12 August 2019

සතුටෙන්ම හිටපු මිනිසා 4






ආදම් හදපු ගෙදරට ඊවා කැමති උනේ නෑ. හදපු තැන්, හදපු විදිහ, කාමර ගාණ (අමුත්තෙක් ආවොත් නවතින්න දෙන්න කාමරයක් ඕනේ කියලා ඊවා ආදම්ගේ ඇඟට කඩං පැන්නා. එහෙම එන්ඩ වෙන කවුරුත් මේ ලෝකේ නෑ කියලා ආදම් කිව්වත් ඒක ඊවාට එක්කො ඇහුනේ නෑ. නැත්තං ඇහුංකං දෙන්ඩ එයැයිට උවමනාවක් තිබ්බේ නෑ.) නාන කාමරය, කුස්සිය, ගාපු පාට, වහලෙට දාපු ඇස්බැස්ටෝස් (ඒවා පිළිකාකාරකයි කියලයි ඊවා කිව්වේ. "තමුසේ හදන්නේ මාව මරාගෙන මෙතන වෙන එකියක් එක්ක නටන්ඩ නේද?" කියලයි ඊවා ආදම්ට බැන්නේ. එහෙම නටන්ඩ වෙන ගෑනු මේ ලෝකේ නෑ කිව්වත් ඒක ඊවා කනකට ගත්තේ නෑ.) , බිත්තිවල පාට, පොළොවේ ටයිල් එක ඇතුළු සම්පූර්ණ ව්‍යාපෘතියම අසාර්ථක, මුදල් නාස්ති කරපු සුදු අලියෙක් කියලයි ඊවා චෝදනා කළේ. අසරණ ආදම් සුදු අලි දැකලා තිබ්බේ නෑ.

කොහොම හරි දෙන්නගේ මංගල වලිය රෑ එළිවෙනකං ඇදිලා යද්දි ස්වර්ගය පැත්තෙං හීං හිනා හඬක් ආදම්ට යාන්තමට වගේ ඇහුනා. ඔය කට්ටිය රෙස්ලිං බලලා හරි නැත්තං ඉන්දියන් මෙගා බලලා හරි ගන්න ආතල් එක එයාලා අපේ දිහා බලං ගන්නවා ඇති කියලා ආදම්ට හිතුනා. ඒත් කරන්ඩ දෙයක් නැති නිසා ආදම් කරබාගෙන හිටියා.

ඊවා හිටියේ පරල වෙලා. උන්දෑ වලිය අවසන් භාගය වෙනකොට අසරණ ආදම්ගෙන් දික්කසාදේ ඉල්ලන ගානටම ආවා. ආදම්ට සිද්ද උනා ඊවාගේ කටහඬට ඉහලින් කතා කරලා තවම නීතිඥයෝ සහ උසාවි මවලා ඉවර නැති බව ඊවාට පැහැදිලි කරළා දෙන්න.

කොහොම උනත් ඒ වෙද්දිත් හති වැටිලම ඊවාටත් වලිය එපා වෙලා තිබ්බ නිසා උන්දෑ නිදාගන්ඩ ගියා. ආදම් ටීවී එක දාගත්තේ හිත පොඩ්ඩක් එකලාසයක් කරගන්ඩ හිතාගෙන මිසක් මොකවත් බලන්ඩ උවමනාවකට නෙමෙයි.
"තමුසෙ ඕක එක්කො අඩු කරනවා නැත්තං මම ඇවිත් ඕක පොළවේ ගහනවා" නිදන කාමරේ පැත්තෙං ආයෙමත් ගෝරනාඩුව ඇහුනම ආදම් ටීවී එකත් නිමලා දාලා ගෙයින් එළියට බැස්සා.

හඳ එළිය වැටිලා පාරාදීසෙම ශාන්ත දිස්නයක ගිලිලා. ආදම්ගේ හිතත් ටික ටික නිමිලා යනකොට ඔන්නොහෙ කොහෙහරි වැටිලා නිදාගන්ඩ හිතුනා. නිල් අහස් වියන තැනින් තැන පසාරු කරගෙන දිලිසෙන තරු දිහා බලාගෙන ආදම් බිම වැතිරුනා. වැළමිටි පාරක්, දණිස් පාරක් වැදෙන්නැතුව කාලෙකට පස්සේ නිදාගන්න ආදම්ට බිම තිබ්බ රළු ගතියවත් දැනුනේ නෑ. නිදාගෙන ඉන්න ආදම්ගෙ නහය තදකරලා අල්ලගෙන හුස්ම හිරකරවලා ඇහැරවන්නෙ අසරණය ආදම් ගොරවන සද්දෙට ඊවා ඇහැරුනාම. හැබැයි ඊවා නින්දෙන් ගොරවන එක ඉවසගෙන ඉන්න ආදම්ට සිද්ද වෙලා තිබ්බේ මොන විදිහකින්වත් ඊවා නින්දෙන් ගොරවනවා කියන එක ඊවාට ඒත්තු ගන්නන්න ආදම්ට බැරි වෙච්ච නිසා.
"අනේ නිකං ඉන්නවා බොරු කියන්නැතුව. මම කොහෙද නින්දෙං ගොරවන්නේ. තමුසේ ගොරවන ගෙරවිල්ලට මට නින්ද යනවයෑ මම නින්දෙන් ගොරවන්න." මේවට තර්ක කරලා පලක් නැති විත්තිය ආදම් තේරුම් අරගෙනයි තිබුනේ.

හිතේ සැනසිල්ලත් එක්කම ආදම්ට නොදැනිම නින්ද ගියා.

උදේ පාන්දර ඇහැරවන්නත් කවුරුත් නැති හින්දා ආදම් නැගිටිනකොට හොදටම දවල් වෙලා. බඩගින්නකුත් එක්ක නැගිට්ට ආදම් පළතුරු ටිකක් කාලා වතුර ටිකක් එහෙම බීලා ගෙදර පැත්තට යන්න පිටත් උනේ දෙගිඩියාවෙන්.ගෙදර ගියොත් ආයෙත් වළියක් යයිද?




ඊවා ඊයේ කෑගහපු විදිහටනං මේ වෙනකොටත් අලවංගුවක් කුළුගෙඩියක් හොයාගෙන ගේ කඩන්ඩ පටං අරං ඇති. සමහරවිට දැනටමත් බිත්ති පෙරළලා ෆවුන්ඩේෂන් එක උගුල්ලන්න ට්‍රයි කරනවා ඇති. දැං ඉතිං ආයේ හොයපල්ලකො බාස්ලා. බාසෙක් අල්ලගෙන වැඩක් කරගන්ඩ යනකොට බාසා කියන්නේ
 "අයියෝ මහත්තයා මේක ලස්ස දෙකෙං දෙකාමාරෙං කරලා දාන්ඩ පුලුවං. දවස් පහේ වැඩේනෙ." බාස් එහෙම කියන්නේ කටේ තියෙන බුලත් කෙළ බිමට වැටෙන්නැති වෙන්න කට උඩට හරව හරවා. කොහොම උනත් අන්තිමට වැඩේ ඉවර වෙනකොට ලක්ෂ විස්සක් තිහක් විතර වටේට ණයත් වෙලා තමයි නවතින්නේ. මේවා මතක් වෙද්දි ආදම්ගේ ඇඟේ හිරිගඩුත් පිපුණා. ආදම් ගේ තියෙන තැනට කිට්ටු වෙනකොට කන දීලා බැලුවේ බිත්ති පෙරළෙන ටයිල් කඩන සද්දයක් එනවද කියලා. ම්ම්හු.. මොන සද්දයක්වත් නෑ. මෙන්න බොලේ ගේ තියෙනවා කිසිම වෙනසක් නැතුව.

යකෝ මේ ගෑනි කොහේ ගිහිල්ලද? අම්මෙක් අප්පෙක් හිටියානං එහෙ ගිහිල්ලා කියලවත් හිතන්ඩ තිබ්බා. මම යනකං ඉඳලා සෞදියේ හවුස් මේඩ් ජොබකටවත් ගියාද? ආදම්ට හිතාගන්න බෑ. එක පාරටම පිටිපස්සෙං ඇවිල්ලා ආදම්ගේ ඉහේ ඉඳං යටිපතුල් වෙනකල් කිටි කිටියේ වෙලා ගත්තම ආදම් හිතුවේ පිඹුරා විහිළුවක් කරනවා කියලා.ඒත් "ඉහි ඉහි....බුහු බුහු....ඈ......" කියලා සද්දයක් ආවේනං පිඹුරගෙන් වෙන්ඩ බෑ.. ආදම් අතපත ගාලා යන්තං දරණුව පොඩ්ඩක් බුරුල් කර ගත්තා.

බොලේ මේ ඊවා නේද? ඊවාගෙන් ආපු නැචුරල් සුවඳින් ඈ දත්මැදලා මූණහෝදලාවත් නෑ කියලා ආදම්ට තේරුණා.

"ඇයි මොකෝ? මොකෝ මේ බය වෙලා? කැරපොත්තෙක් මකුළුවෙක්වත් ආවද?"

"ඔයා කොහෙද මාව දාලා ගියේ? මම කොච්චර බය උනාද? මම කොහොමද උයා නැතුව ඉන්නේ? මං ඔයාට මොනවා කළාටද මට මෙහෙම සළකනෙනේ? කතා කරන්ඩකෝ. කියන්ඩකෝ? ඔයාට මාව එපාද? " ඊවාගේ ප්‍රශ්න අතරේ ආදම්ට උත්තර දෙන්ඩ හිස්තැන් අවකාශ තිබ්බේ නැති නිසා ආදම් ඊවාට හති වැටෙනකං බලං හිටියා.

"එහෙම මොකුත් නෑ. මම ඊයේ පොඩ්ඩක් ඇවිදින්න ගියා. නිකං ගහක් යට නිදාගත්තා. ඇහැරුනේ දවල්වෙලා. ඒකයි එන්න පරක්කු උනේ." ආදම් ඊවගේ කොණ්ඩ බූසිය අස්සෙං යන්තං වචන ටික පිට කරගත්තා.

"බොරු කියන්ඩ එපා.ඔයාට දැං මගෙං වැඩක් නෑනේ. ඔයා වෙන ගෑනියෙක් ගාවට ගියා නේද? ඔව් මම දන්නවා ඔයාට වෙන ගෑනියෙක් ඉන්නවා. ඔය ඒකිගේ සැන්ට් එකේ සුවඳත් එන්නේ. ඇයි ඔයා මට මෙහෙම කරන්නේ? මම මොන වරදක් කළාටද දෙයියනේ?" ඊවා වැළහින්නක් වගේ අඬන්න ගත්තා.

"මේ ලෝකේ වෙන ගෑනු නෑනෙ. ඉන්නේ ඔයා විතරනේ. ඇයි ඉතිං ඔයවගේ අභූත චෝදනා කරන්නේ?"

" නෑ මම දන්නවා ඔයාගේ වෙන සම්බන්ධයක් තියෙනවා. නැත්තං මේ මාවා තනියම ගෙදර දාලා පිට ගිහිල්ලා ඉන්නවද? මට මොනවා හරි උනත් ඔයාට ගාණක් නෑ."

" ඔයාට කාගෙන් මොනවා වෙන්නද? මේ ලෝකෙ ඉන්නේ ඔයයි මමයි විතරයි. අනිත් සත්තු ඔක්කොම අපේ යටතේ ඉන්නේ. ඔයා මොකාටද බය වෙන්නේ. අනික දැං මම  එක පාරකුත් කිව්වා මේ ලෝකේ වෙන ගෑනු නෑ. ඒ නිසා බොරු චෝදනා කරන්න එපා."

"වෙන ගෑනු නෑ......  තමුසෙ තව මට බොරු කියන්ඩත් එනවද? කෝ හැරෙනවා මේ පැත්ත."

"මොන හු......." ආදම් උඩ ගියේ ඊවා ඉළේට ඇඟිල්ලෙන් ඇන්න නිසා.

"ඔන්න බලනවා මේ පැත්තේ දොළහයි අනිත් පැත්තේ දොළහයි." ඊවා ආදම්ගේ ඉළ ඇට ගැන්නා.


" දැං මාව හැදුවේ වම් පැත්තේ ඉළ ඇටෙන් නං, කෝ දකුණු පැත්තේ දහතුං වෙනි ඉළ ඇටේ?"




3 comments:

  1. දැන් සේරම ටික මුල ඉඳන් කියවන්න වෙනවා!

    ReplyDelete

දාමුද සලිත වෙලා යන්ඩ කොමෙන්ටුවක්...