල ඩිම්බ නිපදවීම තාවකාලිකව නතර වෙනවා.එයිට අමතරව ගර්භාශය සහ යෝනි මාර්ගය එකිනෙක සම්බන්ධ කරන ගැබ් ගෙල ප්‍රදේශයේ ඇති ශ්ලේෂ්මලය ඝණකම් බවට පත් කිරීමත් මේ හෝමෝන මගින් සිද්ධ වෙනවා.එතකොට ශුක්‍රාණුවලට යෝනි මාර්ගයේ සිට ගර්භාශයට ඇතුළු වෙන්න අපහසු වෙනවා.

මේ පෙතිවලින් උපත් පාලනය කරනවාට අමතරව තවත් වාසි කීපයක් ලබාගන්ඩ පුළුවං.අක්‍රමවත් ඔසප් චක්‍ර ඇති අයගේ ඔසප් චක්‍රය ක්‍රමවත් කරගන්ඩ පුළුවං වගේම ඔසප් වීමේදී ඇතිවන වේදනාව අඩු කරගන්නත් පෙති මගින් පුළුවං.එයිට අමතරව ගර්භාශ සහ ඩිම්බකෝෂ පිළිකාවලට එරෙහිව ආරක්ෂාවක්ද ලබා දෙනවා.මුහුණේ කුරුලෑ ආදිය අඩු වීමටත් පෙති හේතු වෙනවා.

පෙති නිසි ලෙස භාවිතා කළොත් 99.99%ක පමණ ආරක්ෂාවක් ලබා ගන්ඩ පුළුවං.ගැටළුව තියෙන්නේ පෙති ගන්න එක අමතක වීම.ඒ වගේම සමහරුන්ට පෙති ගැනීමත් එක්ක වමනය, ඔක්කාර ගතිය, හිසරදය, පියයුරුවල වේදනාව වගේම ඔසප් වීම් අතර තුර සුළු රුධිර වහනයන් ඇති වෙන්ඩ පුළුවං.වමනය ඔක්කාර ගතිය නැති කරගන්ඩ නම් මේ පෙති රාත්‍රී කෑමට පසුව ගැනීමෙන් බොහෝ දුරට පුළුවං.මේ අතුරු ආබාධ මාසයක් දෙකක් යනවිට නැතිවෙලා යනවා.

තවත් ගැටළුවක් තමයි කිරි දෙන මව්වරුන්ට මිතුරී පෙති සුදුසු නොවීම.පෙතිවල අඩංගු ඊස්ට්‍රජන් මගින් කිරි නිපදවීමට බාධා පමුණුවන බැවින් මේ කාලයේදී වෙනත් උපත් පාලන ක්‍රමයක් භාවිත කළ යුතු වෙනවා.ඒ නැත්නම් ප්‍රොජෙස්ටරෝන් පමණක් අඩංගු පෙති වර්ගද වෙළඳපොළේ ඇති අතර වෛද්‍ය උපදෙස් මත එවැන්නකටද යොමු වීමට පුළුවන්.

පෙති ගත්තම මහත් වෙනවා කියන එක අපේ ගෑනු අය සෑහෙන්ඩ බය වෙන දෙයක් නේ.බය වෙන්ඩ එපා ඔයිට වඩා තව කොහෙ මහත් වෙන්ඩද? ඇත්තටම පෙති ගත්තම ඒකේ තියෙන ප්‍රොජෙස්ටෙරොන් මගින් කෑම රුචිය වැඩි කරවනවා.එතකොට කාලා කාලා මහත් වෙනවා මිසක් පෙතිවලින් මහත් වෙන්නේ නෑ.ඒකට කෑම පාලනය කිරීමෙන් සහ ව්‍යායාම කිරීම  හොඳ පිළිතුරක්.ඒ වගේමයි පෙති ගැනීම නිසා වඳ භාවයට පත් වෙන්නේ නෑ.පෙති නවත්තලා ටික කාලෙකින් නැවත ගැබ් ගැනීමේ හැකියාව ලැබෙනවා.

මිතුරි පෙති පැකට්ටුවක පෙති 28ක් තියෙන කාඩ් එකක් තියෙනවා.පෙති 21ක් කහ පාටටත් යටම පේළියේ පෙති 7ක් රතු පාටටත් තියෙනවා.කහ පාට පෙතිවලින් ආරම්භ කරගෙන දිගටම පෙති අරගන්න ඕනේ.රතු පාට පෙති ගන්නකොට ඔසප් රුධිරය පිට වෙනවා.එක පැකට් එකක් අවසන් උනු වහාම අළුත් පැකට් එකක් ආරම්භ කරන්ඩ ඕනේ.හරිම සරලයි.අමතක නොකර දිගටම ගත්තොත් හරි.වැදගත්ම දේ තමයි ලිංගිකව එක් උනත් නැතත් දිගටම පෙති ගන්ඩ ඕනේ.පෙති ගන්න එක නවත්තන්ඩ ඕනේ දරුවෙක් බලාපොරොත්තු වෙනකොට හෝ වෙනත් උපත් පාලන ක්‍රමයකට මාරු වෙනවනං විතරයි.



DMPA එන්නත

මේ එන්නතේ අඩංගු වන්නේ ප්‍රොජෙස්ටෙරොන් හෝමෝනයයි.මෙය අතේ උඩ බාහුවේ මාංශ පේෂියට එන්නත් කළ විට ක්‍රමානුකූලව සුළු ප්‍රමාණයෙන් හෝමෝනය රුධිරයට මුදා හරියි.මෙමගින් ද උපත් පාලනය සහ අනෙකුත් වාසි පෙතිවලට සමානවම ලබා දේ.මේ එන්නත් සෑම මාස තුනකට වරක්ම ලබාගත යුතු වන අතර එන්නත නවතා මාස 3-4ක් පමණ කාලයකින් නැවතත් ගැබ් ගැනීමේ හැකියාව ලැබේ.මේ එන්නත ගැනීමත් සමඟ ඔසප් රුධිරය පිට වීම අඩු වීම හෝ සම්පූර්ණයෙන්ම නැවතීමට ඉඩ ඇත.නමුත් මෙය ගැටළුවක් නොවේ.ඉන් කිසිඳු අයහපත් සෞඛ්‍ය තත්ත්වයක් ඇති නොවේ.

වැදගත් විශයය....12 ( Sex Education in Sinhala )

කාලෙකට පස්සේ අසනීප වෙච්ච හින්දා ලැබිච්ච නිවාඩුවේ බ්ලොගේ මොනව හරි ලියන්ඩ හදද්දි තමයි මතක් උනේ වැදගත් විශය ලිපි පෙළ ඉවර නෑ නේද කියලා.ඔන්න අද ඒකේ වැදගත්ම ඒ කියන්නේ ප්‍රායෝගිකම ලිපිය ලියන්ඩයි හදන්නේ.

ලිංගික සංසර්ගය, ලිංගික එක්වීම, රමණය, මෛථූන්‍යය, සයනය කිරීම, සංසර්ගය, සසඟ, අඹුසැමි ඇසුර වගේ සභ්‍ය වචන රාශියක් සහ අසභ්‍ය යැයි කියන වචන රාශියකින් මෙන්ම සාමාන්‍ය එදිනෙදා අපි කතා කරන වචන රාශියක් ව්‍යංගව භාවිතා කරලා මේ ක්‍රියාව හඳුන්වන එකෙන්ම මිනිස්සු මේක ගැන කොච්චර උනන්දුයිද කියලා තේරෙණවා.නමුත් ගැටළුව තියෙන්නේ කොච්චර උනන්දු උනත් මේ ගැන පැහැදිලි දැනුමක් ලබා ගන්ඩ තියෙන මාර්ග හරි අඩුයි.

ගුරුවරු වැඩිහිටියෝ සහ දෙමව්පියෝ මේ ගැන කතා කරන එක ප්‍රතික්ෂේප කරද්දි මිත්‍රයින්ගෙන් ලැබෙන්නේ හරිම අපැහැදිලි ව්‍යාකූල තොරතුරු සමුදායක්.ඒ වගේම අනිකුත් තොරතුරු ලැබෙන මාධ්‍ය බොහොමයක තියෙන්නේ අතිශයෝක්තියෙන් කෙරෙන විස්තරයක් (නිල් චිත්‍රපට හෙවත් වැල, සහ අසැබි පත්තර ).ඉතින් මේ විදිහට දැනුම අතින් අසම්පූර්ණව ලිංගික ජීවිතයට පිවිසෙන්න වෙන එක මම දකින්නේ අපරාධයක් විදිහට.මොකද අපි කරන හැම ක්‍රියාවක්ම අවසානයේ සංකේන්ද්‍රණය වෙන්නේ ලිංගිකත්වයටයි කියලා 'ගැනොන් මහත්මයා ලියපු වෛද්‍ය විද්‍යා භෞතවේදය කෘතියේ සඳහන් වෙනවා.


ඉතින් එහෙව් එකේ මේ ගැන හොඳ දැක්මක් සහ අවබෝධයක් ඇත්නම් ජීවිතේ තෘප්තිමත් කරගන්ඩ ලොකු පිටිවහලක් වේවි කියලා මම හිතනවා.කට්ටිය බලලා ඇතිනේ 'බ්ලූ ලැගූන්' කියන චිත්‍රපටිය.ඒකෙ දැක්වෙන විදිහටම තමයි ඇත්තටම ලිංගික සම්බන්ධයක් සඳහා පෙර දැනීමක් අවශ්‍ය නෑ.නමුත් තෘප්තිමත් ලිංගික සම්බන්ධයක් සඳහා හොඳ අවබෝධයක් තියෙන එක වැදගත්.ඒ වගේම සමහරුන්ට මේ අවබෝධය නිකම්ම ඇතිවෙන්නෙත් නෑ.ඒ නිසා තමයි බැඳපු අය ළමයි නෑ කියලා ක්ලින්ක් එකට ආවම ඒ අය නිසි ආකාරයෙන් ලිංගිකව එක්වෙනවද කියලා අපි හරියටම ප්‍රත්‍යක්ෂ කරගත යුතු වෙන්නේ.

හරි ඔන්න මම මූලිකම තැන ඉඳලා විස්තර කරන්ඩයි යන්නේ.සියල්ලම විස්තර නොවෙන්ඩත් පුළුවන්.එහෙම තිබුණොත් කොමෙන්ට් එකක් දාන්ඩ.මම හොයලා ඒ ගැන කියන්නම්.

ලිංගික සංසර්ගය කියන්නේ පිරිමියාගේ සෘජු වෙච්ච ශිෂ්ණය ගැහැනියගේ යෝනි මාර්ගයට ඇතුළු කිරීමෙන් ඇරඹෙන ක්‍රියාවලියක්.ඊට පස්සේ ඉන්පසු පුරුෂයාගේ හෝ ස්ත්‍රියගේ (බොහෝවිට පුරුෂයාගේ) කටී ප්‍රදේශය ඒ කියන්නේ උකුල් ප්‍රදේශය රිද්මයානුකූලව චලනය කිරීම මගින් ශිෂ්ණය යෝනි මාර්ගය තුලම ඉදිරියට හා පසුපසට චලනය කරවීම සිද්ධ වෙනවා.මෙහිදී පුරුෂයාගේ ශිෂ්ණ මුණ්ඩය ප්‍රදේශයේ ඇති ස්නායු අග්‍ර යෝනි බිත්තියේ ඇතිල්ලීම නිසා ජනනය වෙන ස්නායු ආවේග මොළය කරා ගමන් කිරීමෙන් පස්සේ තෘප්තිමත් එහෙම නැත්නම් සතුටුදායක හැඟීමක් මොළයේ ජනනය වෙනවා.

ඒ වගේම ස්ත්‍රියගේ යෝනි බිත්තියේ ඇති ඇදීමට සංවේදී ස්නායු අග්‍ර මෙන්ම අනෙකුත් සංවේදී ස්ථාන (පස්සේ විස්තර කරන්නම් ) උත්තේජනය වෙලා ඒ ස්නායු ආවේග මොළයට ගෙන ගොස් තෘප්තිය නම් හැඟීම ජනිත කරවනවා.

පුරුෂයාගේ සුරාන්තය හෙවත් Orgasm සිද්ධ වෙන්නේ ශුක්‍ර තරලය පිටත් වීමත් සමඟමයි.සුරාන්තය කියන්නේ ලිංගික තෘප්තියේ උච්චතම අවස්ථාව විදිහට හඳුන්වන්න පුළුවන්.පුරුෂයෙක්ට සාමාන්‍ය යෝනික සංසර්ගයකදී සුරාන්තයට පත්වෙන්ඩ ගතවෙන්නේ මිනිත්තු 4ක් විතර කියලා තමයි කියන්නේ.ඒත් ගැහැනු කෙනෙක්ට මේ සඳහා මිනිත්තු 10-15ක් විතර ගත වෙනවලු.මෙන්න මේ වගේ තැන්වලදි තමයි දැනුම අවශ්‍ය වෙන්නේ.ලිංගිකත්වය ඇත්තටම තියෙන්නේ ඊළඟ පරම්පරාව ජනිත කිරීමට උනාට මිනිස්සු ඒක පාවිච්චි කරන්නේ සතුට ලබා ගැනීමේ සහ එකිනෙකා අතර ලොකු බැඳීමක් ඇති කර ගැනීමේ මාර්ගයක් විදිහටයි.ඒකනේ අනිත් සත්තු බොහොමයකගේ ලිංගික ක්‍රියා වසරේ යම් කාලයකට සීමා වෙලා තිබුණට මිනිස්සු වසර පුරාම ලිංගිකව එක් වීම සිද්ධ වෙන්නේ.ඉතින් පිරිමියා තමන්ගේ තෘප්තිය ලබාගෙන අනිත් පැත්ත හැරිලා නිදා ගන්නවනම් ගැහැනියට ඒ තෘප්තිය ලැබෙන්නේ නැත්නම් ඇය කලකිරීමට පත්වීම හෝ වෙන තැනකින් ඒ සතුට සොයා යන්ඩ ඉඩ තියෙනවා.


එතකොට මේ ලිංගික ක්‍රියාව මේ කියන ශිෂ්ණ යෝනි සංසර්ගයට සීමා වෙනවද? අපෝ නෑ.මිනිස්සු මේ ක්‍රියාවට විකල්ප රාශියක් හොයාගෙන තියෙන්නේ.

ස්වයං වින්දනය

මළලසේකර ශබ්ද කෝෂයේ ස්වයං වින්දනය විස්තර කරන්නේ අතින් පිරිමැද කරන ශුක්‍ර මෝචනය කියලා.ඒ උනාට මේක ගැහැනුන්ටත් අදාලයි.අපේ සංස්කෘතියේ ගැහැනුන්ගේ කන්‍යාභාවයට ලොකු අවධානයක් තියෙන නිසා සහ ගැහැනුන් එවැනි ක්‍රියා කිරීම අශ්ලීල යැයි මතයක් ගොඩ නගා ඇති නිසාත් බොහොමයක් ගැහැනු ඒ ක්‍රියාවට යොමු වෙන්ඩ බියක් දක්වනවා.පිරිමින් බොහොමයක් ස්වයං වින්දනයේ යෙදෙන්නේ සිය අතින් ශිෂ්ණය අල්ලාගෙන අත ඉදිරියට සහ පසුපසට චලනය කරවීමෙන්.ගැහැනුන්ට මේ සඳහා ඔවුන්ගේ ක්ලිටොරිසය හෙවත් භගමණිය අතින් පිරි මැදීමෙන් මෙන්ම කන්‍යාභාවය නැති අයට යෝනි මාර්ගයේ ඉදිරිපස බිත්තියේ ඇතුල් පැත්තේ ඇති 'G ස්පොට්' ලෙස හඳුන්වන සංවේදී ස්ථානය පිරිමැදීමෙන් සහ ශිෂ්ණයට සමාන වෙනත් උපකරණ භාවිතයෙන් සුරාන්තයට එළඹෙන්න පුළුවන්.

ඒ සඳහා විවිධ වර්ගවල කෘත්‍රීම උපකරණ හදලා තියෙනවා.ලංකාවේ මේවා හොයාගන්න එක එච්චර පහසු නැති උනාට ලෝකේ අනිත් රටවල මේවා පහසුවෙන් ලබා ගන්ඩ පුලුවන්.මේ උපකරණ අතර කෘත්‍රිමව කම්පණය වෙන ඒවා වගේම ක්ලිටොරිසය උත්තේජනය කරන සහ G ස්පොට් එක උත්තේජනය කිරීම සඳහාම විශේෂයෙන් නිපදවූ උපකරණත් දකින්න පුළුවන්.

පිරිමින්ටත් කෘත්‍රීම යෝනි මිළදී ගන්ඩ පුළුවන්.ඒවාත් විවිධ වර්ගවලින් දකින්ඩ ලැබෙනවා.

දැන් මේවා ගැන කිව්වේ මේවා ලංකාවේ හොයාගන්ඩ අපහසු උනාට මේවා ලංකාවට අවශ්‍යයි කියන මතේ මම ඉන්න නිසා.මොකද මිනිස්සුන්ගේ ලිංගික අවශ්‍යතා නිසි ලෙස සැපිරුනේ නැති උනාම මානසිකව ආතතියක් නිර්මාණය වෙන්ඩ පුළුවන්.ගොඩක් වෙලාවට සමහරු සමාජයේදි පුපුරා හැලෙන්නේ මේ ලිංගික තෘප්තිය ප්‍රමාණවත්ව නොලැබීම නිසා වෙන්ඩ පුළුවන්.ඉතින් මේ ආතතිය වෙනත් විදිහකට පිට කරන්ඩ උත්සාහ කිරීම තුලින් වෙනත් සමාජීය ප්‍රශ්න නිර්මාණය වෙනවා වගේම ලිංගික අඩන්තේට්ටම් කිරීම් අපචාර ක්‍රියා ආදියටත් හේතුවක් වෙන්ඩ පුළුවන්.මේ කියන ස්වයං වින්දන ක්‍රමවේදය හැමදාටම පාවිච්චි කළයුතු දෙයක්ය කියලා මම කියන්නේ නෑ.ඒත් බිරිඳ දරු ප්‍රසූතියකට සූදානමින් ඉද්දි වගේම ඉන් පසුව ටික කාලයක් යනකං, හමුදාවේ ඉන්න සැමියා නිවාඩුවට ගෙදර එනකන් වගේම මැදපෙරදිග ගිය බිරිඳ ගෙදර එනකං වගේ අපි දකින ප්‍රයෝගික අවස්ථාවලට ස්වයං වින්දනය කියන්නේ බොහොම හොඳ විකල්පයක්.

ගුද රමණය

මේ කියන්නේ පුරුෂයාගේ ලිඟුව ස්ත්‍රියගේ හෝ වෙනත් පුරුෂයෙකුගේ ගුද මාර්ගයට ඇතුළු කිරීමෙන් සිදුකරන සංසර්ගයයි.යෝනි මාර්ගයට වඩා ගුද මාර්ගයේ ඇති තද භාවය සහ එම ක්‍රියාවේ ඇති අශ්ලීල භාවය සමහරුන් මේ ක්‍රමය වෙත යොමු කරවනවා.ඒ වගේම පිරිමි සමලිංගිකයින් ගුද මාර්ගය හරහා පුරස්ථිති ග්‍රන්ථිය උත්තේජනය කරවා ගැනීමටත් මේ ක්‍රියාව යොදා ගන්නවා.නමුත් මෙහිදී ගුද මාර්ගයේ මෙන්ම ශිෂ්ණයේ ද තුවාල ඇති වීම මෙන්ම ගුද මාර්ගය විශබීජවල තෝතැන්නක් වීම බොහෝ විට ලිංගිකව සම්ප්‍රේශනය වන වගේම වෙනත් සාමාන්‍ය මුත්‍රා ආසාදන වැනි තත්ත්ව ඇති කිරීමට සමත් වෙනවා.මෙහිදී පැවසිය යුතු කරුණක් වන්නේ සමාජ රෝගයක් බෝවීමේ අවධානම සාමාන්‍ය ශිෂ්ණ යෝනි සංසර්ගයකදී මෙන් 50 ගුණයක වැඩි වීමක් ගුද සංසර්ගයේදී තියෙනවා කියන එක.

මෞඛ සංසර්ගය

මෙහිදී පුරුෂයාගේ ලිංගය ස්ත්‍රිය විසින් තොල් හා දිව ආශ්‍රිතව උත්තේජනය කරනවා.එමෙන්ම ස්ත්‍රියගේ ක්ලිටොරිසය හා අනෙකුත් සංවේදී ස්ථාන පුරුෂයා සිය දිවෙන් හා තොල් ඇසුරින් උත්තේජනය කිරීමත් අයත් වෙන්නේ මේ කාණ්ඩයටමයි.මේ ක්‍රියාවෙන් ස්ත්‍රියක් සුරාන්තයට පත් කිරීමට ද හැකි නිසා ස්ත්‍රියකට උපරිම ලිංගික තෘප්තිය ලබා දෙන්න මේ ක්‍රමය භාවිතා කරන්ඩ පුළුවං.වැදගත්ම දේ තමයි ස්ත්‍රීන් සුරාන්තයට පත් උනාට පිරිමින්ට වගේ ලිංගික හැඟීම් නැතිවෙලා යන්නේ නෑ.ඒ අයට අවශ්‍යනම් පිට පිට සුරාන්ත කීපයක් උනත් ලබාගන්ඩ පුලුවන්.ඒ නිසා ශිෂ්ණ යෝනි සංසර්ගයට පෙර ස්ත්‍රිය සුරාන්තයට පත් කිරීම ඇය තෘප්තිමත් කිරීමේ හොඳ ක්‍රමයක්.මුඛ සංසර්ගයේදීත් සමාජ රෝග පැතිරීමේ අවධානමක් තියෙනවා.ඒක නිසා තමයි විවිධ රසවලින් සහ සුවඳින් යුක්ත කොන්ඩම් (උපත් පාලන කොපු ) නිර්මාණය කරලා තියෙන්නේ.

කළවා අතර සිදු කරන සංසර්ගය

මෙහිදී ස්ත්‍රියගේ කළවා අතරට යම් ලිහිසි කාරකයක් දමා එකට ළං කළ කළවා අතරින් ශිෂ්ණය ගමන් කරවා සංසර්ගයේ යෙදෙනවා.මේ ක්‍රියාව බොහෝ විට සිද්ධ කරන්නේ ස්ත්‍රියගේ කන්‍යාභාවය රැක ගැනීමට සහ දරු පිළිසිඳීමක් වළක්වා ගැනීමට.මේ වගේම පියයුරු අතර ශිෂ්ණය තබා සංසර්ගයේ යෙදීමත් දකින්ඩ පුළුවන්.මේ කුමන ක්‍රමය භාවිතා කලත් යෝනි මාර්ගය අවට ශුක්‍ර තරලය ගෑවීමෙන් දරු පිළිසිඳ ගැනීමක් සිද්ධ වෙන්ඩ පුළුවන්.ඒ නිසා ඒ ගැනත් සැළකිලිමත් වෙන එක හොඳයි.

සමලිංගිකත්වය මානසික රෝගයක් විදිහට දැං සැලකෙන්නේ නෑ.ඒ උනත් එහෙම නොවෙන එක එහෙම වෙනවට වඩා හොඳයිනේ.ඒත් ඉතිං සමහරුන්ට එහෙම නැතුවම බැරි වෙනවා.ඉතිං එහෙම අය අනිත් අයව පොළඹවා ගන්නැතුව තමුන් වගේම වෙන කෙනෙක් හොයාගන්නවනං තමයි හොඳ.

එයිට අමතරව සතුන් එක්ක ලිංගිකව එකතු වීම සහ මෘත ශරීර සමඟ ලිංගිකව එකතු වීම ආදී මානසික රෝගමය තත්ත්ව ඇති අයත් සමාජයේ ඉන්නවා.අනිත් භයානකම කට්ටිය තමයි බාල අපරාධ සිද්ධ කරන්නන්.ඔවුන් කුඩා දරුවන් සිය ලිංගික අවශ්‍යතා සඳහා භාවිතා කරන්නේ කුඩා දරුවන්ගේ ප්‍රතිරෝධය අවම වීම නිසා වගේම මානසිකව ඔවුන් රෝගීන් වීම නිසයි.

කෙසේ වෙතත් ලංකාවේ ශිෂ්ණ යෝනි සංසර්ගය හැර අනෙකුත් සියළුම ආකාරයේ ලිංගික ක්‍රියා දණ්ඩ නීති සංග්‍රහයේ 365A වගන්තිය යටතේ නීතිය ඉදිරියේ වරදක්.ඒ කියන්නේ ස්වයං වින්දනය, ගුද රමණය, මෞඛ සංසර්ගය ආදී සියල්ලම අශ්ලීල ක්‍රියා ලෙස නම් කරලා දඬුවම් කරන්ඩ පුළුවන්.මේවා ආගමික බලපෑම් මත සෑහෙන කාලෙකට ඉස්සර සම්මත උනු නමුත් සංශෝධනය විය යුතු යල් පැනගිය නීති.නමුත් කවුරුත් ඒ ගැන අවධානයක් දක්වන්නේ නෑ.ඒ නිසා කරන දෙයක් පරිස්සමෙන් හොඳේ...

මේ රූපේ තියෙන්නේ ලිංගික ක්‍රියාවේදී භාවිතා වෙන ලිංගික ඉරියව් කීපයක්.ඒවා අතරින් මුලින්ම තියෙන ඉරියව්ව තමයි බහුලවම භාවිතා වෙන්නේ.තමංගේ සහකරු/සහකාරියගේ කැමැත්ත ඇතුව අනිත් ඕනෑම ඉරියව්වක් භාවිතා කළාට ගැටළුවක් නෑ.වැදගත්ම දේ තමයි අන්‍යොන්‍ය අවබෝධය.

වැදගත් විශයය....11 ( Sex Education in Sinhala )

ඔසප් චක්‍රය

බොහෝ ආගම් සහ සංස්කෘතිවල ස්ත්‍රීන්ගේ ඔසප් වීම අශුද්ධ දෙයක් විදිහටනේ සළකන්නේ.අනේ මන්දා ඉතිං රුධිරය එක්ක පටක ටිකක් තමයි පිට වෙන්නේ.ඒක ඉතිං තුවාලයක් තියෙන එකෙක්ටත් පොදුයි නොවැ.ඒ විදිහට බැලුවම ආගමික ස්ථානවලට, උත්සවවලට තුවාලකාරයින්ටත් සහභාගි වෙන්ඩ නොදී ඉන්ඩ ඕනෑ.

ඔසප් චක්‍රය, ආර්ථව චක්‍රය මේ කොයි විදිහට කිව්වත් කියවෙන්නේ එකම දෙයක් ගැන.ඒ ස්ත්‍රීන්ගේ ගර්භාශයේ ඇතුළු බිත්තිය සාමාන්‍යයෙන් දින 28කට පාරක් ගැලවිලා රුධිරය එක්ක පිටවෙලා යන එකට.

මේක ගෑනු ළමයි ලැජ්ජා හිතන්ඩ දෙයක්වත් පිරිමි අමුතු විදිහට බලන්ඩවත් අවශ්‍ය දෙයක් නෙමෙයි.මේක ස්වභාවධර්මයේ විශිෂ්ඨ ක්‍රියාවලියක්.ඒකෙන් බලාපොරොත්තු වෙන්නේ සෑම ඩිම්බයක්ම සංසේචනය වෙලා ආවොත් පැලවෙලා වර්ධනය වෙන්ඩ අබාධවලින් තොර සරු පටකයක් ලබා දෙන එක.

වටෙන් වටෙන් කියලා තේරුමක් නෑනේ.ඔන්න එහෙනම් පටං ගම්මු මේක ගැන හරියට කතා කරන්ඩ.

ගැහැනු අයගේ ජනක සෛල ඒ කියන්නේ ඊළඟ පරම්පරාව බිහි කරන්ඩ දායක වෙන සෛල හැදෙන්නේ ඩිම්බ කෝෂයේ කියලා දන්නවනේ.පිරිමින්ගේ වෘෂණවල දවස ගානේ අළුතෙන් ශුක්‍රාණු හැදුනට ඩිම්බ කෝෂවල ඩිම්බ එහෙම හැදෙන්නේ නෑ.ගෑනු දරුවෙක් ඉපදෙනකොට එයාගේ ඩිම්බ කෝෂවල ඩිම්බ විශාල ප්‍රමාණයක් තියෙනවා.හැබැයි මේවා පරිණත වෙලා නෑ.සංඛ්‍යාත්මකව කිව්වොත් ඉපදෙන්ඩ කළිං මිලියන 7ක් විතර වෙන මේ අපරිණත ඩිම්බ සංඛ්‍යාව විවිධ හේතු නිසා තෝරාගැනීම්වලට ලක් වෙලා ඉපදෙන කොට ඉතුරු වෙන්නේ මිලියන 2ක් විතර.මේ මිලියන දෙකෙනුත් බාගයක්ම වැඩ කරන්නේ නෑ.ඒ කියන්නේ හොඳ ඒවා ඉතුරු වෙන්නේ මිලියන එකක් විතර.මේ ඩිම්බ ඌණන විභාජනයෙන් බෙදිලා පරිණත වෙලා එපායෑ සංසේචනය වෙන්ඩ.ඉතිං ඒවා මුල් කාලෙම පරිණත වීමේ පළමු පියවර තියනවා.ඒ කියන්නේ ඌණන විභාජනයේ මුල් අවස්ථාවකට ඇවිල්ලා නවතිනවා.මේ ඌණන විභාජනයේ අවස්ථාවට කියන්නේ 'ප්‍රාග් කලාව' කියලා.මේකෙදි ඩිම්බ සෛලයේ වර්ණදේහ සංඛ්‍යාව දෙගුණ වෙලා ලෑස්තිවෙලා ඉන්නවා වාරය ආව ගමන් ඉතුරු ටික කරගෙන යන්ඩ.


ඔන්න ඉතිං ඔය විදිහට ඩිම්බ තියෙන වගක්වත් දන්නැතුව ගෑනු දරුවො වැලිබත් උයනවා, බෝනික්කො නලෝනවා, මොන්ටිසෝරි යනවා, ඉස්කෝලෙ යනවා අර මෙව්වා දවස එනකං.අන්න එදාට මේ කෙල්ලව ලෝකෙං වහලා කාමරේකට දාලා හංගගෙන උපදෙස් දෙනවා කොල්ලො ආශ්‍රය කරන්ඩ එපා, දැං ඉතිං පරිස්සං වෙන්ඩ, ලෝකෙ හරි කෲරයි, උඹ මලක් වගෙයි ආදී විදිහට.ඔන්න ඉතිං උදේ පාන්දර නාවලා, කොස් අත්තකට කැත්තෙං කොටලා, නාවපු කළෙත් බිඳලා, අළුත් රත්තරං කරාබු ජෝඩුවක් එහෙම දාලා ගමටම කියලා හෙන උත්සවයකුත් ගන්නවා.මේ උත්සවයේ අරමුණ විදිහට මම දකින්නේ 'ඔන්න බොලව් අපේ එකී දැං බඩ වෙන්ඩ ලෑස්තියි.ඇහැක් එකෙක් ඉන්නවානං ඇන්න පලයවු' කියලා කෑගහලා කියන්නැතුව කියන විදිහ කියලා.

මේ විදිහට පළමු ඔසප් රුධිරය පිට වීමට මල්වර වීම, ලොකු ළමයෙක් වීම, ගෙට වීම වගේම සමහර පැතිවල *ක මල පීදීම කියලත් කියනවා කියලයි සන්නස්ගල සර් කියලා දුන්නේ.ඔය ඉතිං මගෙත් සිහිය වෙන වෙන පැතිවලටමනේ යන්නේ.කොහොම හරි මේ වෙද්දි ඒ කියන්නේ මල්වර වෙනකොට ඩිම්බ ඉතුරු වෙලා තියෙන්නේ ලක්ෂ තුනක් විතර.

ඔසප් චක්‍රය සාමන්‍යයෙන් දවස් 28ක චක්‍රයක් විදිහට සැළකුවාට ඒක දවස් 21-35 අතර වෙනස් වෙන්ඩ පුළුවන්.ඒ වගේම ඔසප් රුධිරය පිට වීම සාමාන්‍යයෙන් දවස් 3-5 අතර පැවතුනාට දවස් 1-8 අතර රුධිරය පිටවීම සාමාන්‍යයි කියලයි සළකන්නේ.දවස් 8ට වැඩිනම් පොඩ්ඩක් සළකලා බලන්ඩ.ඔසප් රුධිරය පිට වීම සාමාන්‍යයෙන් ඉතා සුළු බින්දු කිහිපයක සිට මිලි ලීටර් 80ක් විතර වෙනකන් වෙනස් වෙන්ඩ පුළුවන්.ඒ වගේම ඔසප් රුධිරයත් එක්ක රුධිරය කැටි ගැසීම වලක්වන රසායනිකයක් පිට වීම නිසා රුධිරය කැටි ගැහෙන්නේ නෑ.එහෙම නැත්තං ඔසප් රුධිරයට පිට වෙන්ඩ බෑනේ.ඒ නිසා ඔසප් රුධිරය එක්ක රුධිර කැටි පිට වෙනවා කියන්නේ අධික රුධිර වහනයේ ලක්ෂණයක්.මොකද අර ප්‍රථිකැටිකාරකයේ ක්‍රියාකාරීත්වයේ සීමාවට වැඩියෙන් රුධිරය පිට වෙනවා කියන එකනෙ.


ඔසප් චක්‍රයක පළවෙනි දවස විදිහට සාමාන්‍යයෙන් අපි සළකන්නේ ඔසප් රුධිරය පිටවීම ආරම්භ උන දවස.ඒක නිසා මේක සිද්ධවෙන විදිහ ගැන කතා කරන්ඩ ඒ තැනින් පටං ගම්මු.හැබැයි ඔසප් චක්‍රයකදී ඩිම්බකෝෂයේත්, ගර්භාශයේත් වගේම ඇඟේ හෝමෝන මට්ටමේත් වෙනස්කම් සිද්ධ වෙනවා.ඒ නිසා ඒ ඔක්කොම ගැන සරළව කතා කරගෙන යමු.

ඔන්න ගර්භාශයේ එන්ඩොමෙට්‍රියම බිඳවැටිලා රුධිරය සහ පටක කොටස් යෝනි මාර්ගය හරහා පිට වෙලා යනවා.ඔන්න මේ කාලෙම ඩිම්බකෝෂයේ අර අපරිණත ඩිම්බ කීපයක් පරිණත වෙන්ඩ පටන් ගන්නවා.මේ ඩිම්බ තියෙන්නේ ශුක්‍රාණු වගේ තනියම නෙමෙයි.ගෑනු කොහොමත් ඉන්නේ ආරක්ෂාවට වටේට මුර දාලනේ.ඩිම්බයත් ඒ වගේම තමයි.ඩිම්බය වටේට පුංචි සෛල රාශියක් එකතුවෙලා හැදිච්ච ආවරණයක් තියෙනවා.මේ ඩිම්බය පරිණත වෙනකොට මේ සෛල ආවරණයේ තැනක පොඩි කුහරයක් හැදිලා ඒක ඇතුලේ තරලයක් එකතු වෙන්ඩ පටං ගන්නවා.පස්සේ මේ කුහරය සෑහෙන්ඩ ලොකු වෙනවා.ඒ කියන්න අල්ට්‍රාසවුන්ඩ් ස්කෑන් එකකිං බලාගන්ඩත් පුළුවං.මේ විදිහට කුහරයක් හැදිච්ච ඩිම්බයක් ඇතුලත් ව්‍යුහයට කියන්නේ ස්‍යුනිකාවක් කියලා.

අපේ මොළයේ තියෙන හයිපොතැලමසයේ සහ පිටියුටරියේ නිපදවෙන හෝමෝන යටතේ ශරීරයේ අනිකුත් බොහෝ හෝමෝන පාලනය වෙනවා කියලා කලිං ලිපියක කිව්වා වගේ මතකයි.ඔන්න මේ හයිපොතැලමසයෙන් GnRH කියලා හෝමෝනයක් නිදහස් වෙනවා.මේ හෝමෝනය මගින් පිටියුටරියෙන් FSH සහ LH කියන හෝමෝන නිපදවෙන එක උත්තේජනය කරනවා.මේ FSH ගිහිල්ලා ඩිබකෝෂ මත වැඩ කරලා තමයි ස්‍යුනිකා නිපදවීම සහ ඒ ස්‍යුනිකා මගින් හෝමෝන නිපදවීම උත්තේජනය කරන්නේ.

ඉතිං මේ විදිහට එක ඔසප් චක්‍රයකට ස්‍යුනිකා කීපයක් වර්ධනය වෙන්ඩ පටං ගන්නවා.මේ ස්‍යුනිකා වල වටේ තියෙන සෛල ස්ථරයෙන් ඊස්ට්‍රජන් කියන හෝමෝනය වැඩිපුරත් ප්‍රොජෙස්ටෙරොන් කියන හෝමෝනය ස්වල්ප වශයෙනුත් නිශ්පාදනය කෙරෙනවා.මේ ඊස්ට්‍රජන් මගින් ගර්භාශයේ එන්ඩොමෙට්‍රියමේ සෛල ගුණනය වෙලා එන්ඩොමෙට්‍රියම නැවත වර්ධනය වෙන එක උත්තේජනය කරනවා.ඊට අමතරව මේ ඊස්ට්‍රජන් ගිහිල්ලා පිටියුටරිය සහ හයිපොතැලමසය මත ක්‍රියා කරලා LH ස්‍රාවය වීම අඩු කරනවා.ඊට අමතරව තව ඉන්හිබින් කියලා හෝමෝනයක් හැදෙනවා මේ එක්කම ඩිම්බකෝෂවල.ඒකෙන් ගිහිල්ලා FSH ස්‍රාවය වීම පාලනය කරනවා.

මේ හැදෙන ස්‍යුනිකා කීපයෙන් එකක් විතරක් අන්තිමට ඉතුරු කරගෙන අනිත් ඒවා සාමාන්‍යයෙන් විනාශ වෙලා යනවා.මේ විදිහට ඉතුරු වෙච්ච ස්‍යුනිකාව හොඳටම පරිණත වෙනවා.මේ පරිණත ස්‍යුනිකාවට කියන්නේ ග්‍රාෆීය ස්‍යුනිකාව කියලා.ඒකෙන් ඊස්ට්‍රජන් විශාල ප්‍රමාණයක් ස්‍රාවය කරනවා.මේ ස්‍යුනිකාවේ තියෙන ඩිම්බ සෛලයේ න්‍යෂ්ඨිය ඌනන විභාජනයේ පළමු පියවරෙන් බෙදෙනවා.බෙදිලා න්‍යෂ්ඨි දෙකක් හැදෙනවා.ඒක න්‍යෂ්ඨියක් සෛලයෙන් පිටතට තල්ලු වෙලා යද්දි අනිත් න්‍යෂ්ඨිය විතරක් සෛලය ඇතුලේ ඉතුරු වෙනවා.මේ ඩිම්බ සෛලය ඌණන විභාජනයේ දෙවෙනි පියවරේ අතර මැද්දේ නතර වෙනවා.මේ අදියරට කියන්නේ ඌණන විභාජනයේ දෙවෙනි පියවරේ යෝග කලාව කියලා.

ඊස්ට්‍රජන් මගින් LH ස්‍රාවය කරන එක අඩු කරනවා කිව්වනේ.ඒකත් ඇවිල්ලා හරියට කොල්ලෙක් යාලු වෙන්ඩ අහද්දි කෙල්ල බෑ කියනවා වගේ වැඩක්.කොල්ලා නිකං ඇවිල්ලා ඇහුව ගමං 'බෑ' කියලා කෙල්ල කියනවා.කොල්ලා ඊළඟට චොක්ලට් එකක් අරං එනවා.ඒත් බෑ කියනවා.ඔය විදිහට කොච්චර බෑ කිව්වත් කොල්ලා අත අරින්නෙම නෑනේ.එතකොට කෙල්ලගේ හිතේ දෙගිඩියාවක් එනවා.කොල්ලා ගැන පැහැදීමක් එනවා.ඔන්න එක දවසක කෙල්ල පැනපු ගමං 'හා' කියනවා.මේ හොමෝන වැඩෙත් ඒ වගේම තමයි.මුලිං ඊස්ට්‍රජන් තියෙද්දි LH ස්‍රාවය අඩු වෙනවා.ඒත් ඊස්ට්‍රජන් එන්ඩ එන්ඩ වැඩි වේගන යද්දී LH ස්‍රාවය අඩුවෙන්නැතුව එක පාරටම වැඩි වෙන්ඩ පටං ගන්නවා.ඒ කියන්නේ ඊස්ට්‍රජන් පොඩ්ඩක් තියෙද්දි LH ස්‍රාවය අඩු කළා වගේම ගොඩක් තියෙද්දි LH ස්‍රාවය වීම වැඩි කරනවා.

මෙන්න මේ වෙලාවේ වැඩිපුර තියෙන LH වල ක්‍රියාකාරීත්වයෙන් ඩිම්බකෝෂ බිත්තිය සහ ස්‍යුනිකා බිත්තිය පුපුරලා ඩිම්බය උදර කුහරයට නිදහස් වෙනවා.මේකට තමයි කියන්නේ ඩිම්බ මෝචනය කියලා.මේක සාමාන්‍යයෙන් සිද්ධ වෙන්නේ දවස් 28ක ඔසප් චක්‍රයකනං 14 වෙනි දවසේ විතර.ඉතිං මෙච්චර දවසක් ඩිම්බකෝෂවල තිබුනේ ස්‍යුනිකා හින්දා ඔසප් වීමේ සිට මේ ඩිම්බ මෝචනය දක්වා අවධියට 'ස්‍යුනිකා අවධිය' කියලා කියනවා.ඒ වගේම ඊස්ට්‍රජන්වල ක්‍රියා කාරීත්වය යටතේ ඔසප්වීම නතර උනදා ඉඳං ගර්භාශ බිත්තිය වර්ධනය උන හින්දා ඔසප් වීම නතර උන දා ඉඳං ඩෛම්බ මෝචනය දක්වා කාලයට 'ප්‍රගුණන අවධිය' කියලත් කියනවා.

ග්‍රාෆීය ස්‍යුනිකාව පුපුරලා ඩිම්බය පිට උනාට පස්සේ ස්‍යුනිකාවේ ඉතුරු වෙච්ච සෛල ටික එකතු වෙලා ඩිම්බ කෝෂය ඇතුලේ 'පීත දේහය' කියන ව්‍යුහය බවට පත් වෙනවා.මේ පීත දේහය ඊස්ට්‍රජන් අඩුවෙනුත් ප්‍රොජෙස්ටෙරොන් වැඩිපුරත් ස්‍රාවය කරනවා.

මේ ප්‍රොජෙස්ටෙරොන්, ඊස්ට්‍රජන් වල ක්‍රියාකාරීත්වයෙන් වර්ධනය වෙලා තියෙන ගර්භාශයේ එන්ඩොමෙට්‍රියමේ ක්‍රියා කරලා ඒකේ රුධිර නාල වැඩි කිරීමත්, ඒ රුධිර නාල විශාල කිරීමත් දඟර ගැසීමෙන් වැඩි රුධිර පරිමාවක් එන්ඩොමෙට්‍රියට ලැබීමටත් සලස්වනවා.එයිට අමතරව එන්ඩොමෙට්‍රියමේ ඇති ග්‍රන්ථි සංඛ්‍යාවෙන් වැඩි කරලා ඒවා ප්‍රමාණයෙන් විශාල කරලා ඒවායේ ස්‍රාවයන් වැඩි කිරීමත් සිද්ද කරනවා.

පීත දේහයට සුද්දෝ කියන්නේ කෝර්පස් ලුටියම් (corpus luteum) කියලා.ඒක හින්දා ඒක තියෙන අවධියට 'ලුටීය අවධිය' කියලා කියනවා.ඒ වගේම එන්ඩොමෙට්‍රියමේ ග්‍රන්ථි මගින් ස්‍රාවයන් නිකුත් කරන නිසා මේ අවධිය 'ස්‍රාවීය අවධිය' කියලත් කියනවා.

මේ වෙද්දි රුධිරයේ ප්‍රොජෙස්ටෙරොන් ප්‍රමාණය ඉතාමත් ඉහලයි.ස්‍යුනිකාව විනාශ උනාට පස්සේ ඊස්ට්‍රජන් ප්‍රමාණය තරමක් අඩු උනත් සාමාන්‍යයෙන් ඉහල මට්ටමක පවතිනවා.ඉන්හිබින් සහ ඊස්ට්‍රජන්වල බලපෑම නිසා FSH සහ LH පහල මට්ටමකයි පවතින්නේ.මේ වෙද්දි තරමක් පහල ගිය ඊස්ට්‍රජන් මට්ටම නැවතත් LH ස්‍රාවය අඩු කරන්ඩයි දායක වෙන්නේ.

ඔසප් චක්‍රයේ දවස් 28 පමණ වෙනකොට පීත දේහය බිඳ වැටෙනවා.එතකොට ඊස්ට්‍රජන් සහ ප්‍රොජෙස්ටෙරොන් මට්ටම සීඝ්‍ර ලෙස පහල වැටෙනවා.


ඒ එක්කම ඊස්ට්‍රජන් සහ ප්‍රොජෙස්ටෙරොන් මගින් පවත්වාගෙන ගිය ගර්භාශයේ එන්ඩොමෙට්‍රියමත් බිඳ වැටෙනවා.ඒකේ තිබුණු රුධිර වාහිනී බිඳ වැටීම නිසා රුධිරය පිට වෙනවා.මේ රුධිරයත් එක්ක එන්ඩොමෙට්‍රියමේ කොටස් යෝනි මාර්ගය හරහා පිට වෙලා යනවා.

ඉතිං මෙ විදිහට බැලුවම ඔසප් වීමක් කියන්නේ එක් ඩිම්බමෝචනයක් සිද්ධ වෙලා ඒක සංසේචනය නොවීම නිසා සිද්ධ වෙන සංසිද්ධියක්.සංසේචනය උනානං මෙයිටවඩා වෙනස් විදිහකටයි සිද්ධ වෙන්නේ.ඒ ගැන පස්සේ බලමු.මට කියන්ඩ ඕනෙ කළේ ගැහැනු ළමයෙක් මල්වර වෙන්ඩ කලිං ලිංගික සම්බන්ධතාවයක් පැවැත්වුවත් ගැබ් ගන්ඩ ඉඩක් තියෙනවා කියන එක.මොකද ඒ ළමයා ඒ වෙද්දි ඩිම්බ මෝචනයක ඉන්ඩ පුළුවං නේ.නමුත් බොහෝ වෙලාවට මුල් ඔසප් වීම් සිද්ධ වෙන්නේ ඩිම්බ පිට වෙන්නේ නැතුව.

++++++++++++++++++++++++++++++++++++++++++++++++++++++++++++++++++++++++

ඕනෑම ගැටළුවක් කොමෙන්ට් එකකින් අහන්ඩ.දන්න එකක්නම් කියන්නම්.නැත්තං හොයලා හරි කියන්නම්.

ඇනෝ ඇවිත් කොමෙන්ට් දාන්ඩ කිසි අවුලක් නෑ.හැබැයි බොරුවට නිකං කුණුහබ්බ දාන්ඩ එපා හරි නෑනේ.