28 December 2012

අපිටත් ජොගිං ට්‍රැක් එකක්




විභාගය නිමා වීමේ ප්‍රීතියෙන් උද්දාමව කේවට්ටයා ජයගත් මහෞෂධයා මෙන් විජයග්‍රාහීව ගෙදර ආවෙමි.ගෙදර මිදුලට එද්දීම මොකක් නමුත් අවුලක් ඇති බව දැනුනේ නාසයටය.වසර ගණනාවකින් විඳ නුපුරුදු මිහිරි සුවඳ රැසක් කළවම් වී පොරකමින් මගේ නාසයෙන් ඇතුළුව මොළයේ විවිධ මතක උත්තේජනය කරන්නට යෙදුනේය.මම විජිතපුර ජයගෙන එන වේළුසුමනයා මෙන් එක් උරකින් ලැපත් අනි උරෙන් ඇඳුම් බෑගයත් රැගෙන දකුණු පය පෙරට තබා ගෙට ඇතුළු වීමි.

'කෑවනේ.කෑවනේ බූරුවා..........දුවේ මං උඹට කිව්වේ මේ උඹේ පොඩි එකාගේ මොළේ අඩුයි කියලා.එහෙව් උංවනේ ඉතිං විස්ස විජ්ජාලවලට තේරෙන්නේ.බලපං මගේ මේ තුනටියේ අමාරුවත් තියාගෙන පොලිස් කොරාපු බිම මේකා මේ මඩ සෙරෙප්පු දෙක දාං ඇවිත් ජරා කොළානෙව.' ආච්චිගේ ගෝරනාඩුව හමුවේ මම නැවතත් එළියට වීසි වීමි.

අම්මා කුස්සියේ ඉඳ ඇඳගෙන සිටි රෙද්දේ අත පිහදාමින් ආවාය.

'අම්මේ ඕකට කියලම ආයෙත් සුද්ද කොරවගන්ඩ.මම යනවා කුස්සියට කැවුම් ගෙඩිය රොස් වෙනවා.ඕකා කොහොමත් රටක් ආගමක් ජාතියක් ගැන කැක්කුමක් ඇති එකෙක් යෑ....'

බොලේ මේ එකෙකුටවත් මගේ විභාගේ ගැන අහන්ඩ කැක්කුමක් නැති හැටි අම්මපා ඇත්තට උඹ කාලද තේ එකක් හදන්ඩ ද කියලවත් අහපු නැති හැටි.ඇත්තමයි ආපහු යනවා හොස්ටල් එකට.ඒ උනත් හොස්ටල් එකේ ඉඳලා කරන්ඩ වැඩක් නැති හින්දාත් අතේ වියදමට සත පහක්වත් නැති හින්දාත් මම මේ ගැරහුම් මධ්‍යයේ ක්ෂාන්තිවාදී තවුසා මෙන් උපේක්ෂාවෙන් සියල්ල ඉවසා දරා සිටීමට තීරණය කර ගතිමි.

හොස්ටල් එකට, මරදානට, පුංචිබොරැල්ලට, වැසිකිළියට ආදී සෑම තැනකටම මා නොහැර මාත් සමගම ආ ගිය මගේ සෙරෙප්පු කුට්ටම එළියේ ගලවා තබා මම ගෙට ඇතුලු වීමි.අම්මා ගහයි හොකී පිත්තෙං කිව්වාලු ය.ගෙදර සුර විමනක් වගේ සරසලා ය.එද්මොන් දාන්තේගේ මොන්තක්‍රිස්තෝවේ ලෙන් ගුහාව වගේ මන්මත් කරවන සුළු යැ.නේත්‍ර පිනවන වර්ණාලේපිත යැ.මදය නැති මගේ පරණ ඩෙස්ක්ටොප් පරිගණකය අන්දවා සරසා අළුත්ම පරිගණක මේසයක් මත නැගැගෙන සාලයෙ එක් කොණකය.තවත් කොණක ඇඟ කෙට්ටු කරවන ටෙලිවිශනයේ විකුණන ඇබ්කිං ප්‍රෝ එකක් ය.ඒකත් එක්කම ආච්චී ඇඳ සිටි රෙද්දත් හැට්ටයත් අතරින් දැක පුරුදු එල්ලා වැටෙන බඩ වෙනුවට පැකැට්ටු හයේ බඩක් හෙවත් සික්ස් පැක් දැක මම විශ්මයෙන් භ්‍රාන්ත වීමි.


ආච්චිගේ මූණත් ටිකක් එළිය වැටී ඇති බවද මම දැක බලා ගතිමි.මේ අවස්ථාවේ අදහස් දැක්වීම නුවණට හුරු නැත.සික්ස් පැක් එක්ක ආච්චිගේ බයිසෙප්ස් ද හැදී ඇතුවා නිසැකය.නිකං දත් කඩා ගන්නවාට වඩා විමර්ශනය කොට අවබෝධයෙන් කටයුතු කිරීම මැනැවැයි සිතා ගෙන මම කාමරයට ඇතුල් වීමි.


කාමරයට දෙයියංගේම පිහිටය.අහෝ මගේ සමාජවාදී පොත් ටික ඔක්කෝම අතුරුදහන් වෙලාය.පොත් මේසයේ තිබූ කොවූර් මහත්තයාගේ පොත් දෙක ඉවත් කොට එතැන බණපොත් ගොඩ ගහලාය.පහුගිය සතියක උදළු ගාන්නට තරම් තත්ත්වයක තිබූ කාමරය දැං බිම බත් දාගෙන කන්ඩ හිතෙන තරමට අස් පස් කරලා සුද්ද පවිත්‍ර කරලාය.හොඳ දේවල නිකං නොලැබෙන බව සිතා මම හිත හදාගතිමි.

ගෙදර උං මේ ලැස්ති වන්නේ මොන ආකාරයේ මගඩියකට දැයි මට හිතා ගන්නට බැරිය.මේ මගේ කසාදයට ලෑස්ති වෙනවානම් වෙන්නට බැරිය.එහෙම උනානං මාව මෙච්චර නොසලකා හරින්නේ නැත.ටික වේලාවක් කාමරයේ සිරි නරඹා ඇඳුම් ගලවා ජාතික ඇඳුම නොහොත් සරමට බැස සාලයට ගිය විට දුටු දසුනින් මගේ හෘදය මොහොතකට නතර විය.මේ දකින සියල්ල එක්කොට ගංජා ගැසූවෙකුගේ සිහින කියා හෝ දිනුකගේ විශ්මලන්තය කියා පොතක් පල කිරීමට උවත් හැකිය.අම්මාත් ආච්චීත් දෙන්නාම සාලයේ එක්කෙනෙක් සීයාගේ හාන්සි පුටුවේත් අනෙකා සැටියේත් දිගාවී සිටිති.මූනේ කිරිද යෝගට් ද කොහෙද උලලා ය.ඇස්වල පිපිඤ්ඤා පෙති තියලාය.අබුද්දස්ස කාලේන කජ්ජේන පුහුලං කිව්වාලු ය.ඒ මදිවාට දෙන්නාම කෙහෙවලු වටා යෝධ තුවායක් බැගින්ද ඔතා ඇත.මිනිස්සු වැඩට ගිය කල්හී නුගසෙවන ඈ වැඩසටහන් නරඹා සිදුවන විපරීතයන් මේවායැයි මට සිතුනි.


'අම්මේ'

මම පාලනය කරගත් හඬින් මනා සංයමයකින් ආමන්ත්‍රණය කළෙමි.

'තව පැය භාගයක් යනකං මට හෙල්ලෙන්ඩ බෑ මෙතනිං.දැං ගිහිල්ලා ආච්චිගෙයි මගෙයි සාරි දෙකක් තියලා ඇති ඇඳ උඩ.ඒක අයන් කරපං.පරිස්සමෙන් අයන් කරපං දෙකම එහා ගෙදර කෙල්ලගෙං ඉල්ල ගත්තේ ඒකි වැඩට අඳින් ඒවා කිව්වා.පුච්චන්නේ එහෙම නෑ.'

අම්මා උනත් ගැහැනියක්ය.ගැහැනියකගේ අණට අකීකරු වීම තරම් නුනුවණ කමක් පිරිමියෙකුට තවත් නැත.

මට මෙව්වා අයන් කරනවා තබා මගේ ඇඳුමක්වත් හරියට අයන් කරගෙන පුරුදු නැත.අනික අත්කොට හැට්ට් අයන් කරන්නට ගොස් දෙපාරක් අතද පුච්චා ගතිමි.ගෑනු ඇඳුම් අඳින්නේ හැකි තරමක් ඇඟ පෙන්වීමටය.හැබැයි පිරිමින් ඒ දෙස බැලීම වනචරකමය.

මම ආපසු සාලයට යනවිට ආච්චී මූනේ කිරි තට්ටුව හූරමින් බල්ලාට දානවාය.බල්ලා ඌ ළඟට දැමූ කිරි දෙසත් ආච්චිගේ මූණ දෙසත් බලා අපුලෙන් පිඹිමින් යන්නට ගියේය.මම කල්යල් බලා අම්මාට කිට්ටු කළෙමි.

'අම්මේ දැං ආච්චිද අම්මද බඳින්ඩ යන්නේ?'

'නෙද්දකිං හිපාටු හිවලා. යකෝ අපි හැඩට ඉන්නවට උඹලා ඉරිසියයි නේද?ජේවීපී හැත්ත ඔක්කොම ඔහොමමයි.'

අම්මාගේ ගුණ වර්ණනාව අසා ආච්චීද කුස්සියට දුවගෙන ආවාය.ඇගේ වයසට ඔහොම දුවන්නට හොඳ නැත.කොහොමත් පපුවේ අමාරුවට බෙහෙතුත් ගන්නා නිසා හදිසියේවත් හෘදය අකර්මන්‍ය උවහොත් මම ඈ අල්ලා ගැනීමට සැරසුනෙමි.

'අහකට ගනිං උඹේ අත.හුහ්..උඹලා හිතාගෙන ඉන්නේ අපි වැටෙයි කියලා තමයි බොල.ඒ උනාට බලපියාපේ රජ්ජුරුවො වැටෙන්නෙත් නෑ අපි වැටෙන්නේත් නෑ.තොපි කොච්චර කතා කිව්වත් බලපං උන්නාන්සේ නොහිටින්ඩ තොපිට චන්දිරිකාවක් තියා අහස් ගුන්ඩුවක්වත් යවා ගන්ඩ ඇහැක්ද? උන්නාන්සෙගෙ පුතා ඔය වික්‍රමේ කොලේ තොපේ මහලොකු විස්ස විජ්ජාලෙට ගිහිල්ලද?අර ගෑනී සල්ලි කෝටි ගණං වංචා කොරලා අන්තිමට දෝසාබියෝගයක් ගෙනාවම තොපි ඒකටත් කතා කියනවනේ අම්මපා ඇත්තට.හැබැයි උන්නාන්සේ සැලෙන්නෙත් නෑ අපි සැලෙන්නෙත් නෑ අන්න ඒක දැනගනියව්.'

ආච්චි අනුර කුමාර දිසානායකට බණින්න තියෙන ටිකෙං මට බැන්නාය.මම කම්මුල අතගා බැලුවේ මගෙත් කම්මුලේ ඉන්නෙක් ඉන්නවද කියලාය.

'මොන පිස්සුද ආච්චි මම බණිනවද ඕවට.ඇත්තටම ආච්චි ඔය චන්ද්‍රිකාව යවලා මොකක්ද උනේ??'

'අපි කොහොමද බොල ඔය තාක්සනේ ගැන දන්නේ.ඒකේ මොකක් හරි ඒ උත්තමයන්ට වැඩක් ඇති.මේ උඹලා අපිට වැඩක් නැති උනාට'

'අනේ මංදා ආච්චී මම හිතුවා අඩුම තරමේ ඉන්ටර්නෙට් එකේ ස්පීඩ් එකවත් වැඩි වෙයි කියලා.මොකුත් උනේ නෑනේ.කමක් නෑ ඉතිං ඇත්තට අපි නොදන්න ඒ උන්නාන්සෙලට වැදගත් මොකක් හරි ඇතෑ.ඒ උනාට ආච්චී අර ගෑනු මනුස්සයා අයිං කරන්ඩ කළිං කොච්චරක් කට්ටිය ඉන්නවද අයිං කරනවනං නේද?මං කිව්වේ ඇමති ගොල්ලොම.'

මේ උඹයි මමයි දන්න දේසපාලනේ.අනේ යකෝ අපි ඉස්සෙල්ලම චන්දේ දාද්දි තෝ තියා තොපේ මහ එකාවත් ඉපදිලා නෑ බොල.එහෙම වංචා කළයි කියලා ඇමති ගොල්ල අයිං කරලා කොහොමද බොල ආණ්ඩුවක් ගෙනියන්නේ.අනික ඔය වංචා වගේ ඒවා කවදාවත් නැති කරන්ඩ බෑ.අපි ඒවගේ ඒවා ඉවසන්ඩ පුරුදු වෙන්ඩ ඕනේ.'

'හරි හරි ඒකෙන් වැඩක් නෑ.අම්මයි ආච්චියි මොකාටද මේ ලෑස්ති වෙන්නේ ඈ??'

'ඇයි බොල තෝ දන්නැද්ද උන්නාන්සේ මේ අපේ පැත්තට එනවා කියලා ප්‍රාදේශීය සබාවයි ජොගිං ටැක් එකයි විවෘත කරන්ඩ.'

'මොකක් කිව්වා ජොගිං ට්‍රැක් එකකුත් හදලද මේ උඩුගම්පොල? පිස්සු පීකුදු බිස්කට් නේ ආච්චි.ඉතිං ඕකේ දුවලා ඇඟ අඩු කරගන්ඩ කට්ටිය ඉන්නවැයි? අපේ පැත්තේ ගොඩක් උන්ට මන්ද පෝෂණේයි රක්තහීනතාවයි නේ තියෙන්නේ.'

'ඔය මං කිව්වේ...මොන වැඩේ කලත් උඹලට වැරදියි.කවුරුත් නැත්තං මම යනවා බොල උදේටයි හවසටයි ඇස්සයිස් කොරන්ඩ.'

'එතකොට ආච්චිගේ හන්දිපත් රුදාවයි පපුවෙ මහන්සියයි??'

'මළත් මොකද බොල.උන්නාන්සේ රටට කරන දේවල්වල වටිනාකමක් තොපි වගේ හරක්ට පෙන්නනලා දීලා'

'ඉතිං එතකොට මේ ලෑස්ති වෙන්නේ උන්නාන්සේ පිළිගන්ඩ ද?'

'නැතුව බොල ඔය ටීවී එකෙයි පෝස්ටර්වලයි හැමතැනම තියෙන්නේ උන්නාන්සේ ගෙවල්වලට ගිහිල්ලා දුක සැප අහනවා.ආච්චිලා ඉඹිනවා,ළමයි වඩා ගන්නවා ඉතිං වැරදිලාවත් උන්නාන්සේ මේ ගෙදර තෝරගත්තොත් ඇවිත් තේකක් එහෙම බොන්ඩ.'

'ඇත්ත ඇත්ත බැරිවෙලාවත් ආවොත් මොන දෙයියන්ට කියන්ඩද නේද?'

පහුවදා උදේම ලෑස්ති වී ඇඳ පැළඳ ගත් අම්මාත් ආච්චීත් ලොක්කා හෙලිකොප්ටරෙන් බහිනවා බලන්ඩ ගියෝය.පැය ගාණක් හිටං ඉඳලා දාඩිය පෙරාගෙන හවස ආව වෙලාවේ ඉඳලා කියවිල්ල ඉවරයක් නැත.

'ඒ උත්තමයා බැස්ස ගමං අත වැනුවේ අපේ පැත්තට.හම්මෝ මාර පාටක් ඒක.රත්තරං පාටයි.හොඳ ප්‍රෞඪ පෙනුමක් තියෙන්නේ.වෙන කොයි නායකයටද එහෙම පෙනුමක් තියෙන්නේ.උන්නාන්සේ අපේ පැත්තට හැරිලා හිනා වෙනවා දැක්කම මට සන්තෝසෙ දරාගන්ඩ බැරුව ගියා.වෙලාවට අර දිව යට තියන පෙත්තක් අරං ගියේ.'

'නෙද්දකිං මේ හැත්ත මිනිස්සුංව අන්දලා ආයෙත් පෙට්‍රල් වැඩි කරලනේ.හෙණම ගහන්ඩ ඕනේ මේ යක්කුන්ටනං.කොල්ලෝ අර කැවුං ගෙඩියක් අරං වරෙං කෝ කෙහෙල් ගෙඩියකුත් එක්ක.දැං ඉතිං ඕවයිං ජිල් ගහන්ඩයැ' සීයා පත්තරය බලමින් කීවේය.

ආච්චී සීයාටද රවා ගෙට ගියාය.

25 December 2012

වැදගත් විශය....14 ( Sex Education in Sinhala )








අද බලමු එහෙමනං බොහොම ප්‍රසිද්ධ වෙච්ච උපත් පාලන කොපු හෙවත් කොන්ඩම් ගැන.මේක සම්බන්ධව දීර්ඝ ඉතිහාසයක් තියෙනවා.හරියටම විශ්වාස නැති උනත් ඊජිප්තුවේ මිනිස්සු පැරෆින් ඉටි තවරපු ලිනන් රෙදි උපත් පාලන කොපු විදිහට පාවිච්චි කළා කියලා කතාවක් මම අහලා තියෙනවා.කොහොම හරි 17-18 වෙනි ශතවර්ෂවලදි මිනිස්සු සත්ත්ව බඩවැල්වලින් හදපු කොන්ඩම් පාවිච්චි කරලා තියෙනවා.




ඊට පස්සේ කාර්මික විප්ලවයත් එක්ක රබර්වලින් හදපු කොන්ඩම් භාවිතයට එනවා.කොහොම නමුත් හැම දේකදිම වගේ මේකෙදිත් ආගමික මැදිහත් වීම සිද්ධ වෙනවා.ඇමරිකාවේ මුලින් කොන්ඩම් තහනම් කරන්ඩ යෙදුනත් පස්සේ මේකේ වැදගත්කම අවබෝධ වීමත් එක්ක ඒ නීති ලිහිල් වෙනවා.දැන් බහුලව තියෙන්නේ ලේටෙක්ස් කියන රබර් වර්ගයෙන් හදපු කොන්ඩම්.නමුත් සමහර අය මේ ලේටෙක්ස්වලට අසාත්මික නිසා පොලියුරිතේන් වගේ වෙනත් රසායනික සංයෝගවලින් හදපු කොන්ඩමුත් වෙළඳ පොලේ මිළ දී ගන්ඩ තියෙනවා.



කොන්ඩම්වලින් උපත් පාලනයට අමතරව ලිංගිකව සම්ප්‍රේශනය වෙන රෝග සඳහාත් යම් ආරක්ෂාවක් ලබා දෙනවා.නිසි විදිහට කොන්ඩමයක් පාවිච්චි කළොත් ඒඩ්ස් ඇතුළුව බොහොමයක් ලිංගිකව සම්ප්‍රේශනය වෙන රෝගවලින් වැලකෙන්න පුළුවන්.

කොන්ඩමයක් නිසි විදිහට පළඳින්නේ මෙහෙමයි.මේ කොන්ඩමය එන්නේ ඉහළ රූපයේ තියෙනවා වගේ ආවරණයක.කොන්ඩමය ඉවතට ගන්න කියලා මේ ආවරණය කටින් ඉරන්ඩ හෝ කතුරකින් කපන්ඩ යන්ඩ එපා.මොකද කොන්ඩමයේ පුංචි හරි සිදුරක් ඇති උනොත් ඒකෙන් ලැබිය යුතු ආරක්ෂාව ලැබෙන්නේ නෑනේ.ඒ වගේමයි මේ කොන්ඩම හැමතිස්සෙම ළඟ තියා ගන්න එක හොඳයි. (මොකද හදිස්සියක් උනොත් එහෙම මේවා හොය හොය ඉන්ඩ මහන්සි නොවී වැඩේ කරලා පස්සේ පසු තැවෙන්ඩයි වෙන්නේ ) ඒ උනාට මේවා සාක්කුවේ කාසි යතුරු වගේ දේවල් එක්කවත් පර්ස් එකේවත් දාගෙන යන්ඩ හොඳ නෑ.මොකද ඒකෙනුත් කොන්ඩමය පළුදු වෙන්ඩ පුළුවං නිසා.

කොන්ඩමය ආවරණයෙන් එළියට ගන්නේ අතින් ඉරලා.ඔය දැති තියෙන පැත්තෙන් අල්ලලා ඉරුවාම පහසුවෙන් ආවරණය ඉරෙනවා.


ඊට පස්සේ එළියට ගත්තු කොන්ඩමය තියෙන්නේ මේ රූපයේ වගේ.හරියට ඉස්කෝලේ ගිහිල්ලා ගෙදර ඇවිත් හදිස්සියට ගලවපු මේස් එකක් වගේ රෝල් කරලයි තියෙන්නේ.






දැං කරන්ඩ ඕනේ මේ මැද තියෙන ඉහළට ඉස්සුනු තැන වම් අතේ දබර ඇඟිල්ලෙනුයි මහපට ඇඟිල්ලෙනුයි මිරිකලා අල්ලගන්න එක.එතකොට ඒ කෑල්ලේ තියෙන වාතය ටික ඉවත් වෙලා යනවා.ඊට පස්සේ මේක ශිෂ්ණයේ ඉහළ කෙළවරෙන් තියලා අර රෝල් කරලා තියෙන එක දිග ඇරෙන පැත්තට ශිෂ්ණය ආවරණය වෙන විදිහට දිග අරින එකයි කරන්ඩ ඕනෙ.


හොඳට මතක තියාගන්ඩ කොන්ඩමය කෙළවරේ තියෙන පුංචි ඉඩ තියෙන්නේ ශුක්‍ර තරලය එකතු වෙන්ඩ.ඒ ඉඩේ වාතය ඉතුරු උනොත් සංසර්ගයේදී පුපුරලා යන්ඩ පුළුවං.ඒ නිසා හොඳට වාතය ඉවත් වෙන විදිහට තද කරලා කොන්ඩමය පළඳින්න ඕනේ.අනිත් එක තමයි ශුක්‍ර තරලය පිට උනාට පස්සේ ශිෂ්ණයේ ප්‍රාණවත් භාවය නැතිවෙලා යනවනේ.එතකොට කොන්ඩමය ශිෂ්ණයෙන් ගැලවිලා ශුක්‍ර තරලය යෝනි මාර්ගය අවට තැවරෙන්ඩ පුළුවං.එතකොටත් ගැබ් ගැනීමේ අවධානමක් තියෙනවා.ඒක හින්දා ශුක්‍ර තරලය පිට උනාට පස්සේ ශිෂ්ණය ප්‍රාණවත්ව තියෙද්දිම යෝනි මාර්ගයෙන් පිටතට ගන්ඩ ඕනේ.

ඒ වගේම මේක ලිංගිකව සම්ප්‍රේශනය වෙන රෝගවලට ආරක්ෂාවක් විදිහට පළඳිනවානං කොන්ඩමය ගලවද්දි කඩදාසියකින් හෝ ටිෂූ කොළයකින් අල්ලලා කොන්ඩමයේ තැවරී ඇති යෝනි ස්‍රාවයන් අතේ නොගෑවෙන විදිහට පරිස්සමෙන් ගලවලා ඉවත් කරන්ඩ ඕනේ.මොකද මේ යෝනි ස්‍රාවයන් හරහානේ රෝගයන් පැතිරෙන්නේ.පුරුෂයින්ගේ නම් ශුක්‍ර තරලය හරහා තමයි රෝගයන් පැතිරෙන්නේ.ඉතින් මුඛ සංසර්ගයේදී ශුක්‍ර තරලය හෝ සියුම් තුවාලවලින් පිටවන රුධිරය තැවරීමෙන් මුඛය හරහා රෝග බෝවීමේ අවධානමක් තියෙනවා.ඒ නිසා තමයි විවිධ රසවලින් සහ සුවඳින් යුක්තව කොන්ඩම් හදලා තියෙන්නේ.ඒ නිසා මතක තියාගන්ඩ අනාරක්ෂිත ඒ කියන්නේ තමුන්ට හරියටම විශ්වාස නැති කෙනෙක් එක්ක ලිංගිකව එක් වෙද්දී කොන්ඩමයක් හැම විටම පළඳින්න හෝ පළඳවන්න.

ගුද සංසර්ගයේ දී සාමාන්‍ය යෝනි සංසර්ගයකට වඩා තද බවක් තිබීමත් ගුදය සංසර්ගයකට හැඩ ගැසී නොතිබීමත් නිසා කුඩා තුවාල ඇතිවීමේ අවස්ථාව වැඩියි.ගුද රමණයකින් ලිංගිකව සම්ප්‍රේශනය වෙන රෝග වැළඳීමේ අවධානම යෝනික සංසර්ගයක මෙන් පනස් ගුණයක් කියලයි කියන්නේ.සාමාන්‍ය කොන්ඩමයන් ගුද රමණයට සුදුසු වෙන්නේ නෑ.ඒවා පහසුවෙන් ඉරී යන්ඩ පුළුවං.ඒ නිසා ඒ වෙනුවෙන් නිපද වූ ඝණකම් කොන්ඩමත් මිලදී ගන්ඩ තියෙනවා.

කොන්ඩම පළදීන්නැතුව ඉන්ඩ කට්ටිය කියන නිදහසට කාරණයක් නේ සංවේදී භාවය අඩුවෙනවා කියන එක.හරියට ඇඳුං ඇඳං නානවා වගේ කියලනේ කියන්නේ.මේක ඇත්තටම මානසික කාරණයක්. සංවේදීභාවය සුළු වශයෙන් අඩු වෙන්ඩ පුළුවං.ඒ උනත් අවධානමක් ගන්නවට වඩා ඒක හොඳයිනේ නේද?.ඉතිං මේ සංවේදීභාවය අඩු වෙනවා කියන අයට තුනී බවෙන් වැඩි කොන්ඩමත් නිපදවලා තියෙනවා.ඒ වගේම කොන්ඩමය මතුපිට ගැටිති සහ රැළි සහිතව නිපදවූ කොන්ඩම සංවේදීභාවය වැඩි කරනවා කියලයි කියන්නේ.

තවත් කොන්ඩම වර්ගයක් තියෙනවා පිරිමියාගේ සුරාන්තය පමා කරවන.මේ කොන්ඩමයේ ශිෂ්ණයේ කෙළවර සංවේදීභාවය අඩුකරවන බෙන්සොකේන් කියන රසායනිකය තවරලා තියෙනවා.ඒකෙන් ශුක්‍ර මෝචනය සැලකිය යුතු ලෙස පමා කරවනවා.

ඒ වගේම ශිෂ්ණයේ සෘජු භාවය වැඩි කරවන රසායනිකයක් අඩංගු කොන්ඩමයකුත් නිපදවලා තියෙනවා.ඒකනම් තවම ලංකාවේ නෑ මම හිතන්නේ.



කාන්තා කොන්ඩමය

මේක ලංකාවේ එච්චර ජනප්‍රිය නැති උනත් මිළ දී ගන්ඩ තියෙනවා.මේක නිසි විදිහට පාවිච්චි කළොත් සාමාන්‍ය කොන්ඩමයට වඩා ලිංගිකව සම්ප්‍රේශනය වෙන රෝගවලට ආරක්ෂාවක් ලබා දෙනවා.මේක තරමක් විශාල කොන්ඩමයක්.මේක එක කෙළවරක් විවෘතයි.අනිත් කෙළවර වහලයි තියෙන්නේ.කොන්ඩමය ඇතුලේ රබර් වළල්ලක් තියෙනවා.මේ රබර් වළල්ල කොන්ඩමය ඇතුලෙම පොඩි වෙන විදිහට අල්ලගෙන යෝනි මාර්ගයට ඇතුළු කරගන්ඩ ඕනේ.එතකොට ඒ වළල්ල ගිහින් ඇතුලෙදි දිග ඇරිලා ගැබ් ගෙල වටේට සවි වෙනවා.එතකොට ගැලවිලා වැටෙන්නේ නෑ.




මේ කොන්ඩමය පැළඳුවාම පිටත ඉතුරු වෙන කොටසෙන් බාහිර සහ අභ්‍යන්තර යෝනි තොල් ද ආවරණය වෙන නිසා තමයි මෙහි ලිංගිකව සම්ප්‍රේශනය වන රෝගවලට ඇති ආරක්ෂාව වැඩි වෙන්නේ.




24 December 2012

වැදගත් විශය....13 ( Sex Education in Sinhala )





දේශපාලනය, සත්ව පාලනය වගේම උපත් පාලනයත් සමාජයේ අත්‍යවශ්‍ය අංගයක් විදිහටයි මම දකින්නේ.අධි ජනනය කියන දේ පරිණාමයට වැදගත් උනාට මිනිස්සු පරිණාමයට අවශ්‍ය කරන ස්වභාවික වරණය කියන ක්‍රියාවලිය බොහෝ දුරට පාලනය කරගෙන තියෙන හින්දා මිනිස්සුන්ගේ සංඛ්‍යාව පෘථිවියට දරාගන්ඩ බැරි තරමට වර්ධනය වෙලා.

මිනිස්සුන්ගේ ලිංගික ක්‍රියා අනිත් සත්තුන්ගේ වගේ ප්‍රජනනයටම සීමා නොවුනු දෙයක් කියලත් කළිං ලිපියක කිව්වා වගේ මතකයි.මිනිස්සුන්ගේ ලිංගික ක්‍රියා මග්න් දෙදෙනෙක් අතර ඇති බැඳීම ශක්තිමත් කරවනවා.ඒ වගේම අපි කරන ගොඩක් දේවල් ඒ ක්‍රියාවේ මූලික අවශ්‍යතාවයෙන් බැහැරවනේ සිද්ධ වෙන්නේ.උදාහරණ්යක් විදිහට අපි කේක් කෑල්ලක් කන්නේ කොකාකෝලා එකක් බොන්නේ බඩගින්නටවත් තිබහටවත් නොවෙන අවස්ථා වැඩියිනේ.ඉතිං ඒ නිසා මිනිස්සු ප්‍රජනනයට මිනිස්සුංව යොමු කරවන්ඩ ලිංගිකත්වය තෘප්තිමත් ක්‍රියාවක් වෙලා තියෙන එකෙන් ප්‍රයෝජන අරගෙන ඒක කොච්චර දුර අරගෙන ගියාද කියනවනං ඇත්තටම දැං වෙද්දි දරුවෙක් පිළිසිඳ ගැනීම කියන්නේ ලිංගික ක්‍රියාවේ අතුරුපලයක් හෝ අහිතකර ප්‍රතිඵලයක් ලෙස සළකන තත්ත්වයටම වර්ධනය වෙලා.

ඉතිං සමහරු උපත් පාලනය වැරැද්දක් විදිහට දකිනවා උනාට මුළු ලෝකෙම මිනිස්සුංගෙං පුරවලා ලෝකෙම විනාශ කරගන්නවට වඩා උපත් පාලනය කරන එක හොඳයි නේද?අනිත් එක තමයි නිසි විදිහට උපත් පාලන ක්‍රමයක් භාවිතා කළොත් ගැබ් ගැනීම් වලක්වා ගන්ඩ පුළුවං වගේම ලංකාවේ මේ සිද්ධ වෙන ගබ්සා කිරීම අඩු කිරීමට හෝ නැත්තටම නැති කිරීමට හැකියාවක් ලැබේවි.

උපත් පාලන ක්‍රමයක් විදිහට දැනට තියෙන සාර්ථකම ක්‍රමය තමයි ලිංගිකව එක් වීමෙන් වැළකී සිටීම.ඒ උනාට මේ ජීවත් වෙන ටික කාලේ මොකටද නිකං විඳව විඳව ඉන්නේ.අනුන්ට කරදරයක් නොකර සතුටෙං හිටියා කියලා වැරැද්දක් විදිහට කාටවත් ඒක විවේචනය කරන්ඩ බෑනේ.ඒක හින්දා මේක කරන්ඩ පුළුවං කට්ටිය කරගෙන යන්ඩ.අනිත් අය මේ පහළ විස්තර කරන ක්‍රමවේදයක් පාවිච්චි කළාට කමක් නෑ.

හරි දැං අපි සරළම ක්‍රමවලිං පටං ගම්මු.අතීතයේ ඉඳං පැවතිච්ච ක්‍රමවේද වලින් එකක් තමයි 'දින දර්ශන ක්‍රමය'කට්ටියට මතක ඇතිනේ කලිං ලිපියක ඔසප් චක්‍රය ගැන කතා කළා.ඉතිං මේ ඔසප් චක්‍රයේ ඩිම්බයක් නිකුත් වෙන වෙලාවටනේ ශුක්‍රාණුවකට ගිහිල්ලා ඒක සංසේචනය කරලා පිළිසිඳ ගැනීමක් සිද්ද වෙන්ඩ පුළුවං.මේ දින දර්ශන ක්‍රමයෙදි සිද්ද වෙන්නේ මෙහෙම ඔසප් චක්‍රයේ ඩිම්බය නිකුත් වීමට ඉඩ ඇති දවස් මග ඇරලා අනිත් දවස්වලදි ලිංගිකව එකතු වෙන එක.මේක අසාර්ථක ක්‍රමයක්.මොකද ගැහැනු අයගේ ඔසප් චක්‍රය හරියට පිළිවෙලට සිද්ධ නොවෙන්න පුළුවං.එහෙම උනොත් ඉතිං බබා හම්බ උනා තමයි.ඒක නිසා මේ ක්‍රමය අනුගමනය නොකළ යුතු එකක් විදිහටයි මමනං දකින්නේ.මොකද ගැබ් ගැනීමක් වගේ දෙයක් සම්බන්ධව අවධානමක් ගන්න එකේ තේරුමක් නෑනේ.

අනිත් සාම්ප්‍රධායික ක්‍රමය තමයි ශුක්‍ර තරලය පිට වීමට පෙර ශිෂ්ණය යෝනි මාර්ගයෙන් පිටතට ගැනීම.මේකත් හරිම අසාර්ථක ක්‍රමයක්.මොකද සුරාන්තයේදී ශුක්‍ර තරලය පිට උනාට ඇත්තටම ඊට කළිං ඉඳලම ටික ටික ශුක්‍ර තරලය මුදා හැරෙනවා.අනික හොඳම ශුක්‍රාණු ටික පවතින්නෙත් මේ මුළින්ම පිට වෙන ශුක්‍ර තරලයේ.ඒ නිසා උපත් පාලන ක්‍රමයක් විදිහට අසාර්ථකයි වගේම මේ ක්‍රමය නියම ලිංගික තෘප්තියක් ලබාගන්න එකටත් බාධා කරන්ඩ පුළුවං.ඇයි ඉතිං පටං ගත්තු වෙලාවෙ ඉඳං ඔළුවේ වැඩ කරන්නේ පත්තු වෙන්ඩ කළිං තුවක්කුව එළියට ගන්න එක ගැනනේ.



දැං අපි බලමු ලංකාවේ ගොඩක් අය පාවිච්චි කරන උපත් පාලන පෙති ගැන.


සාමාන්‍යයෙන් බහුලවම තියෙන්නේ 'මිතුරි' කියන වෙළඳ නාමය යටතේ නේ.මේ මිතුරි පෙතිවල අඩංගු වෙන්නේ සාමාන්‍යයෙන් ගැහැනුන්ගේ ශරීරයේ නිපදවෙන ඊස්ට්‍රජන් සහ ප්‍රොජෙස්ටෙරොන් කියන හෝමෝන දෙක.මේ හෝමෝන දෙක ශරීරයට ඇතුළු උනාම ඒවා සාමාන්‍ය ස්ත්‍රී කායික ක්‍රියා යාමනයට දායක වෙනවා වගේම ගිහිල්ලා පිටියුටරියෙන් FSH සහ LH කියන හෝමෝන ස්‍රාවය වීම වළක්වනවා.එතකොට ඩිම්බකෝෂවල ඩිම්බ නිපදවීම තාවකාලිකව නතර වෙනවා.එයිට අමතරව ගර්භාශය සහ යෝනි මාර්ගය එකිනෙක සම්බන්ධ කරන ගැබ් ගෙල ප්‍රදේශයේ ඇති ශ්ලේෂ්මලය ඝණකම් බවට පත් කිරීමත් මේ හෝමෝන මගින් සිද්ධ වෙනවා.එතකොට ශුක්‍රාණුවලට යෝනි මාර්ගයේ සිට ගර්භාශයට ඇතුළු වෙන්න අපහසු වෙනවා.

මේ පෙතිවලින් උපත් පාලනය කරනවාට අමතරව තවත් වාසි කීපයක් ලබාගන්ඩ පුළුවං.අක්‍රමවත් ඔසප් චක්‍ර ඇති අයගේ ඔසප් චක්‍රය ක්‍රමවත් කරගන්ඩ පුළුවං වගේම ඔසප් වීමේදී ඇතිවන වේදනාව අඩු කරගන්නත් පෙති මගින් පුළුවං.එයිට අමතරව ගර්භාශ සහ ඩිම්බකෝෂ පිළිකාවලට එරෙහිව ආරක්ෂාවක්ද ලබා දෙනවා.මුහුණේ කුරුලෑ ආදිය අඩු වීමටත් පෙති හේතු වෙනවා.

පෙති නිසි ලෙස භාවිතා කළොත් 99.99%ක පමණ ආරක්ෂාවක් ලබා ගන්ඩ පුළුවං.ගැටළුව තියෙන්නේ පෙති ගන්න එක අමතක වීම.ඒ වගේම සමහරුන්ට පෙති ගැනීමත් එක්ක වමනය, ඔක්කාර ගතිය, හිසරදය, පියයුරුවල වේදනාව වගේම ඔසප් වීම් අතර තුර සුළු රුධිර වහනයන් ඇති වෙන්ඩ පුළුවං.වමනය ඔක්කාර ගතිය නැති කරගන්ඩ නම් මේ පෙති රාත්‍රී කෑමට පසුව ගැනීමෙන් බොහෝ දුරට පුළුවං.මේ අතුරු ආබාධ මාසයක් දෙකක් යනවිට නැතිවෙලා යනවා.

තවත් ගැටළුවක් තමයි කිරි දෙන මව්වරුන්ට මිතුරී පෙති සුදුසු නොවීම.පෙතිවල අඩංගු ඊස්ට්‍රජන් මගින් කිරි නිපදවීමට බාධා පමුණුවන බැවින් මේ කාලයේදී වෙනත් උපත් පාලන ක්‍රමයක් භාවිත කළ යුතු වෙනවා.ඒ නැත්නම් ප්‍රොජෙස්ටරෝන් පමණක් අඩංගු පෙති වර්ගද වෙළඳපොළේ ඇති අතර වෛද්‍ය උපදෙස් මත එවැන්නකටද යොමු වීමට පුළුවන්.

පෙති ගත්තම මහත් වෙනවා කියන එක අපේ ගෑනු අය සෑහෙන්ඩ බය වෙන දෙයක් නේ.බය වෙන්ඩ එපා ඔයිට වඩා තව කොහෙ මහත් වෙන්ඩද? ඇත්තටම පෙති ගත්තම ඒකේ තියෙන ප්‍රොජෙස්ටෙරොන් මගින් කෑම රුචිය වැඩි කරවනවා.එතකොට කාලා කාලා මහත් වෙනවා මිසක් පෙතිවලින් මහත් වෙන්නේ නෑ.ඒකට කෑම පාලනය කිරීමෙන් සහ ව්‍යායාම කිරීම  හොඳ පිළිතුරක්.ඒ වගේමයි පෙති ගැනීම නිසා වඳ භාවයට පත් වෙන්නේ නෑ.පෙති නවත්තලා ටික කාලෙකින් නැවත ගැබ් ගැනීමේ හැකියාව ලැබෙනවා.

මිතුරි පෙති පැකට්ටුවක පෙති 28ක් තියෙන කාඩ් එකක් තියෙනවා.පෙති 21ක් කහ පාටටත් යටම පේළියේ පෙති 7ක් රතු පාටටත් තියෙනවා.කහ පාට පෙතිවලින් ආරම්භ කරගෙන දිගටම පෙති අරගන්න ඕනේ.රතු පාට පෙති ගන්නකොට ඔසප් රුධිරය පිට වෙනවා.එක පැකට් එකක් අවසන් උනු වහාම අළුත් පැකට් එකක් ආරම්භ කරන්ඩ ඕනේ.හරිම සරලයි.අමතක නොකර දිගටම ගත්තොත් හරි.වැදගත්ම දේ තමයි ලිංගිකව එක් උනත් නැතත් දිගටම පෙති ගන්ඩ ඕනේ.පෙති ගන්න එක නවත්තන්ඩ ඕනේ දරුවෙක් බලාපොරොත්තු වෙනකොට හෝ වෙනත් උපත් පාලන ක්‍රමයකට මාරු වෙනවනං විතරයි.



DMPA එන්නත

මේ එන්නතේ අඩංගු වන්නේ ප්‍රොජෙස්ටෙරොන් හෝමෝනයයි.මෙය අතේ උඩ බාහුවේ මාංශ පේෂියට එන්නත් කළ විට ක්‍රමානුකූලව සුළු ප්‍රමාණයෙන් හෝමෝනය රුධිරයට මුදා හරියි.මෙමගින් ද උපත් පාලනය සහ අනෙකුත් වාසි පෙතිවලට සමානවම ලබා දේ.මේ එන්නත් සෑම මාස තුනකට වරක්ම ලබාගත යුතු වන අතර එන්නත නවතා මාස 3-4ක් පමණ කාලයකින් නැවතත් ගැබ් ගැනීමේ හැකියාව ලැබේ.මේ එන්නත ගැනීමත් සමඟ ඔසප් රුධිරය පිට වීම අඩු වීම හෝ සම්පූර්ණයෙන්ම නැවතීමට ඉඩ ඇත.නමුත් මෙය ගැටළුවක් නොවේ.ඉන් කිසිඳු අයහපත් සෞඛ්‍ය තත්ත්වයක් ඇති නොවේ.



20 December 2012

ලෝක විනාසේ හෙටයි......




විභාගයක් ඉවරය.මමත් ඉවරය.ඒවායින් වැඩක් ලෝකයාට නැත.මටද වැඩක් නැත.මොකද දැං වෙන්ඩ ඕනේ ලබ්බ වෙලා ඉවර හින්දාය.ඉහිරුණු කිරට අඬා පළක් නැතුවාක් මෙන්ම අස්පයා ගියාට පසු ඉස්තාලය වහලා වැඩක් ද නැත.මේ වෙලාවේ මට කියන්ඩ අවශ්‍ය වන්නේ දැනට මාසයක් පමණ බ්ලොග් ලෝකයෙන් මම හැංගී හිටිය බවය.කරන්ඩ දෙයක් නැත.මගේ හිතාදර පාඨක ජනතාව 'වැදගත් විශය' ලිපි පෙළේ ඊළඟ ලිපිය එන තුරු කෙළ හලාගෙන බලා ඉන්ට ඇත.අහෝ මා දයාබර පාඨක සහෘදයිනි අනේක වාරයක් සමා වෙත්වා!.

උඩ ජුන්ඩ ලිව්වේ පොර ටෝක් එකක් හැටියටය.මම නොලියා හිටියාට කාටවත් දැනෙන්නේ නැති බව මම දනිමි.මන්ද මම මේ සිංහල බ්ලොග් ලෝකයේ තවත් එක් ක්ෂුද්‍ර ප්‍රාණියෙකු පමණක් වන නිසාය.එහෙම දැන දැනද අපි පොර ටෝක් දීමේ මහත් වූ ආශා ඇති ජාතියක් වෙමු.එබැවින් එකී ජාතියේ අනන්‍යතාව සුරකිනු වස් පොර ටෝක් දීම ව්‍යාපාරයක් සේ කරගෙන යාමට බලාපොරොත්තු වෙමි.

පොර ටොක් එක ගැන පොර ටෝක් දීලාද හමාරය.දැං අවුල ඇත්තේ ලියන්ඩ අත හුරු නැති එකය.ආයෙත් වැරදුනාය.කී බෝඩ් එකේ කොටන්ඩ හුරු නැති එක කියා එය නිවැරදි විය යුතුය.නමුත් ඇත්තටම අවුල ඇත්තේ මොළයේය.අපේ අධ්‍යාපන ක්‍රමයේ ඇති කාර්යශූර, නිර්මාණශීලී, සහ ක්ෂිතිජයට ඉහලින් බෝට්ටු එනවා බලන්ඩ හැකි දරු පිරිසක් නිර්මාණය කිරීමේ ක්‍රමවේදය නිසා මොන විභාගය තිබ්බත් ළමයා අන්තිමට එළියට එන්නේ 'සොZම්බී' එකෙක් වගේය.එහෙව් එකේ විශ්ව විද්‍යාලය කියා වෙනසක් නැත.විභාගය අවසන් වන විට ඔබට ඔබ කවුද යන්න පවා අමතක වේ.එනිසා මම මහත් අපේක්ෂාවෙන් හිටියේ මේ විභාගයටත් මොකක් හරි අකරතැබ්බයක් සිද්ද වී 'එස් බී' ලොක්කා පච හලන හැටි බලමින් මාසයක් පමණ ගෙදරට වී ඉන්නට හැකි වේවි කියලාය.නමුත් අවාසනාව හින්දා එහෙව් කිසි එකක් උනේ නැත.රටේ හැම විභාගෙම කොස්සක් තියෙද්දි මේ විභාගේ විතරක් අවුලක් නැතුව තිබ්බ එක මටනං දරාගන්ඩ බැරිය.

වල් පල් කියෙව්වා ඇතිය.දැං අවස්ථාව එළඹ තිබෙන්නේ හෙට සිදු වීමට නියමිත ලෝක විනාශය ගැන මාගේ කුඩා මොළයේ ඇතිවූ මෙව්වා එකක් ඒ කියන්නේ සංකල්පනාවක් ජනසතු කිරීමේ මහා පුණ්‍ය කර්මයට  අවස්ථාවය.

ලෝක විනාශය හෙට සිද්ධ වෙන්නෑ කියන අය අත උස්සන්ඩ බලන්ඩ.


ඔය බොරුවටනෙ මෙයා ඔයාලා කියන්නේ හෙට ලෝකෙ විනාස වෙන්නෑ කියලා.ඕක මිනිස්සුංගේ විතරක් නෙමෙයි හැම සත්වයෙක්ගෙම ජීවිතේට තියෙන ආශාව.ඒක හින්දා මේ හෙට අපි සෙට් එකම ජම්මාන්තර ගත වෙනවා කියන එක අමතක කරලා දාලා විසි පස් වෙනිදට නත්තල් කන්ඩත් ලෑස්ති වෙනවා.

දැං මම මේ ඉදිරිපත් කරන්ඩ යන සංකල්පය මගේ මොළයේ අනුමස්තිශ්කයෙන් ඇරඹිලා මැද මොළය හරහා මස්තිශ්කයට ආවේ මම රෑ නිදාගෙන කරුවලේ කල්පනා කර කර ඉන්න විටදී ය..කට්ටිය කියනවනේ හොඳ හොඳ සංකල්ප, මතවාද සහ ප්‍රවාද ජනිත වෙන්නේ වැසිකිළියේ ඉද්දි කියලා.මටත් වැසිකිළිය කියන්නේ සංකල්පනා සඳහා තෝතැන්නක් තමයි.ඒත් ඒ වෙලාවට මට එන්නේ පීඩනය, පරිමාව, ඝණත්වය, චලිතය වගේ භෞතිකමය සංකල්ප.ලෝක විනාශය වගේ උත්කෘෂ්ඨ සුන්දර සංකල්ප ඇතිවෙන්නේ රෑට නිදාගන්ඩ ගියාම.පුංචි කාලේ අපිව නිදි කරවලා ඇඳේ තිබ්බට, පහු කාලෙදි අපි නිදා ගන්ඩ කියලා ඇඳට යන්ඩ පටං ගන්නේ හීන බලන්ඩනේ.කොට්ටෙකුත් බදාගෙන ලයිට් එකත් නිවලා අර බදාගත්තු හඩු ගඳ කොට්ටෙ සුන්දර කෙල්ලෙක්ය කියලා හිතේ මවා ගන්න පටං ගත්තු කාලෙ ඉඳං අපි කරන්නේ සංකල්ප මවන එක නොවැ.

මේකයි කතාව.හැබැයි කතාව ඔබේ විශ්වාස සහ සංකල්පවලට පටහැනි වගේ පේන්ඩ පුළුවං.අවසානය දක්වාම කියවලා මිසක් විවේඡනය කරන්ඩ එපා හොඳේ.

ඔන්න අපි එක එක අය එක එක විදිහේ විශ්වාසවල ඉන්නවා නොවැ.ඒවා අතරේ ගොඩක් දෙනා විශ්වාස කරන්නේ දේවවාදය නේ.හැබැයි බයිබලේ දෙවියන් වහන්සේ ලෝකය මවලා මිනිස්සු මැව්වා කිව්වට ඇයි එහෙම කළේ කියලා නං ලියවිලා තියෙනවා මට හම්බ උනේ නෑ.ඉතිං ඕක මට හෙන ගැටළුවක් උනා.ඇයි සියල්ල කළ හැකි දෙවියන් වහන්සේ උන්වහන්සේව ගණං වත් නොගන්න මිනිස්සුංව මැව්වේ.

ඒ ඔස්සේ පර්යේෂණ කරගෙන කැණීම් කරගෙන යනකොට ( මේ ඔක්කොම කරන්නේ ලයිට් නිමලා ඇඳේ නිදාගෙන හරිය!!! ) ඔන්න මට එක පාරට අහු උනා අර අතීතයේ මෙහෙ ආපු පිටසක්වල ජීවීන් මෙහෙ මිනිස්සුන්ගේ දියුණුවට උදව් උනා කියලා කියැවෙන වාර්ථා වැඩසටහන.හඃ හඃ හා...... ඔන්න අහු උනා තියරියකට පොටක්.දෙවියෝ කියන්නේ අතීතයේ ආපු පිටසක්වල ජීවීන් නම් උන් මොකටද අපේ වර්ධනයට උදව් උනේ.මොකෝ අපි වඳුරංව අල්ලගෙන උන්ට දියුණු වෙන්ඩ කියලා දෙනවයෑ.කියලා දුන්නත් කියලා දෙන්නේ සර්කස් එකක අපිට ආතල් ගන්ඩ පුළුවං දෙයක් මිසක් උන්ට දෝෂාභියෝග ගේන හැටි ගැන එහෙම කියලා දෙනවයෑ.

මිනිස්සු ඇවිල්ලා දෙවියන් වහන්සේගේ බැටළු පට්ටිය කියලා ඔය බයිබලේ තැං තැංවල සඳහන් වෙලා තියෙනවා මට මතකයි.ආ...හා..... එහෙනං මේ පිටසක්වලයෝ ඇවිල්ලා කරන්ඩ ඇත්තේ අපිව උංගේ කුකුල් කොටුවක් වගේ එහෙම නැත්තං බැටළු පට්ටිය වගේ හදන්ඩ පටං ගන්න එක.ඒ කියන්නේ මේ අපිට ආදරේට ද? අනේ නෑ සහෝදරවරුනි.එක්කෝ බිත්තර ගන්ඩ නැත්තං මස් හරි ලොම් හරි ගන්ඩ නෙමෙයිනං අපි ගොවිපලක් පටං ගන්නවද?අන්න ඒ වගේ මේ පිටසක්වලයෝ ඇවිල්ලා අපිව වර්ධනය කරන්ඩ පටං ගත්තේ අපේ ඉන්ද්‍රියයන් හරි මොනවා හරි ලබ්බක් උන්ට ඕනේ වෙලාවට අරං යන්ඩ.ඔය සැරින් සැරේ අහන්ඩ ලැබෙන්නේ පිටසක්වලයෝ මෙහේ එකා දෙන්නා පැහැරගෙන ගිය කතා.ඒ වගේම පැහැරගෙන ගිහිල්ලා සිහි නැති කරලා ශල්‍යකර්ම එහෙම කරපු අවස්ථා ගැනත් ඔය ඕනෙ තරම් අහන්ඩ ලැබෙනවනේ."දෙවියන් වහන්සේගේ රූපයට සමානව මිනිසා මවන ලදී" කියලා ලියලා තියෙන්නේ ඇයි කියලා දැං තේරෙනවද?

පිටසක්වලයෝ මෙහෙ මිනිස් ගොවිපොළ පටං අරං ඒක ස්වයං පාලනයට භාර දීලා යන්ඩ කළිං උන්ට ඕනේ වෙලාවට මිනිස්සුංව මරා ගන්ඩ පුළුවං වෙයිද බලන්ඩ පරීක්ෂාවක් කළා.ඒබ්‍රහම්ට කියනවා තමංගෙ පුතාව මරලා පුච්චලා දෙවියන්ට යාගයක් කරන්ඩ කියලා.කිව්ව ගමං ඒබ්‍රහම් ලෑස්ති වෙනවා පුතාව මරන්ඩ.අන්න එතකොට පිටසක්වලයෝ සෑහීමකට පත් වෙනවා.උං කියනවා 'අපි උඹව පරීක්ෂා කළා විතරයි.පුතාව මරන්ඩ එපා' කියලා.

දැං ඔය පිටසක්වලයෝ මායාවරුන් එක්ක හොඳ සම්බන්ධයක් තියාගෙන හිටියේ.මෙහේ ගොවිපලේ මූල්‍ය කටයුතු කළේ මායාවරු.ඒකයි උං ගාව එච්චර රත්තරං තිබ්බේ.ඒත් පිටසක්වලින් මෙහේ නවත්තලා ගිය නියෝජිතයා සල්ලි අරං පැන්නා.




ඔය කැටයමේ තියෙන්නේ පොර පැනලා ගිය සිද්දිය.

හරි කොහොම හරි මායාවරු පිටසක්වල කට්ටිය එක්ක ද්වීපාර්ශ්වික ගිවිසුමක් ගැහුවා මේ ගොවිපොල 2012.12.21 වෙනකං පවත්වගෙන යන්ඩ.ඒක ද්වීපාර්ශ්වික ගිවිසුමක් හින්දා අපි ඒක ගැන මොකුත්ම දන්නේ නෑ.අපේ ආණ්ඩුව ගහන ගිවිසුම්වල තියෙන්නෙ මොනවද කියලාවත් දන්නැති අපි මායාවරු පිටසක්වලයින් එක්ක ගහපු ගිවිසුම ගැන දැනං ඉන්ඩ විදිහක් ඇත්තෙම නෑනෙ.අන්තිමට හැබැයි මායාවරු උන්ට ලැබෙන ආධාරවලින් කොමිස් ගහලා බීලා පිස්සු නටලා නැත්තටම නැති වෙලා ගියා.මතයක් තියෙනවා මායාවරු විනාශ උනේ ගස් කපලා යෝධ බිලි පූජා පවත්වලා ඒ ප්‍රදේශයේම ගස් නැති වෙච්ච හින්දාය කියලා.ඇත්තටම මේ ගස් කපලා යෝධ ගිනි ගොඩවල් ගැහුවේ බිලි පූජාවලට නෙමෙයි.මායාවරු යෝධ ගිනි ගොඩවල් ගහලා නයිට් රේස් පැවැත්තුවා.ඔය අස්සේ 'කොල්ලු' මිල (අශ්වයින්ගේ ආහාරය ) ඉහල යෑමත් එක්ක භාණ්ඩවල මිල සෑහෙන්ඩ ඉහල ගියා.උද්ධමනය දරාගන්ඩ බැරුව මිනිස්සු පිට රටවලට පැනලා ගියා.අන්තිමට යෝධ ශිෂ්ඨාචාරයක් අනාචාරය හින්දා විනාශ වෙලා ගියා.

කොහොම හරි හෙටින් පිටසක්වලයෝත් එක්ක ගහලා තියෙන ගිවිසුම ඉවරයි.උන් මේ ගොවිපොල විනාශ කරලා වෙන ව්‍යාපෘතියක් පටං ගන්ඩයි යන්නේ.පිටසක්වල යානා, රතු වැස්ස, රෑ අහසේ එළි වගේ ඔක්කොම සෙල්ලං මේ ගොවිපොල අයින් කරන එක සහ අළුත් ව්‍යාපෘතිය පටං ගන්න එක සම්බන්ධව තමයි.එහනම් හෙට එකට මියෙමු.

කට්ටිය මේ අපහාස කළාය කියලා අමනාප වෙන්ඩ කාරි නෑ.ආයෙත් ලියන්ඩ මොළේ ටියුන් කරගන්ඩ ඔහේ ඔළුවට ආපු එව්වා ටිකක් කොටලා බැලුවේ.මම වගේ කිරි සප්පයෙක් කියන එව්වා හිතට ගන්ඩ කාරී නෑ ඕං.



22 November 2012

වැදගත් විශයය....12 ( Sex Education in Sinhala )






කාලෙකට පස්සේ අසනීප වෙච්ච හින්දා ලැබිච්ච නිවාඩුවේ බ්ලොගේ මොනව හරි ලියන්ඩ හදද්දි තමයි මතක් උනේ වැදගත් විශය ලිපි පෙළ ඉවර නෑ නේද කියලා.ඔන්න අද ඒකේ වැදගත්ම ඒ කියන්නේ ප්‍රායෝගිකම ලිපිය ලියන්ඩයි හදන්නේ.

ලිංගික සංසර්ගය, ලිංගික එක්වීම, රමණය, මෛථූන්‍යය, සයනය කිරීම, සංසර්ගය, සසඟ, අඹුසැමි ඇසුර වගේ සභ්‍ය වචන රාශියක් සහ අසභ්‍ය යැයි කියන වචන රාශියකින් මෙන්ම සාමාන්‍ය එදිනෙදා අපි කතා කරන වචන රාශියක් ව්‍යංගව භාවිතා කරලා මේ ක්‍රියාව හඳුන්වන එකෙන්ම මිනිස්සු මේක ගැන කොච්චර උනන්දුයිද කියලා තේරෙණවා.නමුත් ගැටළුව තියෙන්නේ කොච්චර උනන්දු උනත් මේ ගැන පැහැදිලි දැනුමක් ලබා ගන්ඩ තියෙන මාර්ග හරි අඩුයි.

ගුරුවරු වැඩිහිටියෝ සහ දෙමව්පියෝ මේ ගැන කතා කරන එක ප්‍රතික්ෂේප කරද්දි මිත්‍රයින්ගෙන් ලැබෙන්නේ හරිම අපැහැදිලි ව්‍යාකූල තොරතුරු සමුදායක්.ඒ වගේම අනිකුත් තොරතුරු ලැබෙන මාධ්‍ය බොහොමයක තියෙන්නේ අතිශයෝක්තියෙන් කෙරෙන විස්තරයක් (නිල් චිත්‍රපට හෙවත් වැල, සහ අසැබි පත්තර ).ඉතින් මේ විදිහට දැනුම අතින් අසම්පූර්ණව ලිංගික ජීවිතයට පිවිසෙන්න වෙන එක මම දකින්නේ අපරාධයක් විදිහට.මොකද අපි කරන හැම ක්‍රියාවක්ම අවසානයේ සංකේන්ද්‍රණය වෙන්නේ ලිංගිකත්වයටයි කියලා 'ගැනොන් මහත්මයා ලියපු වෛද්‍ය විද්‍යා භෞතවේදය කෘතියේ සඳහන් වෙනවා.


ඉතින් එහෙව් එකේ මේ ගැන හොඳ දැක්මක් සහ අවබෝධයක් ඇත්නම් ජීවිතේ තෘප්තිමත් කරගන්ඩ ලොකු පිටිවහලක් වේවි කියලා මම හිතනවා.කට්ටිය බලලා ඇතිනේ 'බ්ලූ ලැගූන්' කියන චිත්‍රපටිය.ඒකෙ දැක්වෙන විදිහටම තමයි ඇත්තටම ලිංගික සම්බන්ධයක් සඳහා පෙර දැනීමක් අවශ්‍ය නෑ.නමුත් තෘප්තිමත් ලිංගික සම්බන්ධයක් සඳහා හොඳ අවබෝධයක් තියෙන එක වැදගත්.ඒ වගේම සමහරුන්ට මේ අවබෝධය නිකම්ම ඇතිවෙන්නෙත් නෑ.ඒ නිසා තමයි බැඳපු අය ළමයි නෑ කියලා ක්ලින්ක් එකට ආවම ඒ අය නිසි ආකාරයෙන් ලිංගිකව එක්වෙනවද කියලා අපි හරියටම ප්‍රත්‍යක්ෂ කරගත යුතු වෙන්නේ.

හරි ඔන්න මම මූලිකම තැන ඉඳලා විස්තර කරන්ඩයි යන්නේ.සියල්ලම විස්තර නොවෙන්ඩත් පුළුවන්.එහෙම තිබුණොත් කොමෙන්ට් එකක් දාන්ඩ.මම හොයලා ඒ ගැන කියන්නම්.

ලිංගික සංසර්ගය කියන්නේ පිරිමියාගේ සෘජු වෙච්ච ශිෂ්ණය ගැහැනියගේ යෝනි මාර්ගයට ඇතුළු කිරීමෙන් ඇරඹෙන ක්‍රියාවලියක්.ඊට පස්සේ ඉන්පසු පුරුෂයාගේ හෝ ස්ත්‍රියගේ (බොහෝවිට පුරුෂයාගේ) කටී ප්‍රදේශය ඒ කියන්නේ උකුල් ප්‍රදේශය රිද්මයානුකූලව චලනය කිරීම මගින් ශිෂ්ණය යෝනි මාර්ගය තුලම ඉදිරියට හා පසුපසට චලනය කරවීම සිද්ධ වෙනවා.මෙහිදී පුරුෂයාගේ ශිෂ්ණ මුණ්ඩය ප්‍රදේශයේ ඇති ස්නායු අග්‍ර යෝනි බිත්තියේ ඇතිල්ලීම නිසා ජනනය වෙන ස්නායු ආවේග මොළය කරා ගමන් කිරීමෙන් පස්සේ තෘප්තිමත් එහෙම නැත්නම් සතුටුදායක හැඟීමක් මොළයේ ජනනය වෙනවා.

ඒ වගේම ස්ත්‍රියගේ යෝනි බිත්තියේ ඇති ඇදීමට සංවේදී ස්නායු අග්‍ර මෙන්ම අනෙකුත් සංවේදී ස්ථාන (පස්සේ විස්තර කරන්නම් ) උත්තේජනය වෙලා ඒ ස්නායු ආවේග මොළයට ගෙන ගොස් තෘප්තිය නම් හැඟීම ජනිත කරවනවා.

පුරුෂයාගේ සුරාන්තය හෙවත් Orgasm සිද්ධ වෙන්නේ ශුක්‍ර තරලය පිටත් වීමත් සමඟමයි.සුරාන්තය කියන්නේ ලිංගික තෘප්තියේ උච්චතම අවස්ථාව විදිහට හඳුන්වන්න පුළුවන්.පුරුෂයෙක්ට සාමාන්‍ය යෝනික සංසර්ගයකදී සුරාන්තයට පත්වෙන්ඩ ගතවෙන්නේ මිනිත්තු 4ක් විතර කියලා තමයි කියන්නේ.ඒත් ගැහැනු කෙනෙක්ට මේ සඳහා මිනිත්තු 10-15ක් විතර ගත වෙනවලු.මෙන්න මේ වගේ තැන්වලදි තමයි දැනුම අවශ්‍ය වෙන්නේ.ලිංගිකත්වය ඇත්තටම තියෙන්නේ ඊළඟ පරම්පරාව ජනිත කිරීමට උනාට මිනිස්සු ඒක පාවිච්චි කරන්නේ සතුට ලබා ගැනීමේ සහ එකිනෙකා අතර ලොකු බැඳීමක් ඇති කර ගැනීමේ මාර්ගයක් විදිහටයි.ඒකනේ අනිත් සත්තු බොහොමයකගේ ලිංගික ක්‍රියා වසරේ යම් කාලයකට සීමා වෙලා තිබුණට මිනිස්සු වසර පුරාම ලිංගිකව එක් වීම සිද්ධ වෙන්නේ.ඉතින් පිරිමියා තමන්ගේ තෘප්තිය ලබාගෙන අනිත් පැත්ත හැරිලා නිදා ගන්නවනම් ගැහැනියට ඒ තෘප්තිය ලැබෙන්නේ නැත්නම් ඇය කලකිරීමට පත්වීම හෝ වෙන තැනකින් ඒ සතුට සොයා යන්ඩ ඉඩ තියෙනවා.


එතකොට මේ ලිංගික ක්‍රියාව මේ කියන ශිෂ්ණ යෝනි සංසර්ගයට සීමා වෙනවද? අපෝ නෑ.මිනිස්සු මේ ක්‍රියාවට විකල්ප රාශියක් හොයාගෙන තියෙන්නේ.

ස්වයං වින්දනය

මළලසේකර ශබ්ද කෝෂයේ ස්වයං වින්දනය විස්තර කරන්නේ අතින් පිරිමැද කරන ශුක්‍ර මෝචනය කියලා.ඒ උනාට මේක ගැහැනුන්ටත් අදාලයි.අපේ සංස්කෘතියේ ගැහැනුන්ගේ කන්‍යාභාවයට ලොකු අවධානයක් තියෙන නිසා සහ ගැහැනුන් එවැනි ක්‍රියා කිරීම අශ්ලීල යැයි මතයක් ගොඩ නගා ඇති නිසාත් බොහොමයක් ගැහැනු ඒ ක්‍රියාවට යොමු වෙන්ඩ බියක් දක්වනවා.පිරිමින් බොහොමයක් ස්වයං වින්දනයේ යෙදෙන්නේ සිය අතින් ශිෂ්ණය අල්ලාගෙන අත ඉදිරියට සහ පසුපසට චලනය කරවීමෙන්.ගැහැනුන්ට මේ සඳහා ඔවුන්ගේ ක්ලිටොරිසය හෙවත් භගමණිය අතින් පිරි මැදීමෙන් මෙන්ම කන්‍යාභාවය නැති අයට යෝනි මාර්ගයේ ඉදිරිපස බිත්තියේ ඇතුල් පැත්තේ ඇති 'G ස්පොට්' ලෙස හඳුන්වන සංවේදී ස්ථානය පිරිමැදීමෙන් සහ ශිෂ්ණයට සමාන වෙනත් උපකරණ භාවිතයෙන් සුරාන්තයට එළඹෙන්න පුළුවන්.
























ඒ සඳහා විවිධ වර්ගවල කෘත්‍රීම උපකරණ හදලා තියෙනවා.ලංකාවේ මේවා හොයාගන්න එක එච්චර පහසු නැති උනාට ලෝකේ අනිත් රටවල මේවා පහසුවෙන් ලබා ගන්ඩ පුලුවන්.මේ උපකරණ අතර කෘත්‍රිමව කම්පණය වෙන ඒවා වගේම ක්ලිටොරිසය උත්තේජනය කරන සහ G ස්පොට් එක උත්තේජනය කිරීම සඳහාම විශේෂයෙන් නිපදවූ උපකරණත් දකින්න පුළුවන්.

පිරිමින්ටත් කෘත්‍රීම යෝනි මිළදී ගන්ඩ පුළුවන්.ඒවාත් විවිධ වර්ගවලින් දකින්ඩ ලැබෙනවා.








දැන් මේවා ගැන කිව්වේ මේවා ලංකාවේ හොයාගන්ඩ අපහසු උනාට මේවා ලංකාවට අවශ්‍යයි කියන මතේ මම ඉන්න නිසා.මොකද මිනිස්සුන්ගේ ලිංගික අවශ්‍යතා නිසි ලෙස සැපිරුනේ නැති උනාම මානසිකව ආතතියක් නිර්මාණය වෙන්ඩ පුළුවන්.ගොඩක් වෙලාවට සමහරු සමාජයේදි පුපුරා හැලෙන්නේ මේ ලිංගික තෘප්තිය ප්‍රමාණවත්ව නොලැබීම නිසා වෙන්ඩ පුළුවන්.ඉතින් මේ ආතතිය වෙනත් විදිහකට පිට කරන්ඩ උත්සාහ කිරීම තුලින් වෙනත් සමාජීය ප්‍රශ්න නිර්මාණය වෙනවා වගේම ලිංගික අඩන්තේට්ටම් කිරීම් අපචාර ක්‍රියා ආදියටත් හේතුවක් වෙන්ඩ පුළුවන්.මේ කියන ස්වයං වින්දන ක්‍රමවේදය හැමදාටම පාවිච්චි කළයුතු දෙයක්ය කියලා මම කියන්නේ නෑ.ඒත් බිරිඳ දරු ප්‍රසූතියකට සූදානමින් ඉද්දි වගේම ඉන් පසුව ටික කාලයක් යනකං, හමුදාවේ ඉන්න සැමියා නිවාඩුවට ගෙදර එනකන් වගේම මැදපෙරදිග ගිය බිරිඳ ගෙදර එනකං වගේ අපි දකින ප්‍රයෝගික අවස්ථාවලට ස්වයං වින්දනය කියන්නේ බොහොම හොඳ විකල්පයක්.

ගුද රමණය

මේ කියන්නේ පුරුෂයාගේ ලිඟුව ස්ත්‍රියගේ හෝ වෙනත් පුරුෂයෙකුගේ ගුද මාර්ගයට ඇතුළු කිරීමෙන් සිදුකරන සංසර්ගයයි.යෝනි මාර්ගයට වඩා ගුද මාර්ගයේ ඇති තද භාවය සහ එම ක්‍රියාවේ ඇති අශ්ලීල භාවය සමහරුන් මේ ක්‍රමය වෙත යොමු කරවනවා.ඒ වගේම පිරිමි සමලිංගිකයින් ගුද මාර්ගය හරහා පුරස්ථිති ග්‍රන්ථිය උත්තේජනය කරවා ගැනීමටත් මේ ක්‍රියාව යොදා ගන්නවා.නමුත් මෙහිදී ගුද මාර්ගයේ මෙන්ම ශිෂ්ණයේ ද තුවාල ඇති වීම මෙන්ම ගුද මාර්ගය විශබීජවල තෝතැන්නක් වීම බොහෝ විට ලිංගිකව සම්ප්‍රේශනය වන වගේම වෙනත් සාමාන්‍ය මුත්‍රා ආසාදන වැනි තත්ත්ව ඇති කිරීමට සමත් වෙනවා.මෙහිදී පැවසිය යුතු කරුණක් වන්නේ සමාජ රෝගයක් බෝවීමේ අවධානම සාමාන්‍ය ශිෂ්ණ යෝනි සංසර්ගයකදී මෙන් 50 ගුණයක වැඩි වීමක් ගුද සංසර්ගයේදී තියෙනවා කියන එක.

මෞඛ සංසර්ගය

මෙහිදී පුරුෂයාගේ ලිංගය ස්ත්‍රිය විසින් තොල් හා දිව ආශ්‍රිතව උත්තේජනය කරනවා.එමෙන්ම ස්ත්‍රියගේ ක්ලිටොරිසය හා අනෙකුත් සංවේදී ස්ථාන පුරුෂයා සිය දිවෙන් හා තොල් ඇසුරින් උත්තේජනය කිරීමත් අයත් වෙන්නේ මේ කාණ්ඩයටමයි.මේ ක්‍රියාවෙන් ස්ත්‍රියක් සුරාන්තයට පත් කිරීමට ද හැකි නිසා ස්ත්‍රියකට උපරිම ලිංගික තෘප්තිය ලබා දෙන්න මේ ක්‍රමය භාවිතා කරන්ඩ පුළුවං.වැදගත්ම දේ තමයි ස්ත්‍රීන් සුරාන්තයට පත් උනාට පිරිමින්ට වගේ ලිංගික හැඟීම් නැතිවෙලා යන්නේ නෑ.ඒ අයට අවශ්‍යනම් පිට පිට සුරාන්ත කීපයක් උනත් ලබාගන්ඩ පුලුවන්.ඒ නිසා ශිෂ්ණ යෝනි සංසර්ගයට පෙර ස්ත්‍රිය සුරාන්තයට පත් කිරීම ඇය තෘප්තිමත් කිරීමේ හොඳ ක්‍රමයක්.මුඛ සංසර්ගයේදීත් සමාජ රෝග පැතිරීමේ අවධානමක් තියෙනවා.ඒක නිසා තමයි විවිධ රසවලින් සහ සුවඳින් යුක්ත කොන්ඩම් (උපත් පාලන කොපු ) නිර්මාණය කරලා තියෙන්නේ.

කළවා අතර සිදු කරන සංසර්ගය

මෙහිදී ස්ත්‍රියගේ කළවා අතරට යම් ලිහිසි කාරකයක් දමා එකට ළං කළ කළවා අතරින් ශිෂ්ණය ගමන් කරවා සංසර්ගයේ යෙදෙනවා.මේ ක්‍රියාව බොහෝ විට සිද්ධ කරන්නේ ස්ත්‍රියගේ කන්‍යාභාවය රැක ගැනීමට සහ දරු පිළිසිඳීමක් වළක්වා ගැනීමට.මේ වගේම පියයුරු අතර ශිෂ්ණය තබා සංසර්ගයේ යෙදීමත් දකින්ඩ පුළුවන්.මේ කුමන ක්‍රමය භාවිතා කලත් යෝනි මාර්ගය අවට ශුක්‍ර තරලය ගෑවීමෙන් දරු පිළිසිඳ ගැනීමක් සිද්ධ වෙන්ඩ පුළුවන්.ඒ නිසා ඒ ගැනත් සැළකිලිමත් වෙන එක හොඳයි.

සමලිංගිකත්වය මානසික රෝගයක් විදිහට දැං සැලකෙන්නේ නෑ.ඒ උනත් එහෙම නොවෙන එක එහෙම වෙනවට වඩා හොඳයිනේ.ඒත් ඉතිං සමහරුන්ට එහෙම නැතුවම බැරි වෙනවා.ඉතිං එහෙම අය අනිත් අයව පොළඹවා ගන්නැතුව තමුන් වගේම වෙන කෙනෙක් හොයාගන්නවනං තමයි හොඳ.

එයිට අමතරව සතුන් එක්ක ලිංගිකව එකතු වීම සහ මෘත ශරීර සමඟ ලිංගිකව එකතු වීම ආදී මානසික රෝගමය තත්ත්ව ඇති අයත් සමාජයේ ඉන්නවා.අනිත් භයානකම කට්ටිය තමයි බාල අපරාධ සිද්ධ කරන්නන්.ඔවුන් කුඩා දරුවන් සිය ලිංගික අවශ්‍යතා සඳහා භාවිතා කරන්නේ කුඩා දරුවන්ගේ ප්‍රතිරෝධය අවම වීම නිසා වගේම මානසිකව ඔවුන් රෝගීන් වීම නිසයි.

කෙසේ වෙතත් ලංකාවේ ශිෂ්ණ යෝනි සංසර්ගය හැර අනෙකුත් සියළුම ආකාරයේ ලිංගික ක්‍රියා දණ්ඩ නීති සංග්‍රහයේ 365A වගන්තිය යටතේ නීතිය ඉදිරියේ වරදක්.ඒ කියන්නේ ස්වයං වින්දනය, ගුද රමණය, මෞඛ සංසර්ගය ආදී සියල්ලම අශ්ලීල ක්‍රියා ලෙස නම් කරලා දඬුවම් කරන්ඩ පුළුවන්.මේවා ආගමික බලපෑම් මත සෑහෙන කාලෙකට ඉස්සර සම්මත උනු නමුත් සංශෝධනය විය යුතු යල් පැනගිය නීති.නමුත් කවුරුත් ඒ ගැන අවධානයක් දක්වන්නේ නෑ.ඒ නිසා කරන දෙයක් පරිස්සමෙන් හොඳේ...






මේ රූපේ තියෙන්නේ ලිංගික ක්‍රියාවේදී භාවිතා වෙන ලිංගික ඉරියව් කීපයක්.ඒවා අතරින් මුලින්ම තියෙන ඉරියව්ව තමයි බහුලවම භාවිතා වෙන්නේ.තමංගේ සහකරු/සහකාරියගේ කැමැත්ත ඇතුව අනිත් ඕනෑම ඉරියව්වක් භාවිතා කළාට ගැටළුවක් නෑ.වැදගත්ම දේ තමයි අන්‍යොන්‍ය අවබෝධය.

11 November 2012

හිතේ දුකට



දිගින් දිගටම ඉස්පිරිතාලේ ය.උදේ ඉඳං හිටං ඉඳලා හවස් වෙද්දි කකුල් රිදෙන්ඩ පටං ගන්නවාය.මේ දවස්වල ඉන්නේත් නාරීවේදී වාට්ටුවකය.එකම පැමිණිල්ලක්ය උන්ට ඇත්තේ.ඒක්කෝ ලේ යනවා වැඩිය.නැත්තං ඔසප් වෙන්නේ නැත.සමහරුන්ට පිළිවෙලට ඔසප් වෙන්නේ නැත.

වාට්ටුවට එන හැම ගෑනු කෙනෙක්ගේම යෝනි පරීක්ෂාවක් කළ යුතුය.තව පොඩ්ඩෙන් අවුරුදු 42ක් පරණ කන්‍යා පටලයක් බිඳලා පොලීසි ගානෙත් රස්තියාදු වෙන්ඩ වෙනවාය.උන්දෑව පරීක්ෂා කරන ඇඳට නග්ගලා සාය ඉහළට උස්සලා කකුල් නවලා දණිස් ඈත් කරන්ඩ කිව්වාම ඒක තේරුණේ නැත.ජීවිතේ පලවෙනි පාරට එහෙම දෙයක් යෝජනා කළා වගේ එහෙට මෙහෙට ඇඹරෙන කොට අපේ ගෑනු ළමයෙක් 'ඔයා බැඳලද ?' කියලා ඇහුවායින් මම ගස් නොගිහිං බේරුණේය.අවුරුදු 42ක් මොකට ඕක පරිස්සං කළාද මම නං දන්නේ නැතිය.

මේවා දවසගානේ බලන්ඩ ලැබීම අල්ලන්ඩ ලැබීම ආතල් කියලා කට්ටියට හිතෙන්ඩ පුළුවංය.මමද හිතං හිටියේ එහෙමය.ඒ උනාට උදේ ඉඳං හවස් වෙනකං නාකි ඒවා, තරුණ ඒවා, සුදු ඒවා, කලු ඒවා, ශ්‍රාවයන් එන ඒවා, වේලිලා ගිය ඒවා, ෂේව් කළ ඒවා සහ නොකර 'අපි වවමු රට නගමු' තරඟවලට ඉදිරිපත් වෙන ඒවා ආදී ලෙසට දැකලා දැකලා දැකලා හවස් වෙනකොට ජීවිතේ අනියත බව, අර්ථවිරහිත ඒකාකාරී නිෂ්ඵලත්වය මනාව අවබෝධ වෙනවාය.ඊටත් මෙහේ එන්නේ ලෙඩ තියෙන ඒවාය.සමහර ආසාදන සහිතව ආ අයගේ ගැබ්ගෙල පරීක්ෂා කරන්ඩ ළංවෙලා බැලුවාම නහයක් නැතුව ඉපදුනා නං යැයි හිතෙන වෙලාවල් ද තියෙනවාය.

අපි පහුගිය අවුරුදු හතර මුළුල්ලේ දහසකුත් එකක් විභාග සඳහා පෙනී සිට ඇත්තෙමු.සමහරක් ඒවා අසමත්ව නැවත මුහුණ දීමට සිදු වූවද අවසානයේ ජයග්‍රාහීව අවසන් වසරේ මහාචාර්ය ඒකකවල පුහුණුව ලැබීම දක්වා සුදුසු කම් ලැබීමි.


දැං ඉතිං තියෙන්නේ අවසාන විභාගයයි.එය විභාගයක් ලෙස ලුහුඬෙට දැක්වීම යුතු නැත.ඒක ඇවිල්ලා විභාග සංකීර්ණයකි.තව සති පහකින් ප්‍රසව හා නාරිවේදය සායනික පරීක්ෂණය ඇත.ඉන් පසු ළමාරෝග පිළිබඳ මහාචාර්ය ඒකක පුහුණුවට පසුවත් මනෝවේදය (psychiatry) පුහුණුවට පසුවත් සායනික පරීක්ෂණ පැවැත්වේ.ඉන්පසු වසර අග තොග අවසන් කිරීමේ මහා සේල් දානවා වාගේ ප්‍රධාන විශය ධාරාවන් පහේ ලිඛිත පරීක්ෂණයන් පැවැත්වේ.ඒවා එක එකක් බහුවරණ සහ රචනා ලෙස ප්‍රශ්න පත්‍ර දෙක බැගින් සමන්විතය.ඊට පස්සේ සාමාන්‍ය වෛද්‍ය විද්‍යාවට සහ ශල්‍ය වෛද්‍ය වේදයේ සායනික පරීක්ෂණ පැවැත්වේ.ඒවා එක එකක් කෙටි පරීක්ෂණ හා දිගු පරීක්ෂණ ලෙස පරීක්ෂණ දෙක බැගින් යුක්තය.ඉන්පසු ඇත්තේ නාරි හා ප්‍රසව වේදයේ වාචික පරීක්ෂණයයි.ඉන්පසු සාමාන්‍ය වෛද්‍ය විද්‍යාවේ ස්ථාන පරීක්ෂණයක් හෙවත් ස්පොට් එකක් ඇත.එතනින්ද අවසන් නැත.ඉන්පසුව එන්නේ ප්‍රජා වෛද්‍ය විද්‍යාවේ පරීක්ෂණය සහ චර්යා අධ්‍යයනය හෙවත් බිහේවියරල් ලිඛිත පරීක්ෂණයන්ය.මේවා එක එකක් කොතරම් අමාරු පරීක්ෂණ දැයි පැවසීම අනවශ්‍ය යැයි හඟිමි.

ඔය සියල්ලම සමත් උවහොත් MBBS ලෙස හඳුන්වන මෙව්වා එක දෙනවාය.අවසාන විභාගයේ ප්‍රථිපල මත ලංකාවේ ඒ වර්ෂයේ සියලුම සිසුන්ගේ කුසලතා ස්ථානය සලකා බලා පත් වීම් ලබාදෙන රෝහල තෝරනු ලැබේ.මේ පත්වීම් දෙන්නේ මාස හත අටකට පසුව නිසා ඒ අතරතුර මේසන් වෘත්තිය වැනි වෙනත් රැකියාවක් කළ හැක.නමුත් එවිට වෙද නලාවට වඩා මේසන් හැන්දට අත හුරු වීමට ඉඩ ඇති බැවින් නීති විරෝධී ලෙස ප්‍රයිවට ප්‍රැක්ටිස් එකක් කළ හැක.නැතිනම් මේ මාස කීපය අවසානයේ අවුරුදු ගාණක් තිස්සේ ඉගෙනගත් සියලු සබ්බ සකලමනාවම අමතක වී ගොස් 'අපොයි සල්ලි' අවස්ථාවක් උද්ගත වෙනු වැළැක්විය නොහැක.

පත්වීම කිව්වාට ලැබෙන්නේ සීමාවාසික පත්වීමය.ඒ කියන්නේ ඕටී නොගෙවන පැය 24ක පමණවන වැඩමුරවලින් යුතු වසරක කාලයක් කළ යුතු පුහුණුවේම තවත් කොටසකි.වැටුපක් ලෙස දීමනාද සමඟ රු.34,000ක් පමණ ලැබෙන්නේය.අවුරුදු පහක් වෙන මොනවා හරි ඉගෙන ගත්තානම් මේ වගේ දෙතුන් ගුණයක් හොයන්ඩ ඇහැකි රස්සාවක් හොයා ගන්ඩ පුළුවං ය.පත්වීම ස්ථිර උනාට පසු ඒ කියන්නේ සීමාවාසික පුහුණුව අවසන් වූ පසු රු. 50,000ක් පමණවන වැටුපක් ලැබේ ලු.ලංකාවේ සමස්ත වෘත්තිකයින්ගේ ආදායම් හා සසඳා බැලූ කල මැද හරියේ අගයක් ගන්නා මේ වැටුප කන්නට සිදුවූ සහ සිදුවන කට්ටේ හැටියට ඇබින්දක්වත් වටින්නේ නැත.


නිවසක් තනා ගැනීම, කසාදයක් කර ගැනීම, වාහනයක් ගැනීම, ළමයි හැදීම, බල්ලෙක් බළලෙක් ඇති කිරීම, ඉඳහිට හෝ චිත්‍රපටියක් බැලීමට යාම ආදී ආශාවන් වෛද්‍යවරයෙකුටද පොදු වූ ඒවා වේ.නමුත් මුදල් සෙවීමට ප්‍රයිවට් ප්‍රැක්ටිස් කරන වෛද්‍යවරයා නරුමයෙකි.මිනිසුන්ගේ දුක නොතේරෙන මිනිස් යන්ත්‍රයකි.

මුදල් සෙවීමට දිනකට පැය 12කට වඩා වැය කර ජීවිතයේ තෘප්තියක් ලැබීමට අසමත්වන මේ වෘත්තිය කෙරේ මා තුල දැන් ඇත්තේ කළකිරීමකි.මේ වෘත්තිය සුදුසු වන්නේ හොඳ මූල ධනයක් ඇති වෙනත් ව්‍යාපාර ආදියෙන් හොඳ ආදායමක් ඇති අයෙකුට සිතේ සතුටට කිරීමට ය.නමුත් දැන් හැරෙන්නට පමා වැඩිය.මාගේ මනස වෙනත් වෘත්තියකට යොමු වීමට නොහැකිවන ලෙසට මේ අධ්‍යාපන ක්‍රමය විසින් මොට කරනු ලැබ ඇත.මේවාට වගකිව යුත්තේ 'මේ විභාගෙ කොහොම හරි කර ගන්ඩකෝ.ඊට පස්සේ ජීවිතේ ඔක්කොම ප්‍රශ්න ඉවරයි.ඊට පස්සේ වැඩ අමාරු නෑ'යි කියා මා නොමග යැවූ උසස් පෙළ ගුරුවරුන් ය.

මේ සියල්ල කීවේ හිතේ දුකටය.අද මාගේ 9වන ප්‍රේම සංවත්සරයයි.අවුරුදු 9ක් ප්‍රේම කරමින් තවමත් ආදායමක් නැතිව විවාහ වීමට විභාග අවසන් නොවීම නිසා ලතැවෙන අසරණ කාළකන්නි පෙම්වතෙකුගේ ප්‍රේම අඳෝනාවය මේ...


01 November 2012

අත් හැරීම සහ සොයා යෑම.



විකියා කියන්නේ මගෙත් එක්ක බෝඩිමේ ඉන්න මගේ සඟයෙක්.මාත් එක්ක එකම ඉස්කෝලෙ හිටියට ඉස්කෝලෙදි එච්චර ආශ්‍රය කරලා තිබ්බේ නෑ.විකියගේ තාත්තා ඉන්නේ ඕමාන්වල.ඒ කිව්වේ රස්සාව කරන්නේ එහේ.හැබැයි දවස් දහයක විතර නිවාඩුවක් හම්බ උනත් කෙලින්ම ගෙදර එනවා.ඉතිං ඒ දවස්වලට අපිට විකියා ගනේ චොක්ලට් හම්බ වෙනවා.ඕමාන්වල ඉඳං ඇවිල්ලා විකියලගේ ගෙදරත් තිබිලා අපේ බෝඩිමට එනකොට දියවෙලා තිබුණත් නිකං හම්බවෙන චොකලට්වලට පොර ටෝක් නොදී අපි කනවා.හරියටම කිව්වොත් බොනවා.

මේ විකියලගේ තාත්තා ගෙදර ආවම (කොහොමත් අවුරුද්දකට තුන් හතර පාරක් එනවා...අපි කියන්නේ ශ්‍රී ලංකන් එක පෝසත් කරවනවා කියලා ) විකියා බෝඩිමට අරං එනවා සබං කෑල්ලක්.කෑල්ලක් කිව්වට ඒක ලොවෙත් සයිස් එකක්.ඒක හින්දා සබං ගෙඩියක් කියලා කිව්වට වැරැද්දක් නෑ.මේ සබං කෑල්ලත් ඉතිං ඕමාන් බඩු තමයි.ඔටුතෙල් දාලා හදන එකක්ද දන්නෙත් නෑ.මේකේ සිරාම දේ තමයි ඒකෙ සුවඳ.ඒක තිබ්බාම මුළු බාත් රූම් එකම වරකා සුවඳයි


මේ සබං කෑල්ල ගාලා නාගත්තම දවසම වරකා කෑවා වගේ තමයි.කෝඳුරුවොනං වහන්ඩ එන්නේ නෑ.ඒ උනත් හිතට හරි නෑ.

එක දවසක් මේ ගැන කතාවක් ඇදිලා ආවම ඒ ඔස්සේ යද්දි ආව අදහසක් උනේ අපිට මේක වරකා සුවඳ උනාට ඕමාන් කාරයින්ට මේකෙන් වරකා සුවඳක් එන්නෑනේ කියලා.මොකද උං වරකා සුවඳ දන්න එකක්යෑ.ඉතිං උන්ට ගානක් නෑ.අවුල තියෙන්නේ විකියලෑ තාත්තා එහෙ උන්ට දෙන්ඩ කියලාඅ වරකා කෑල්ලක් ගෙනිච්ච දාට තමයි.එතකොට උං කියයි 'ඒ මොනවද බං මේ පළතුර?? මේක හරි සබං සුවඳයිනේ...කොහොම්ද උඹලා මේක අප්පිරියා නැතුව කන්නේ??' කියලා.

දෙවෙනි සිදුවීම.

ඔය කට්ටිය දන්නවා ඇතිනේ The big bang theory කියලා ටීවී සීරීස් එකක් තියෙනවා කියලා.මමනං අහරිම ආසාවෙන් බලපු එකක්.ඒකේ හාස්‍යය මතුකරන්නේ උපහාසය තුලින් මිසක් වැටිලා පෙරලිලා නෙමෙයි නේ.ඒකේ මුල හරියේ කොටසක ශෙල්ඩන් කියනවා තමංගේ රූමා හෙවත් ලෙනර්ඩ්ට මෙන්න මෙහෙම කතාවක්.මට ඒකේ ශෙල්ඩන් කියපු සතාගේ නම නං මතක නෑ.අපි දැනට ගම්මුකෝ කුරුමිණියා කියලා.

'මචං උඹ දන්නවද කුරුමිණියට රස්නේ සීතල දැනෙන්නේ නෑ කියලා.උංට එහෙම අවට පරිසරයේ උෂ්ණත්ව වෙනසක් තේරෙන්නේ නැති උනාට සීතල වැඩි වෙනකොට උංගේ ක්‍රියාකාරීත්වය අඩු වෙනවා.ඒ කියන්නේ උංගේ ඇවිදීම වගේ දේවල්වල වේගය අඩු වෙනවා.ඉතිං හිතපං බැරිවෙලාවත් උං බුද්ධිමත් සත්තු ජාතියක් වෙලා අපි වගේ ජීවත් වෙන්ඩ ගියානං එහෙම, සීතල දවසකට කුරුමිණියෙක් උගේ යාලුවට කියයි, 'ඒයි මචං එළියට යනවනං ස්වෙටර් එකක් ඇඳගෙන පළයං.මොකද අද එළිය හරි ස්ලෝ....'කියලා


සිදුවීම තුන,

ඔන්න අපි අපේ නාට්‍යයක් පුරුදු වෙවී හිටියා අපේ නින්නාදෙට කරන්ඩ.මේක අපි කරන අන්තිම නාට්‍යය වෙයි කියලා හිතපු හින්දා අපි හිතුවා ඔන්නොහේ මේකට ඩබල් මීනිංග් ටිකක් දාලා කට්ටියට වෙනම ෆන් එකක් දෙමු කියලා.ඔන්න ඉතිං පුරුදු විදිහට කට්ටිය සෙට් වෙලා එක එක අදහස් දදා ඉන්න කොට තමයි වෙරළුමල් සුවඳ ගැන කතාවක් ඇදිලා ආවේ.එකෙක් යෝජනා කළේ නාට්‍යයේ තැනක 'අම්මෝ වෙරළු මල් සුවඳක් එනවා.' කියලා කියන දෙබසක් දාන්ඩ.ඉතිං ඒකට එතන හිටපු අපි කීප දෙනෙක් හිනා උනාට කෙල්ලන්ට එහෙම තේරුණේ නෑ.එක කෙල්ලෙක් ඒකේ තියෙන හාස්‍යය මොකක්ද කියලා ඇහුවම ඔන්න කොල්ලෙක් ඒ ගැන කියලා දුන්නා.ඒ කියන්නේ වෙරළු මල්වල සුවඳ හරියට ශුක්‍ර තරලයෙන් එන ගන්ධයට බොහොම සමානයි කියලා පැහැදිලි කළාම අර කෙල්ල කියනවා,

'ආ..... වෙරළු මල් සුවඳ දන්නවයෑ....' කියලා.


ඔන්න මේ සිදුවීම් තුනම කිව්වේ අපි අපේ දැනුම ගොඩ නගන විදිහ කියන්ඩ.අපි අපේ අලුත් සංවේදනයන් මතකයට එක්ක කර ගන්නේ පරණ දැනුම එක්ක ගලපලා.ඒ ඔස්සේ හිතලා.ශ්‍රී ලංකාවේ ඉපදිච්ච එකෙක් විදිහට මම උපතින් සිංහලයෙක්, බෞද්ධයෙක් සහ ශ්‍රී ලංකා නිදහස් පාක්ෂිකයෙක්.මගේ චින්තනය සම්පූර්ණයෙන්ම ගොඩ නැගුනේ ඔය මූලික දැනුම පද්ධතීන් මත.ඒ මුලික පද්ධතීන් මත යැපිලා මගේ නව දැනුම ගොඩ නගන එක අවුල් කියලා මම හිතුවේ අපේ මිනිස්සු ගොඩක් දේවල් හේතුවක් නැතුව, ප්‍රශ්න කිරීමක් නැතුව තමංගේ මුල් දැනුමට අනුගත නොවන හින්දාම නිකම්ම ප්‍රතික්ෂේප කරනවා දැක්කම.

ඒ නිසා මම මට මගේ දෙමව්පියන්ගෙන් උරුම වෙච්ච දේශපාලන පක්ෂය අත ඇරියා.ඊට පස්සේ කිසිවකට නොබැඳී දේශපාලනය දිහා බැලුවම පෙනුනා කවුරුවත් අපි වෙනුවෙන් දේශපාලනය කරන්නෑ කියලා.දැං මම පක්ෂයක් නැති එකෙක්.ඒ ඔස්සේ ගිහිං දැනුම ගවේශනය කරද්දි මට තේරිච්ච දෙයක් තමයි පාලකයා කියන සංකල්පය ඇතිතාක් පාලිතයා යනු සාධාරණය ඉෂ්ඨ නොවෙන තැනැත්තෙක් වග.

දෙවෙනි දැනුම් පදනම වෙච්ච ආගමත් අත ඇරියා.ඒකට ගොඩක්ම හේතු උනේ මට ආගම තුල ගැටලු මතු වීම.ආගමෙන් වියුක්ත වෙලා ආගම් දිහා බැලුවාම මට තේරුණේ ඒකත් දේශපාලනයේම වෙනස් මුහුණුවරක් කියලා.ආගමික නායකයින් බොහෝවිට බලය ඔස්සේ යන්නන්.ආගම් නිසා ඉතිහාසය භීෂණාත්මක වෙලා තියෙන බව ඒ ඒ භීෂණවලට දායක උනු ආගමේ ඇත්තන් ඇර අනිත් අය පිළිගන්නවා.රටවල් යටත් කර ගන්ඩ වගේ යටත් විජිත පාලනයටත් ඒ වගේම රටවල් ඇතුලේ රජවරු පෙරලන්ඩ වගේම රජවරුන්ට පවතින්ඩත් ආගම පාවිච්චි කළ හැටි හදවතින්ම පිළිගන්ඩ ඒ ඒ ආගමිකයින් කැමති වෙන්නෙ නෑ.මොකද ඒකෙන් ඔවුන්ගේ මූලික දැනුම පද්ධතිය බරපතල විදිහට ප්‍රශ්න කිරීමට ලක් වෙන හින්දා.

කෙනෙක්ට කියන්ඩ පුළුවන් මූ හැම එකේම කෲර පැත්ත විතරක් අරගෙන පොරටෝක් දෙනවා කියලා.ඇත්ත ආගම්වලින් මිනිස්සුංගේ හිත හදාගන්ඩ මනස නිදහස් කරගන්ඩ දේවල් සිද්ධ වෙලා තියෙනවා.හැබැයි හැම ආගමක්ම ඒ ටික කරනවා.එතකොට මගෙ එක විතරයි හරි උඹලගෙ එක වැරදියි කියලා කෑ ගහන එකේ තේරුමක් නෑ.කට්ටිය එහෙම කෑ ගහන්නේ වෙනත් දැනුම පද්ධතියකින් තමංගේ පූර්ව දැනුමට අභියෝගයක් මතුවෙනකොට ඒක බේරගන්ඩයි.එහෙම නැතුව නියම සත්‍ය සෙවීමේ උවමනාව ඇති අය ඉන්නවනං තමංගේ දරුවන්ට හැම ආගමක්ම උගන්නලා, හැම දේශපාලන පක්ෂයක් ගැනම කියලා දීලා ඌට ඒක තෝරගන්ඩ දෙන්ඩ ඕනේ.නමුත් වෙන්නේ ඒකේ අනිත් පැත්ත.ඒකා ආගම අත ඇරියොත් පවුලෙනුත් එළවනවා.වෙන පක්ෂෙකට ගියොත් කතා කරන එක උනත් නවත්තලා දාපු අය ගැන කවුරුත් අහලා දැකලා ඇති නෙව.




29 October 2012

වැදගත් විශයය....11 ( Sex Education in Sinhala )



ඔසප් චක්‍රය

බොහෝ ආගම් සහ සංස්කෘතිවල ස්ත්‍රීන්ගේ ඔසප් වීම අශුද්ධ දෙයක් විදිහටනේ සළකන්නේ.අනේ මන්දා ඉතිං රුධිරය එක්ක පටක ටිකක් තමයි පිට වෙන්නේ.ඒක ඉතිං තුවාලයක් තියෙන එකෙක්ටත් පොදුයි නොවැ.ඒ විදිහට බැලුවම ආගමික ස්ථානවලට, උත්සවවලට තුවාලකාරයින්ටත් සහභාගි වෙන්ඩ නොදී ඉන්ඩ ඕනෑ.

ඔසප් චක්‍රය, ආර්ථව චක්‍රය මේ කොයි විදිහට කිව්වත් කියවෙන්නේ එකම දෙයක් ගැන.ඒ ස්ත්‍රීන්ගේ ගර්භාශයේ ඇතුළු බිත්තිය සාමාන්‍යයෙන් දින 28කට පාරක් ගැලවිලා රුධිරය එක්ක පිටවෙලා යන එකට.

මේක ගෑනු ළමයි ලැජ්ජා හිතන්ඩ දෙයක්වත් පිරිමි අමුතු විදිහට බලන්ඩවත් අවශ්‍ය දෙයක් නෙමෙයි.මේක ස්වභාවධර්මයේ විශිෂ්ඨ ක්‍රියාවලියක්.ඒකෙන් බලාපොරොත්තු වෙන්නේ සෑම ඩිම්බයක්ම සංසේචනය වෙලා ආවොත් පැලවෙලා වර්ධනය වෙන්ඩ අබාධවලින් තොර සරු පටකයක් ලබා දෙන එක.

වටෙන් වටෙන් කියලා තේරුමක් නෑනේ.ඔන්න එහෙනම් පටං ගම්මු මේක ගැන හරියට කතා කරන්ඩ.

ගැහැනු අයගේ ජනක සෛල ඒ කියන්නේ ඊළඟ පරම්පරාව බිහි කරන්ඩ දායක වෙන සෛල හැදෙන්නේ ඩිම්බ කෝෂයේ කියලා දන්නවනේ.පිරිමින්ගේ වෘෂණවල දවස ගානේ අළුතෙන් ශුක්‍රාණු හැදුනට ඩිම්බ කෝෂවල ඩිම්බ එහෙම හැදෙන්නේ නෑ.ගෑනු දරුවෙක් ඉපදෙනකොට එයාගේ ඩිම්බ කෝෂවල ඩිම්බ විශාල ප්‍රමාණයක් තියෙනවා.හැබැයි මේවා පරිණත වෙලා නෑ.සංඛ්‍යාත්මකව කිව්වොත් ඉපදෙන්ඩ කළිං මිලියන 7ක් විතර වෙන මේ අපරිණත ඩිම්බ සංඛ්‍යාව විවිධ හේතු නිසා තෝරාගැනීම්වලට ලක් වෙලා ඉපදෙන කොට ඉතුරු වෙන්නේ මිලියන 2ක් විතර.මේ මිලියන දෙකෙනුත් බාගයක්ම වැඩ කරන්නේ නෑ.ඒ කියන්නේ හොඳ ඒවා ඉතුරු වෙන්නේ මිලියන එකක් විතර.මේ ඩිම්බ ඌණන විභාජනයෙන් බෙදිලා පරිණත වෙලා එපායෑ සංසේචනය වෙන්ඩ.ඉතිං ඒවා මුල් කාලෙම පරිණත වීමේ පළමු පියවර තියනවා.ඒ කියන්නේ ඌණන විභාජනයේ මුල් අවස්ථාවකට ඇවිල්ලා නවතිනවා.මේ ඌණන විභාජනයේ අවස්ථාවට කියන්නේ 'ප්‍රාග් කලාව' කියලා.මේකෙදි ඩිම්බ සෛලයේ වර්ණදේහ සංඛ්‍යාව දෙගුණ වෙලා ලෑස්තිවෙලා ඉන්නවා වාරය ආව ගමන් ඉතුරු ටික කරගෙන යන්ඩ.


ඔන්න ඉතිං ඔය විදිහට ඩිම්බ තියෙන වගක්වත් දන්නැතුව ගෑනු දරුවො වැලිබත් උයනවා, බෝනික්කො නලෝනවා, මොන්ටිසෝරි යනවා, ඉස්කෝලෙ යනවා අර මෙව්වා දවස එනකං.අන්න එදාට මේ කෙල්ලව ලෝකෙං වහලා කාමරේකට දාලා හංගගෙන උපදෙස් දෙනවා කොල්ලො ආශ්‍රය කරන්ඩ එපා, දැං ඉතිං පරිස්සං වෙන්ඩ, ලෝකෙ හරි කෲරයි, උඹ මලක් වගෙයි ආදී විදිහට.ඔන්න ඉතිං උදේ පාන්දර නාවලා, කොස් අත්තකට කැත්තෙං කොටලා, නාවපු කළෙත් බිඳලා, අළුත් රත්තරං කරාබු ජෝඩුවක් එහෙම දාලා ගමටම කියලා හෙන උත්සවයකුත් ගන්නවා.මේ උත්සවයේ අරමුණ විදිහට මම දකින්නේ 'ඔන්න බොලව් අපේ එකී දැං බඩ වෙන්ඩ ලෑස්තියි.ඇහැක් එකෙක් ඉන්නවානං ඇන්න පලයවු' කියලා කෑගහලා කියන්නැතුව කියන විදිහ කියලා.

මේ විදිහට පළමු ඔසප් රුධිරය පිට වීමට මල්වර වීම, ලොකු ළමයෙක් වීම, ගෙට වීම වගේම සමහර පැතිවල *ක මල පීදීම කියලත් කියනවා කියලයි සන්නස්ගල සර් කියලා දුන්නේ.ඔය ඉතිං මගෙත් සිහිය වෙන වෙන පැතිවලටමනේ යන්නේ.කොහොම හරි මේ වෙද්දි ඒ කියන්නේ මල්වර වෙනකොට ඩිම්බ ඉතුරු වෙලා තියෙන්නේ ලක්ෂ තුනක් විතර.

ඔසප් චක්‍රය සාමන්‍යයෙන් දවස් 28ක චක්‍රයක් විදිහට සැළකුවාට ඒක දවස් 21-35 අතර වෙනස් වෙන්ඩ පුළුවන්.ඒ වගේම ඔසප් රුධිරය පිට වීම සාමාන්‍යයෙන් දවස් 3-5 අතර පැවතුනාට දවස් 1-8 අතර රුධිරය පිටවීම සාමාන්‍යයි කියලයි සළකන්නේ.දවස් 8ට වැඩිනම් පොඩ්ඩක් සළකලා බලන්ඩ.ඔසප් රුධිරය පිට වීම සාමාන්‍යයෙන් ඉතා සුළු බින්දු කිහිපයක සිට මිලි ලීටර් 80ක් විතර වෙනකන් වෙනස් වෙන්ඩ පුළුවන්.ඒ වගේම ඔසප් රුධිරයත් එක්ක රුධිරය කැටි ගැසීම වලක්වන රසායනිකයක් පිට වීම නිසා රුධිරය කැටි ගැහෙන්නේ නෑ.එහෙම නැත්තං ඔසප් රුධිරයට පිට වෙන්ඩ බෑනේ.ඒ නිසා ඔසප් රුධිරය එක්ක රුධිර කැටි පිට වෙනවා කියන්නේ අධික රුධිර වහනයේ ලක්ෂණයක්.මොකද අර ප්‍රථිකැටිකාරකයේ ක්‍රියාකාරීත්වයේ සීමාවට වැඩියෙන් රුධිරය පිට වෙනවා කියන එකනෙ.


ඔසප් චක්‍රයක පළවෙනි දවස විදිහට සාමාන්‍යයෙන් අපි සළකන්නේ ඔසප් රුධිරය පිටවීම ආරම්භ උන දවස.ඒක නිසා මේක සිද්ධවෙන විදිහ ගැන කතා කරන්ඩ ඒ තැනින් පටං ගම්මු.හැබැයි ඔසප් චක්‍රයකදී ඩිම්බකෝෂයේත්, ගර්භාශයේත් වගේම ඇඟේ හෝමෝන මට්ටමේත් වෙනස්කම් සිද්ධ වෙනවා.ඒ නිසා ඒ ඔක්කොම ගැන සරළව කතා කරගෙන යමු.

ඔන්න ගර්භාශයේ එන්ඩොමෙට්‍රියම බිඳවැටිලා රුධිරය සහ පටක කොටස් යෝනි මාර්ගය හරහා පිට වෙලා යනවා.ඔන්න මේ කාලෙම ඩිම්බකෝෂයේ අර අපරිණත ඩිම්බ කීපයක් පරිණත වෙන්ඩ පටන් ගන්නවා.මේ ඩිම්බ තියෙන්නේ ශුක්‍රාණු වගේ තනියම නෙමෙයි.ගෑනු කොහොමත් ඉන්නේ ආරක්ෂාවට වටේට මුර දාලනේ.ඩිම්බයත් ඒ වගේම තමයි.ඩිම්බය වටේට පුංචි සෛල රාශියක් එකතුවෙලා හැදිච්ච ආවරණයක් තියෙනවා.මේ ඩිම්බය පරිණත වෙනකොට මේ සෛල ආවරණයේ තැනක පොඩි කුහරයක් හැදිලා ඒක ඇතුලේ තරලයක් එකතු වෙන්ඩ පටං ගන්නවා.පස්සේ මේ කුහරය සෑහෙන්ඩ ලොකු වෙනවා.ඒ කියන්න අල්ට්‍රාසවුන්ඩ් ස්කෑන් එකකිං බලාගන්ඩත් පුළුවං.මේ විදිහට කුහරයක් හැදිච්ච ඩිම්බයක් ඇතුලත් ව්‍යුහයට කියන්නේ ස්‍යුනිකාවක් කියලා.



අපේ මොළයේ තියෙන හයිපොතැලමසයේ සහ පිටියුටරියේ නිපදවෙන හෝමෝන යටතේ ශරීරයේ අනිකුත් බොහෝ හෝමෝන පාලනය වෙනවා කියලා කලිං ලිපියක කිව්වා වගේ මතකයි.ඔන්න මේ හයිපොතැලමසයෙන් GnRH කියලා හෝමෝනයක් නිදහස් වෙනවා.මේ හෝමෝනය මගින් පිටියුටරියෙන් FSH සහ LH කියන හෝමෝන නිපදවෙන එක උත්තේජනය කරනවා.මේ FSH ගිහිල්ලා ඩිබකෝෂ මත වැඩ කරලා තමයි ස්‍යුනිකා නිපදවීම සහ ඒ ස්‍යුනිකා මගින් හෝමෝන නිපදවීම උත්තේජනය කරන්නේ.

ඉතිං මේ විදිහට එක ඔසප් චක්‍රයකට ස්‍යුනිකා කීපයක් වර්ධනය වෙන්ඩ පටං ගන්නවා.මේ ස්‍යුනිකා වල වටේ තියෙන සෛල ස්ථරයෙන් ඊස්ට්‍රජන් කියන හෝමෝනය වැඩිපුරත් ප්‍රොජෙස්ටෙරොන් කියන හෝමෝනය ස්වල්ප වශයෙනුත් නිශ්පාදනය කෙරෙනවා.මේ ඊස්ට්‍රජන් මගින් ගර්භාශයේ එන්ඩොමෙට්‍රියමේ සෛල ගුණනය වෙලා එන්ඩොමෙට්‍රියම නැවත වර්ධනය වෙන එක උත්තේජනය කරනවා.ඊට අමතරව මේ ඊස්ට්‍රජන් ගිහිල්ලා පිටියුටරිය සහ හයිපොතැලමසය මත ක්‍රියා කරලා LH ස්‍රාවය වීම අඩු කරනවා.ඊට අමතරව තව ඉන්හිබින් කියලා හෝමෝනයක් හැදෙනවා මේ එක්කම ඩිම්බකෝෂවල.ඒකෙන් ගිහිල්ලා FSH ස්‍රාවය වීම පාලනය කරනවා.

මේ හැදෙන ස්‍යුනිකා කීපයෙන් එකක් විතරක් අන්තිමට ඉතුරු කරගෙන අනිත් ඒවා සාමාන්‍යයෙන් විනාශ වෙලා යනවා.මේ විදිහට ඉතුරු වෙච්ච ස්‍යුනිකාව හොඳටම පරිණත වෙනවා.මේ පරිණත ස්‍යුනිකාවට කියන්නේ ග්‍රාෆීය ස්‍යුනිකාව කියලා.ඒකෙන් ඊස්ට්‍රජන් විශාල ප්‍රමාණයක් ස්‍රාවය කරනවා.මේ ස්‍යුනිකාවේ තියෙන ඩිම්බ සෛලයේ න්‍යෂ්ඨිය ඌනන විභාජනයේ පළමු පියවරෙන් බෙදෙනවා.බෙදිලා න්‍යෂ්ඨි දෙකක් හැදෙනවා.ඒක න්‍යෂ්ඨියක් සෛලයෙන් පිටතට තල්ලු වෙලා යද්දි අනිත් න්‍යෂ්ඨිය විතරක් සෛලය ඇතුලේ ඉතුරු වෙනවා.මේ ඩිම්බ සෛලය ඌණන විභාජනයේ දෙවෙනි පියවරේ අතර මැද්දේ නතර වෙනවා.මේ අදියරට කියන්නේ ඌණන විභාජනයේ දෙවෙනි පියවරේ යෝග කලාව කියලා.

ඊස්ට්‍රජන් මගින් LH ස්‍රාවය කරන එක අඩු කරනවා කිව්වනේ.ඒකත් ඇවිල්ලා හරියට කොල්ලෙක් යාලු වෙන්ඩ අහද්දි කෙල්ල බෑ කියනවා වගේ වැඩක්.කොල්ලා නිකං ඇවිල්ලා ඇහුව ගමං 'බෑ' කියලා කෙල්ල කියනවා.කොල්ලා ඊළඟට චොක්ලට් එකක් අරං එනවා.ඒත් බෑ කියනවා.ඔය විදිහට කොච්චර බෑ කිව්වත් කොල්ලා අත අරින්නෙම නෑනේ.එතකොට කෙල්ලගේ හිතේ දෙගිඩියාවක් එනවා.කොල්ලා ගැන පැහැදීමක් එනවා.ඔන්න එක දවසක කෙල්ල පැනපු ගමං 'හා' කියනවා.මේ හොමෝන වැඩෙත් ඒ වගේම තමයි.මුලිං ඊස්ට්‍රජන් තියෙද්දි LH ස්‍රාවය අඩු වෙනවා.ඒත් ඊස්ට්‍රජන් එන්ඩ එන්ඩ වැඩි වේගන යද්දී LH ස්‍රාවය අඩුවෙන්නැතුව එක පාරටම වැඩි වෙන්ඩ පටං ගන්නවා.ඒ කියන්නේ ඊස්ට්‍රජන් පොඩ්ඩක් තියෙද්දි LH ස්‍රාවය අඩු කළා වගේම ගොඩක් තියෙද්දි LH ස්‍රාවය වීම වැඩි කරනවා.



මෙන්න මේ වෙලාවේ වැඩිපුර තියෙන LH වල ක්‍රියාකාරීත්වයෙන් ඩිම්බකෝෂ බිත්තිය සහ ස්‍යුනිකා බිත්තිය පුපුරලා ඩිම්බය උදර කුහරයට නිදහස් වෙනවා.මේකට තමයි කියන්නේ ඩිම්බ මෝචනය කියලා.මේක සාමාන්‍යයෙන් සිද්ධ වෙන්නේ දවස් 28ක ඔසප් චක්‍රයකනං 14 වෙනි දවසේ විතර.ඉතිං මෙච්චර දවසක් ඩිම්බකෝෂවල තිබුනේ ස්‍යුනිකා හින්දා ඔසප් වීමේ සිට මේ ඩිම්බ මෝචනය දක්වා අවධියට 'ස්‍යුනිකා අවධිය' කියලා කියනවා.ඒ වගේම ඊස්ට්‍රජන්වල ක්‍රියා කාරීත්වය යටතේ ඔසප්වීම නතර උනදා ඉඳං ගර්භාශ බිත්තිය වර්ධනය උන හින්දා ඔසප් වීම නතර උන දා ඉඳං ඩෛම්බ මෝචනය දක්වා කාලයට 'ප්‍රගුණන අවධිය' කියලත් කියනවා.

ග්‍රාෆීය ස්‍යුනිකාව පුපුරලා ඩිම්බය පිට උනාට පස්සේ ස්‍යුනිකාවේ ඉතුරු වෙච්ච සෛල ටික එකතු වෙලා ඩිම්බ කෝෂය ඇතුලේ 'පීත දේහය' කියන ව්‍යුහය බවට පත් වෙනවා.මේ පීත දේහය ඊස්ට්‍රජන් අඩුවෙනුත් ප්‍රොජෙස්ටෙරොන් වැඩිපුරත් ස්‍රාවය කරනවා.

මේ ප්‍රොජෙස්ටෙරොන්, ඊස්ට්‍රජන් වල ක්‍රියාකාරීත්වයෙන් වර්ධනය වෙලා තියෙන ගර්භාශයේ එන්ඩොමෙට්‍රියමේ ක්‍රියා කරලා ඒකේ රුධිර නාල වැඩි කිරීමත්, ඒ රුධිර නාල විශාල කිරීමත් දඟර ගැසීමෙන් වැඩි රුධිර පරිමාවක් එන්ඩොමෙට්‍රියට ලැබීමටත් සලස්වනවා.එයිට අමතරව එන්ඩොමෙට්‍රියමේ ඇති ග්‍රන්ථි සංඛ්‍යාවෙන් වැඩි කරලා ඒවා ප්‍රමාණයෙන් විශාල කරලා ඒවායේ ස්‍රාවයන් වැඩි කිරීමත් සිද්ද කරනවා.

පීත දේහයට සුද්දෝ කියන්නේ කෝර්පස් ලුටියම් (corpus luteum) කියලා.ඒක හින්දා ඒක තියෙන අවධියට 'ලුටීය අවධිය' කියලා කියනවා.ඒ වගේම එන්ඩොමෙට්‍රියමේ ග්‍රන්ථි මගින් ස්‍රාවයන් නිකුත් කරන නිසා මේ අවධිය 'ස්‍රාවීය අවධිය' කියලත් කියනවා.

මේ වෙද්දි රුධිරයේ ප්‍රොජෙස්ටෙරොන් ප්‍රමාණය ඉතාමත් ඉහලයි.ස්‍යුනිකාව විනාශ උනාට පස්සේ ඊස්ට්‍රජන් ප්‍රමාණය තරමක් අඩු උනත් සාමාන්‍යයෙන් ඉහල මට්ටමක පවතිනවා.ඉන්හිබින් සහ ඊස්ට්‍රජන්වල බලපෑම නිසා FSH සහ LH පහල මට්ටමකයි පවතින්නේ.මේ වෙද්දි තරමක් පහල ගිය ඊස්ට්‍රජන් මට්ටම නැවතත් LH ස්‍රාවය අඩු කරන්ඩයි දායක වෙන්නේ.

ඔසප් චක්‍රයේ දවස් 28 පමණ වෙනකොට පීත දේහය බිඳ වැටෙනවා.එතකොට ඊස්ට්‍රජන් සහ ප්‍රොජෙස්ටෙරොන් මට්ටම සීඝ්‍ර ලෙස පහල වැටෙනවා.


ඒ එක්කම ඊස්ට්‍රජන් සහ ප්‍රොජෙස්ටෙරොන් මගින් පවත්වාගෙන ගිය ගර්භාශයේ එන්ඩොමෙට්‍රියමත් බිඳ වැටෙනවා.ඒකේ තිබුණු රුධිර වාහිනී බිඳ වැටීම නිසා රුධිරය පිට වෙනවා.මේ රුධිරයත් එක්ක එන්ඩොමෙට්‍රියමේ කොටස් යෝනි මාර්ගය හරහා පිට වෙලා යනවා.

ඉතිං මෙ විදිහට බැලුවම ඔසප් වීමක් කියන්නේ එක් ඩිම්බමෝචනයක් සිද්ධ වෙලා ඒක සංසේචනය නොවීම නිසා සිද්ධ වෙන සංසිද්ධියක්.සංසේචනය උනානං මෙයිටවඩා වෙනස් විදිහකටයි සිද්ධ වෙන්නේ.ඒ ගැන පස්සේ බලමු.මට කියන්ඩ ඕනෙ කළේ ගැහැනු ළමයෙක් මල්වර වෙන්ඩ කලිං ලිංගික සම්බන්ධතාවයක් පැවැත්වුවත් ගැබ් ගන්ඩ ඉඩක් තියෙනවා කියන එක.මොකද ඒ ළමයා ඒ වෙද්දි ඩිම්බ මෝචනයක ඉන්ඩ පුළුවං නේ.නමුත් බොහෝ වෙලාවට මුල් ඔසප් වීම් සිද්ධ වෙන්නේ ඩිම්බ පිට වෙන්නේ නැතුව.



++++++++++++++++++++++++++++++++++++++++++++++++++++++++++++++++++++++++


ඕනෑම ගැටළුවක් කොමෙන්ට් එකකින් අහන්ඩ.දන්න එකක්නම් කියන්නම්.නැත්තං හොයලා හරි කියන්නම්.

ඇනෝ ඇවිත් කොමෙන්ට් දාන්ඩ කිසි අවුලක් නෑ.හැබැයි බොරුවට නිකං කුණුහබ්බ දාන්ඩ එපා හරි නෑනේ.






28 October 2012

වැදගත් විශයය....10 ( Sex Education in Sinhala )



අභ්‍යන්තර යෝනි තොල්

අභ්‍යන්තර යෝනි තොල් යෝනි මාර්ගය දෙපසින් පිහිටා ඇති අතර ඒවා ඉහලින් ක්ලිටොරිසය දක්වා දිවෙනවා.මේ අභ්‍යන්තර යෝනි තොල් ක්ලිටොරිසය දෙපැත්තේදී ස්ථර දෙකකට බෙදෙනවා.ඒ එක් එක් පැත්තේ අභ්‍යන්තර යෝනි තොල්වල බෙදුනු පසු සෑදෙන ඉහල ස්තර දෙක ක්ලිටොරිසයට ඉහලින් එකිනෙක හා එක් වෙන අතර පහළ ස්තර දෙක ක්ලිටොරිසයට පහළින් එකිනෙක හා සම්බන්ධ වෙනවා.

පහළින් මේ අභ්‍යන්තර යෝනි තොල් යෝනි මාර්ගය දෙපසින් පසුපසට ගමන් කරලා බාහිර යෝනි තොල් හා එක්වෙන අතර යෝනි මාර්ගයට පසුපසින් කුඩා පටකයකින් එකිනෙක හා එකතු වෙනවා.මේ අභ්‍යන්තර යෝනි තොල්වල රෝම පිහිටන්නේ නෑ.

බාහිර යෝනි තොල්

පුරුෂ වෘෂණ කෝෂවල ස්ත්‍රී අනුරූපකය තමයි බාහිර යෝනි තොල් කියන්නේ.මේ බාහිර යෝනි තොල්වල රෝම පිහිටනවා.මේවා තමයි ස්ත්‍රී බාහිර ලිංගික අවයව සියල්ලම වට කරගෙන පිහිටන ව්‍යුහය.

ක්ලිටොරිසය

ස්ත්‍රී ලිංගික අවයවවල සංවේදීම කොටසක් විදිහට ක්ලිටොරිසය හෙවත් භගමණිය හඳුන්වන්න පුළුවන්.මේ තමයි පුරුෂ ශිෂ්ණයේ ස්ත්‍රී ප්‍රතිරූපකය.ශිෂ්ණයේ වගේම ක්ලිටොරිසයටත් මුණ්ඩයක් පිහිටනවා.ඒ වගේම අභ්‍යන්තර යෝනි තොල් වල ඉහළ කොටසින් සෑදුනු පෙර සමක් ද දකින්න පුළුවන්.ක්ලිටොරිසය ප්‍රමාණයෙන් කුඩාවට පිහිටියා උනාට ඒක ශරීරයට සම්බන්ධ වෙලා තියෙන පටක යෝනි මාර්ගය දෙපසින් තරමක් දුරට ගමන් කරනවා.මේ නිසා යෝනි මාර්ගයේ ඇදීමට ලක් උනොත් ක්ලිටොරිසය උත්තේජනය වෙනවා.අන්න ඒක හින්දා තමයි මම කළිං ලිපියක කිව්වේ ශිෂ්ණයේ දිග වැදගත් වෙන්නේ නෑ කියලා.ඇත්තටම වැදගත් වෙන්නේ ශිෂ්ණයේ විශ්කම්භයයි.







දැං අපි ස්ත්‍රී ප්‍රජනක පද්ධතියේ ඇති වෙන්ඩ පුළුවං රෝගාබාධ කීපයක් ගැන බලමු ද?

ස්ත්‍රී ප්‍රජනක පද්ධතියේ ප්‍රධාන වශයෙන් පිළිකා තුනක් ඇති වෙන්ඩ පුළුවං.

1. ඩිම්බ කෝෂ පිළිකා
2. ගර්භාශ පිළිකා
3. ගැබ් ගෙල පිළිකා

මෙයින් ඩිම්බ කෝෂයේ ඇතිවෙන පිළිකා වර්ග කීපයක්ම දකින්ඩ පුළුවන්.ඒ එකින් එක මෙතන විස්තර කරන එකේ තේරුමක් නෑනේ.වැදගත්ම දේ වෙන්නේ මේ ඩිම්බ කෝෂ තියෙන්නේ උදර කුහරය ඇතුලේ නිදහසේ එල්ලි එල්ලී නිසා ඩිම්බ කෝෂවල පිළිකාව ගොඩක් දුරට පැතිරෙනකන් බොහෝ වෙලාවට මොකුත් වෙනසක් තේරෙන්නේ නෑ.

ගර්භාශයේ පිළිකාවල තියෙන වැදගත්කම තමයි මුල් කාලෙදිම ඔසප් රුධිරය වහනය වීමේ වෙනස් කම් ඇතිවෙන හින්දා ඒ කියන්නේ ඔසප් රුධිරය වැඩිපුර පිට වීම, ඔසප් වීම් අතර රුධිරය පිට වීම වගේ වෙනස්කම් ඇතිවෙන හින්දා ඉක්මනට අඳුන ගන්ඩ ලැබෙනවා.හැබැයි ගර්භාශය අයින් කරන්ඩ නම් සිද්ධ වේවි.එතකොට ඉතින් දරුවො හදන්ඩ බෑනෙ.නමුත් මේ පිළිකා හැදෙන්නේ ගොඩක් වයසට ගියාට පස්සේ නිසා ලොකු බලපෑමක් නෑ.

මතක තියා ගන්ඩ ඕනෙ වෙන්නේ ගෑනු කෙනෙක් ආර්ථවහරණය උනාට පස්සේ ඒ කියන්නේ ඔසප් වීම නතර උනාට පස්සේ මාස හයක් ගත උනාට පස්සෙ ඉඳන් නැවත යෝනි මාර්ගයෙන් රුධිරය වහනය වීමක් සිද්ධ උනොත් වහාම වෛද්‍ය ප්‍රථිකාර පතන එක හොඳයි.මොකද මේ පිළිකාවක් නිසා වෙන්න පුලුවන් නේ.මාස හයක් ඉන්නේ ආර්ථවහරණයේ ඉඳන් මාස හයක් ඇතුලත රුධිර වහනයක් සාමාන්‍යයෙන් වෙන්ඩ පුළුවන් නිසා.නමුත් මෙහෙම කිව්වා කියලා අවුලක් නෑ කියලා හිතන්ඩ එපා.ආර්ථවහරණයට කළිනුත් ගර්භාශ පිළිකා හැදෙන්ඩ පුළුවන් නිසා සැකයක් හිතෙන වෙලාවට පරීක්ෂාවක් කර ගන්න එක හොඳයි.

ගැබ් ගෙල පිළිකා ගැන කියද්දි කියන්ඩ තියෙන්නේ මේකට ප්‍රධාන හේතුවක් විදිහට දකින්නේ ලිංගික ඉන්නන් හදන්ඩ හෙතුවන ලිංගාශ්‍රිතව පැතිරෙන HPV කියලා හඳුන්වන වෛරසයක්.ඉතිං ලිංගික සහකරුවන් කීප දෙනෙක් ඉන්න වගේම අනාරක්ෂිත ලිංගික සබඳතා පවත්වන ගැහැනු අයත් බහුලවම මේ පිළිකාවේ ගොදුරක් වෙන්ඩ තියෙන ඉඩ වැඩියි.

යෝනි මාර්ගයෙන් අසාමාන්‍ය රුධිර වහනයක් සිද්ධ උනොත්, විශේෂයෙන් ලිංගික සබඳතාවයකට පස්සේ රුධිර වහනයක් සිද්ධ උනොත් වෛද්‍ය ප්‍රථිකාර වෙත යොමු වෙන්ඩ.ඒ වගේම මේක බලන අය තම තමුන්ගේ අම්මලා නැන්දලා දැනුවත් කරන්ඩ ලංකාවේ හැම ප්‍රදේශයකම වගේ තියෙන 'සුව නාරී සායන' ගැන.මොකද ඒ වයස්වල ඇත්තෝ බ්ලොග් බලනවා අඩුයි නේ.මේ සුවනාරී සායනවලදී අවුරුදු 35ට වැඩි කාන්තාවන්ගේ ගැබ්ගෙල පරීක්ෂා කරලා 'පැප් පරීක්ෂාව' නොමිලේ කරල දෙනවා.ඒකෙන් පිළිකාව ඇතිවෙන්ඩ කලින් අඳුර ගන්ඩ පුළුවන්.තමන්ගේ ප්‍රදේශයේ මේ සුවනාරී සායන ගැන දන්නෙ නැනම් ප්‍රදේශයේ පවුල් සෞඛ්‍ය සේවිකාවගෙන් අහලා බැලුවනං හරි. දියුණු රටවල මේ පරීක්ෂාව මම හිතන්නේ අවුරුදු 25න් ඉහල අයට කරනවා.

ඒ වගේම මේ පිළිකාවට හෙතුවක් විදිහට දක්වන HPV වලට එරෙහිව එන්නතක් දැන් තියෙනවා.සමහර රටවල පොඩි ගෑනු දරුවන්ට මේ එන්නත ලබා දෙන එක අනිවාර්ය කරලා තියෙනවා.නමුත් අපේ රටේ තවම එහෙම නෑ.මේක පුද්ගලික අංශයෙන් ලබා ගන්ඩ පුළුවන්.



මේ පිළිකා ගැනනේ කිව්වේ.

පිළිකා නොවන වෙනත් වර්ධනයන් කීපයකුත් ස්ත්‍රී ප්‍රජනක පද්ධතිය ආශ්‍රිතව දැකගන්ඩ පුළුවන්.

ඩිම්බ කෝෂවල සෛල අධිවර්ධනයෙන් ඇති වෙන ගෙඩි වගේම තරල පිරීමෙන් ඇතිවෙන ගෙඩිත් දකින්ඩ පුළුවන්.මේවායින් ඇතිවිය හැකි ප්‍රධානම බලපෑම තමයි මදසරුභාවය ඇතිවීම.මේ ඒ ගෙඩි ඩිම්බ කෝෂවල ඩිම්බ වර්ධනය හා මෝචනයට බාධා කිරීම නිසයි.ඊට අමතරව රුධිර වහනය වීම් වගේම විශාලව වැඩෙන ගෙඩි හෙවත් වර්ධනයන් නිසා ඇතිවන පීඩනයෙන් අසල ඇති වෙනත් අවයවවලට බාධා පැමිණීම ආදිය දක්වන්ඩ පුළුවන්.

ගර්භාශයේ ඇතිවෙන පිළිකාමය නොවන වර්ධනයක් තමයි ෆයිබ්‍රොයිඩ් කියන්නේ.මේවා ඇතිවෙන්නේ ගර්භාශයේ පේශි ස්ථරයේ.ඒ කියන්නේ මයෝමෙට්‍රියමේ.මේ ගෙඩි පැවතීමෙන් ඔසප් රුධිරය වහනය වීම වැඩි වෙන්ඩ වගේම අක්‍රමවත් වෙන්ඩ පුළුවන්.ඒ වගේම ගර්භාශයේ මේ ගෙඩි පැවතීම නිසා එහි කළලයේ තැන්පත් වීමට බාධා කිරීම නිසා මද සරු භාවය ඇති වෙන්නත් පුළුවන්.ඒ වගේම ගැබ් ගැනීමක් සිද්ද උනාම වැදෑමහ නිසි ලෙස ගර්භාශ බිත්තියට සවි නොවීමේ තත්ත්ව ඇති වෙන්ඩත් පුළුවන්.දරුවන් බලාපොරොත්තු වෙන එක්කෙනෙක්ටනං මේ ගෙඩි විතරක් අයින් කරලා ගර්භාශය ඉතුරු කරන ශල්‍යකර්මයක් (myomectomy) කරන්ඩ උත්සාහ කරනවා.නමුත් දරුවන් හදලා ඉවර උන කෙනෙක් නම් ගර්භාශයම ඉවත් කරන එක (hysterectomy) තමයි බොහෝ විට සිද්ධ වෙන්නේ.
නමුත් මේ විදිහට ප්‍රථිකාර  කරන්ඩ සිද්ධ වෙන්නේ මොනවා හෝ රෝග ලක්ෂණ පෙන්නුම් කරන අයට විතරයි.මොකද ගොඩක් කාන්තාවන්ගේ ගර්භාශයේ ෆයිබ්‍රොයිඩ් තිබුණට ඒක කිසිම ආබාධයක් අපහසුතාවයක් ඇති කරන්නේ නෑ.




තවත් බහුලව දකින්ඩ තියෙන රෝගී තත්වයක් තමයි එන්ඩොමෙට්‍රියෝසිස් කියන්නේ.මේ රෝගී තත්ත්වයේදී සිද්ධ වෙන්නේ ගර්භාශයේ එන්ඩොමෙට්‍රියම කියන පටක වර්ගය උදරයේ වෙනත් තැන්වල දකින්ඩ ලැබීම.එතකොට ඔසප් චක්‍රයත් එක්ක ගර්භාශයේ එන්ඩොමෙට්‍රියමේ ඇතිවෙන වෙනස්කම් ඒ කියන්නේ වර්ධනය වීම, ස්‍රාවයන් පිට කිරීම සහ අවසානයේ බිඳ වැටී රුධිර වහනය වීම මේ වෙනත් තැන්වල තියෙන පටක කොටස්වලත් ඇතිවෙනවා.

ඉතින් මේ නිසා වේදනාත්මක ඔසප්වීම් ඇතිවෙන්ඩ පුළුවන්.කොන්දේ වේදනාව, යටි බඩේ වේදනාව, අධික හෝ අක්‍රමවත් ඔසප් වීම්, ලිංගික එක්වීමේදී වේදනාව ඇති වීම වගේ ඒවාත් ඇති වෙන්ඩ මේ එන්ඩොමෙට්‍රියෝසිස් කියන තත්ත්වය බලපාන්ඩ පුළුවන්.ඒ වගේම ඩිම්බකෝෂවල ඇතිවෙන එන්ඩොමෙට්‍රියෝසිස් තත්ත්වය වගේම ශ්‍රෝණි කුහරයේ ඇතිවෙන එන්ඩොමෙට්‍රියෝසිස් තත්ත්වය නිසා පැලෝපීය නාල අවහිර වීම නිසා මදසරුභාවය ඇතිවෙන්ඩත් පුළුවන්.

මේ සඳහා හෝමෝනමය ප්‍රථිකර්ම වගේම ශල්‍යකර්ම මගිනුත් ප්‍රථිකාර කරනවා.
++++++++++++++++++++++++++++++++++++++++++++++++++++++++++++++++++++++++


ඕනෑම ගැටළුවක් කොමෙන්ට් එකකින් අහන්ඩ.දන්න එකක්නම් කියන්නම්.නැත්තං හොයලා හරි කියන්නම්.

ඇනෝ ඇවිත් කොමෙන්ට් දාන්ඩ කිසි අවුලක් නෑ.හැබැයි බොරුවට නිකං කුණුහබ්බ දාන්ඩ එපා හරි නෑනේ.


26 October 2012

හිනාවක් සහ කඳුලක්....



පහුගිය දවස් ටිකේම මොකුත් ලියනවා තියා කට්ටියගේ බ්ලොග් ටිකවත් හරියට බලාගන්ඩ වෙලාවක් හම්බ උනේ නෑ.අපේ වෘත්තිය පුහුණුවේ අවසාන අවුරුද්ද පටං ගත්ත නෙව.ආතල් ජීවිතේට තිත තියලා හොටු පෙරාගෙන දත්මිටි කාගෙන දැං බරටම වැඩ.මේ කියන්නේ ඔය කට්ටිය අහලා ඇති නේ ඔය මහාචාර්ය ඒකකයේ පුහුණුව කියන එක.අන්න ඒක ගැන.මාර ආතල් අප්පා.උදේ 7.30ට වාට්ටුවට ගියාම සමහර දවස්වලට බෝඩිමට එන්නේ රෑ 10.30ට විතර.මොකෝ කලිං අවුරුදු හතරෙම අයිස් ගහපුවට හරියන්ඩ වැඩ කරන්ඩ එපායැ.

මේ කියන මහාචාර්ය ඒකකවල පුහුණුවේදි මම ඇතුළු කණ්ඩායම මුලින්ම වැටුනේ නාරිවේදය ඉගෙන ගන්ඩ.පටං ගත්තෙම අවුල් තැනකිං.ඔය කකා දාලා තියෙන්නේ ඒකේ වටිනාකම.

ඔන්න නාරි වේදය කිව්වම කතාවක් මතක් උනානේ,

නාරිවේදය කරනකොට කරන්ඩ තියෙන එකක් තමයි යෝනි මාර්ගයට ඇඟිල්ල දාලා පරීක්ෂා කරන එක.මේක ගොඩක් වෙලාවට හැම රෝගියෙක්ටම වගේ කරන්ඩ ඕනෙ.කතාවට කියන්නේ ලෙඩෙක්ට PV (per vaginal examination) එකක් නොකර ඉන්නේ එක්කෝ කන්‍යාවක්නම්, එහෙම නැත්තං යෝනියක් නැත්තං කියලා.අනිත් එක ගොඩක් වෙලාවට අල්ට්‍රාසවුන්ඩ් ස්කෑන් එහෙම කරන්නෙත් යෝනි මාර්ගය හරහා.ඒ විතරක් යැ, සමහර ශල්‍යකර්ම කරන්නෙත් යෝනි මාර්ගය හරහා නෙව.

ඔන්න ඉතිං අමතර දැනුම හරි ඈ.

නාරිවේදී දොස්තර කෙනෙක් තමංගේ වෘත්තිය ගැන කළකිරුණලු.නිතර දකින කුකුලගේ කරමලේ සුදු වෙනවා වගේ ගෙදර උන්දැත් එපා වෙයි කියලා බය වෙලා වෙන්ඩ ඇති.කොහොම හරි පොර ගියාලු වාහන එන්ජින් හදන්ඩ ඉගෙන ගන්න කෝස් එකක් කරන්ඩ.පොරත් අනිත් මජං අයියලා එක්කම හරි හරියට වැඩේ අල්ලගෙන යනවලු.කොහොම හරි අවසාන එග්සෑම් එක තියෙනවලු.මේක ඇවිල්ලා ප්‍රායෝගික පරීක්ෂණයක්.කැඩිලා තියෙන ඇංජිමක් හදන එක තමයි වැඩේ.

පරීක්ෂණය අවසානෙදි ඩොකාට ලකුණු 100% යි ලු.ඔය ගැරෙජ්වල වැඩ කරලා කරලා හොඳට වැඩ පුලුවං උනාට සහතිකයක් ගන්ඩ ඕනෙ කමට කෝස් එකට එන්ටර් වෙච්ච හොඳ හොඳ එංජින් වැඩ කාරයින්ටත් 50%, 60% වගේ තියෙද්දි මේකා 100% ගත්තේ කොහොමද කියලා කට්ටියට හරි අවුල ලු.ඉතිං කට්ටිය ගියාලු විභාගෙ පවත්වපු අයගෙං මේ ගැන අහන්ඩ.


කට්ටිය ගිහිං ඇහුවම පරීක්ෂක මහත්තුරු කිව්වලු මිනිහා ඇංජිම හරියට හැදුවා ඒක හින්දා ලකුණු දුන්නා කියලා.එතකොට පරීක්ෂණේට පෙනී හිටපු ගැරේජ් බාස් කෙනෙක් නැගිටලා කිව්වලු 'ඉතිං මාත් ඇංජිම හරියට හැදුවනේ ඒ උනාට මට ලකුණු එච්චර නෑ නෙ' කියලා.එතකොට අනිත් උනුත් මුණු මුණු ගාලා උනුත් හරියට හැදුව එක ගැන කියන්ඩ ගත්තලු.එතකොට පරීක්ෂක මහත්තුරු කිව්වලු

'හරි හරී තමුසෙලා ඔක්කොම එංජිම හරියට හැදුවා ඒ උනාට ඒ යකා එංජිම හැදුවේ එක ඇණයක්වත් ගලවන්නැතුව සයිලන්සරෙන් අත දාලා' කියලා.




++++++++++++++++++++++++++++++++++++++++++++++++++++++++++++++++++++++++





මේක මේ අමතර කතාවක්නේ.කියන්ඩ හැදුවේ ඒක නෙමෙයි නේ.ඔන්න මේ නාරිවේදී පුහුණුවට අදාලව අපිට සිද්ද උනා මහරගම පිළිකා රෝහලට ගිහිල්ලා නාරිවේදය හා සම්බන්ධ පිළිකා ඒ කියන්නේ ඔය ගර්භාශ පිළිකා, ගැබ්ගෙල පිළිකා, ඩිම්බකෝෂ පිළිකා ගැන එහෙම ඉගෙන ගන්ඩ.ඔය ගිය වෙලාවේ ආච්චි කෙනෙක් හිටියා ගැබ්ගෙල පිළිකාවක් හැදිලා.අපිට තියෙනවනේ රෝග ඉතිහාසය අහන්ඩ.මමයි තව දෙන්නෙකුයි මේ ආච්චිව කතාවට අල්ලගෙන ඔන්න විස්තරේ අහගෙන අහගෙන යනවා.ගෙවල් රත්නපුරේ කහවත්තේ, වයස අවුරුදු පනස් අටයි,රස්සාව තේ දලු කඩන එක.දරුවො තුන්දෙනයි.මල්වර වෙලා තියෙන්නේ අවුරුදු දහතුනේ දි, අවුරුදු දහ හතරෙදි කසාද බැඳලා.

මුල් කාලේ ඉඳංම ඔසප් වීමේදී අධික රුධිර වහනයක් වෙලා තිබුනට ප්‍රථිකාර අරගෙන නෑ.ඇයි කියලා ඇහුවම අහිංසක විදිහට හිනා වෙනවා.අපි බණියි කියලා බය වෙලා.හරිම බැගෑපත්.ඇයි මිනිස්සු අනිත් මිනිස්සුන්ට බයේ ඉන්නේ කියලා මටනං තේරෙන්නෙ නෑ.අන්තිමට පිළිකාවකුත් ඇතිවෙලා ඒක හොඳටම පැතිරුනාට පස්සේ තමයි රත්නපුරේ ඉස්පිරිතාලෙට ගිහිං තියෙන්නේ.

'එහෙං මාව කොළඹ එව්වා. උපං තේකට කොළඹ ඇවිත් නෑනෙ මහත්තයෝ...'

ආච්චි කියන්නේ හිනා වෙවී සතුටෙන්.ඒ මනුස්සයට පිළිකාවක් කියන එක තේරෙන්නේ නෑ.ඒකෙන් ජීවිත අවධානමක් තියෙනවා කියන එක වැටහෙන්නේ නෑ.කොළඹ දැකපු එක ලොකු සතුටක්.

මට කියාගන්ඩ බැරි මොකක්ද එකක් උගුරේ හිර වෙලා වගේ දැනුනා.මම කතා කරන එක නවත්තලා එන්ඩ ආවා.


මේක ගැන විග්‍රහ කරන්ඩ එක එක අයට එක එක විදිහට පුළුවං.අයිටීඑන් එක එක දෙයක් ගැන කියන දේ හාත් පසින්ම වෙනස් විදිහට සිරසෙ කියන්ඩ පුළුවං.මමනං මං ගැන සතුටු උනා.අඩුම තරමේ මම හිල්ටන් එක සිනමන් ග්‍රෑන්ඩ් එක ළඟින් ගිහින් තියෙනවා.රේස් කෝස් පැවිලියමේ සුපර් මාකට් එක දැකලා තියෙනවා.එම් සී එකේ අනිත් උන් බඩු ගන්නවා බලං ඉඳලා තියෙනවා.ඒත් අපි හැම තිස්සෙම හැමෝටම බණිනවා අපිට මදි කියලා.

මේ ආච්චි මාරන්තික ලෙඩකට ප්‍රථිකාර ගන්ඩ කොළඹ ඇවිත් කොළඹ දැකලා සතුටු වෙනවා.............





17 October 2012

වැදගත් විශයය....9 ( Sex Education in Sinhala )


ගර්භාශය 

ගර්භාශය කියන්නේ මිනිස්සුංගේ තියෙන වැදගත්ම ඉන්ද්‍රිය කිව්වොත් වැරදි නෑ.මොකද මේක ඇතුලේ තමයි ඇහැට නොපෙනෙන සයිස් එකේ පුංචි සෛල කීපයක් කිලෝ 3ක් විතර බර මිනිස් පැටියෙක් විදිහට ලොකු වෙන්නේ.මේ ගර්භාශය පහලින් තියෙන යෝනි මාර්ගයට සම්බන්ධ වෙන්නේ ගැබ් ගෙල හරහා.ගර්භාශයේ ඉහළ දෙපැත්තෙන් පැලෝපීය නාල දෙක සම්බන්ධ වෙලා තියෙනවා.එතකොට මේ ගර්භාශය යෝනි මාර්ගයේ ඉඳං ශුක්‍රාණු පැලෝපීය නාලවලට ගෙනියන්ඩ දායක වෙනවා වගේම සංසේචනය වෙච්ච ඩිම්බය හෙවත් යුක්තානුව ආපහු පැලෝපීය නාලයේ ඉඳං ආවාම ලොකු මහත් කරන කාර්යයත් කරනවා.

මේ ගර්භාශය 8cm උස 5cm පළල 3cm ගණකම තියෙන පුංචි ව්‍යුහයක්.දරු ගැබක් රහිත සාමාන්‍ය කාන්තාවක්ගේ ගර්භාශය ඇගේ සිරුරට සාපේක්ෂව මේ තරම්,


ඔය පුංචි ගර්භාශය තමයි දරු ගැබක් තියෙද්දි මේ රූපයේ තරම් ලොකු වෙලා වර්ධනය වෙන්නේ.දරුවා බිහි උනාට පස්සේ ගර්භාශය ආයෙත් පුංචි වෙලා යනවා.







ගර්භාශයේ බිත්තිය ගත්තම ස්ථර තුනකින් යුක්තයි.පිටතින්ම තියෙන්නේ ආවරණයක් වෙන පෙරිමෙට්‍රියම. ඊට ඇතුලෙන් ඒ කියන්නේ මැද ස්ථරය විදිහට තියෙන්නේ මයෝමෙට්‍රියම.ඇතුලෙන්ම තියෙන්නේ එන්ඩොමෙට්‍රියම.


පෙරිමෙට්‍රියම

මේක උදරයේ ඇති හැම ඉන්ද්‍රියයක්ම වගේ ආවරණය කරගෙන තියෙන උදරච්ඡදයෙන් හැදිච්ච ආවරණයක්.

මයෝමෙට්‍රියම

මේ ස්ථරය හැදිලා තියෙන්නේ 'සිනිදු පේශි' කියන අපිට අපේ කැමැත්ත අනුව පාලනය කරන්ඩ බැරි මාංස පේශි ස්ථරයකින්.මේ පේශීන් ගේ සංකෝචනය වීම නිසා තමයි ප්‍රසූතියේදී දරුවා ගර්භාශයෙන් පිටතට තල්ලු කරලා යැවෙන්නේ.ඊට අමතරව ඔසප් වීමේදී සුළු සංකෝචන මගින් ඔසප් රුධිරය පිටතට තල්ලු කරලා යවන්ඩත් යම් දායකත්වයක් තියෙනවා.ඒ වගේම සංසර්ගයෙන් පස්සේ යෝනි මාර්ගයේ ඉඳං ගර්භාශයට ශුක්‍රාණු ඇතුල් උනාම ගර්භාශයේ සංකෝචන මගින් ශුක්‍රාණුවලට ඉහළට ගමන් කරන්ඩත් උදවු වෙනවලු.දරුවෙක් ගර්භාශයෙ වර්ධනය වෙනකොට මේ මයෝමෙට්‍රියමේ තියෙන සිනිදු පේශි සෛල විශාල වීමෙන් සහ සංඛ්‍යාව වැඩි කර ගැනීමෙන් ගර්භාශයේ ප්‍රමාණය වැඩි කරගන්නවා.දරු ප්‍රසූතියෙන් පස්සේ මේ පේශි සෛල ප්‍රමාණයෙන් කුඩා වීමෙන් සහ අමතර සෛල මිය යෑම නිසා ගර්භාශය නැවත මුලින් තිබූ තත්ත්වයටම එනවා.


එන්ඩොමෙට්‍රියම

එන්ඩොමෙට්‍රියම කියන්නේ හරියට පොළවේ මතුපිටම තියෙන සරු පස් ස්ථරය වගේ.යුක්තානුව ගර්භාශයට ඇවිල්ලා මේ සරු ස්ථරයේ පැළ වෙනවා.ඒක වෙන්නේ මේ එන්ඩොමෙට්‍රියමේ.මේ ස්ථරයට හොඳ රුධිර සැපයුමක් එහෙම තියෙනවා.නමුත් මේ එන්ඩොමෙට්‍රියම පොළවේ සරුපස් ස්ථරයට වඩා ගොඩක් දියුණුයි.හැම ඩිම්බ මෝචනයක් එක්කම එන්ඩොමෙට්‍රියම අළුතෙන් වර්ධනය වෙනවා.ඒ සංසේචනයක් සිද්ධ උනොත් යුක්තානුව රෝපණය කර ගැනීමේ බලාපොරොත්තු ඇතුව.ඉතිං සංසේචනයක් සිද්ද උනේ නැත්තං මේ එන්ඩොමෙට්‍රියමේ ඉහළ ස්ථරය ගැලවිලා යනවා.ඒ එක්කම ඒ ස්ථරයේ වර්ධනය වෙලා තිබ්බ රුධිර නාලත් බිඳ වැටෙන හින්දා රුධිරයත් පිට වෙලා යනවා.මේකට තමයි 'ඔසප් වීම' කියන්නේ.මෙහෙම පරණ ස්ථරය ගලවලා දාලා හැම ඩිම්බ මෝචනයකටම අළුතෙන් එන්ඩොමෙට්‍රියම වර්ධනය කර ගන්නවා.


ගැබ් ගෙල

මේකත් ගර්භාශයේම කොටසක් විදිහට සලකන්ඩ පුළුවං උනත් යම් යම් වෙනස්කම් දකින්ඩ පුළුවං.ගැබ් ගෙල මගින් තමයි ගර්භාශය යෝනි මාර්ගයට සම්බන්ධ කරන්නේ.මේ ගැබ්ගෙල තමයි ගර්භණී අම්මා කෙනෙක් හිටගෙන ඉද්දි දරුවා පහලට වැටෙන එක නවත්තං ඉන්නේ.ඒ කියන්නේ ගර්භාශයට කිරල ඇබයක් ගැහුවා වගේ තමයි.ගර්භාශ ගෙල පිළිකා සම්බන්ධයෙන් හරි කුප්‍රකටයි.මේ ගැබ් ගෙල ප්‍රදේශය යෝනි මාර්ගය තුලින් බැලුවාම පේන විදිහ,





යෝනි මාර්ගය

යෝනි මාර්ගය කියන්නේ බාහිරට විවෘතවන සහ ගැබ්ගෙල හරහා ගර්භාශයට විවෘතවන පේශිමය බටයක්.මේකේ ඇතුල් බිත්තිය සාමාන්‍යයෙන් තියෙන්නේ රැළි වැටිලා.නමුත් දරු ප්‍රසූතීන් කීපයක් සිද්ද උනාම මේ රැළි නැතිවෙලා යනවා.යෝනි මාර්ගය සාමාන්‍යයෙන් ලිහිසි කාරක මගින් තෙත් වෙලායි තියෙන්නේ.මේ ලිහිසි කාරක ප්‍රමාණය සංසර්ගයකට පෙරාතුව ඇතිවෙන උත්තේජන මගින් වැඩි වෙනවා.ප්‍රධාන වශයෙන් මේ ලිහිසි කාරක වෙන්නේ යෝනි බිත්තියේ රුධිර නාලවලින් පෙරී එන දියර කියලයි කියන්නේ.ලිංගික උත්තේජනයේදී මේ රුධිර නාල ප්‍රසාරණය වෙන නිසා වැඩිපුර තරල යෝනි මාර්ගයේ එකතු වෙනවා.එයිට අමතරව ගැබ්ගෙල ප්‍රදේශයෙන් එන ස්‍රාවයන් වගේම යෝනි මාර්ගය පිටතට විවෘතවන ස්ථානය අසල දෙපැත්තේ පිහිටා ඇති බාතෝලියන් ග්‍රන්ථි දෙකේ ශ්ලේශ්මල ස්‍රාවයනුත් යෝනි මාර්ගයේ ලිහිසි කාරක විදිහට කටයුතු කරනවා.

යෝනි මාර්ගය සාමාන්‍යයෙන් 7.5cm විතර දිග වෙනවා.නමුත් ලිංගික උත්තේජනයේදී මේ දිග සාමාන්‍යයෙන් වැඩි වෙනවා.යෝනි මාර්ගය තෙරපීමට වගේම ඇදීමටත් සංවේදීයි.සංසර්ගයේදී ශිෂ්ණයේ චලනයන් වගේම ප්‍රමාණය නිසා යෝනි මාර්ගයේ බිත්ති ඇදීමත් ලිංගික තෘප්තිය ලබා දීමට හේතු වෙනවා.


යෝනි මාර්ගය පිටතට විවෘත වන ස්ථානය ආවරණය කරගෙන තමයි ආන්දෝලනාත්මක කන්‍යාපටලය පිහිටන්නේ.

මේ කන්‍යා පටලය සමහරවිට උපතින්ම නැති වෙන්න පුළුවං.එහෙම නැත්තං සමහර ආසාදන තත්ත්වයන් නිසා විනාශ වෙන්න පුලුවං.ව්‍යායාම් කිරීම්, අනතුරු සිදුවීම් වගේම කලාතුරකින් වෛද්‍ය පරීක්ෂණවලදීත් බිඳී යන්ඩ පුළුවං.ඒ වගේම ස්ත්‍රියක් ස්වයං වින්දනයේ යෙදෙද්දී නොදැනුවත් කමින් මේ කන්‍යා පටලය කැඩී යන්න පුළුවං.ඒ වගේම සමහර අයගේ කන්‍යා පටල බොහොම ඇදෙන සුළුයි.ඒ නිසා සමහරවිට පළමු සංසර්ගයේදී මේ කන්‍යාපටලය බිඳී නොයන්ඩ පුළුවං.ඒ නිසා කන්‍යාභාවය පරීක්ෂා කරන්ඩ තියෙන අසාර්ථක ක්‍රමයක් තමයි ප්‍රථම සංසර්ගයේදී කන්‍යා පටලය බිඳී රුධිරය වහනය වීම පරීක්ෂා කිරීම.

අනික සමහර බුද්ධිමත් කාන්තාවෝ අතීතයේ ඉඳං කරපු පුංචි මගඩි කීපයක් තියෙනවා.එකක් තමයි පුංචි කුප්පියකට රුධිරය දාගෙන කොට්ටය යට හංගගෙන ඉඳලා අදාල වෙලාවේ පුරුෂයා සිහිය විකල් වෙලා ඉන්න කොට හිමින් සීරුවේ හලා ගන්න එක.අනිත් ක්‍රමේ තමයි පුංචි ස්පොන්ජ් කෑල්ලක රුධිරය පොඟවලා යෝනි මාර්ගයේ ඉහල රඳවා ගෙන සිටීම.එතකොට ශිෂ්ණයේ තෙරපීමෙන් රුධිරය යෝනි මාර්ගයෙන් එලියට කාන්දුවෙලා එනවා.

කන්‍යා පටල පිහිටන ආකාර,
ඉහත රූපයේ දැකිය හැකි ආකාරයට සම්පූර්ණයෙන් යෝනි මාර්ගය වසාගෙන පවතින කන්‍යා පටලත් දකින්ඩ පුළුවන්.එහම ගෑනු අය මල්වර උනාට ඔසප් රුධිරය පිටවෙන්නේ නෑ.එහෙම උනාම කට්ටිය බය වෙලා දොස්තර ගාවට එක්කගෙන ආවම පුංචි ශල්‍යකර්මයකින් කන්‍යාපටලයේ සිදුරක් හදනවා ඔසප් රුධිරය පිට වෙලා යන්ඩ.



14 October 2012

වැදගත් විශයය....8 ( Sex Education in Sinhala )


ස්ත්‍රී ප්‍රජනක පද්ධතිය ගැන කියන්ඩ ඉස්සෙල්ලා පුරුෂ ප්‍රජනක පද්ධතියේ කියන්ඩ අමතක වෙච්ච එක ආබාධයක් ගැන කියලා ඉන්නං ඈ.ඔන්න ඉවසිල්ලක් නැතුව ඉන්න අය සමාවෙන්ඩ ඈ.

හයිපොස්පේඩියස් සහ එපිස්පේඩියස්

මේ කියන තත්ත්ව වලදි වෙන්නේ සාමාන්‍යයෙන් ශිෂණයේ අග කෙළවරින් පිටතට විවෘතවන මුත්‍ර විවරය ශිෂ්ණයේ ඉහළින් හෝ පහලින් පිටතට විවෘත වෙන එක.මේ අවස්ථා දෙකෙන් බහුලවම දකින්ඩ ලැබෙන්නේ හයිපොස්පේඩියස් කියන ශිෂ්ණයේ පහළ පැත්තේ මුත්‍ර විවරය පිහිටීමේ තත්ත්වයයි.එපිස්පේඩියස් කියන ශිෂ්ණයේ ඉහළ පැත්තේ මුත්‍ර විවරය පිහිටීම බොහොම කළාතුරකින් ඇතිවන තත්ත්වයක්.


හයිපොස්පේඩියස්


එපිස්පේඩියස්

මේක එච්චර බය වෙන්ඩ දෙයක් නොවුනත් මේ තත්ත්වය නිසා යම් යම් අපහසුතා ඇතිවෙන්ඩ පුළුවං.මේ ආබාධය සුළු වශයෙන් නම් තියෙන්නේ ශල්‍යකර්මයකින් යථා තත්ත්වයට පත් කරන්ඩ පුළුවන්.නමුත් ආබාධයේ තත්ත්වය දරුණුනම් ඒ කියන්නේ විශාල විවරයක් එහෙම තියෙනවානං එක ශල්‍යකර්මයකින් වැඩේ ගොඩ දාගන්ඩ බැරි වෙන්ඩ පුළුවං.නමුත් බලාපොරොත්තු අත ඇර ගන්ඩ හොඳ නෑ.

මේ තත්ත්වයේදි එන ගැටළු තමයි මුත්‍රා කිරීමේදී ඇතිවන අපහසුකාරී තත්ත්වය.සමහර විට ඔවුන්ට කාන්තාවන්ට මෙන් ඉඳගෙන මුත්‍රා කරන්ඩ සිද්ද වෙන්ඩ පුළුවං.අනිත් ගැටළුව තමයි සංසර්ගයේදී ශුක්‍ර තරලය ස්ත්‍රී යෝනියට ඇතුළු නොවීම.මේ නිසා මදසරුභාවය ඇතිවෙන්ඩ පුළුවං උනත් යම් යම් ප්‍රතිකර්ම මගින් දරුවෙක් පිළිසිඳ ගන්වන්න පුළුවං.








ස්ත්‍රී ප්‍රජනක පද්ධතිය 

හරි ඔන්න එහෙනං ස්ත්‍රී ප්‍රජනක පද්ධතිය ගැන කතාව පටං ගම්මු ඈ.මේකත් ගෑනු වගේම තරමක් සංකීර්ණයි.හරියට අඳුර ගත්තේ නැත්තං නොමග යන්ඩ පුළුවං.

ස්ත්‍රී ප්‍රජනක පද්ධතියේ ඔක්කොම වගේ ඉන්ද්‍රියයන් තියෙන්නේ ඇඟ ඇතුලේනේ.පිටතට විවෘත වෙන විවරය සහ ඒක ආවරණය කරන ව්‍යුහත් ක්ලිටොරිසය එහෙම නැත්තං භගමණිය ගැනත් තමයි පිටතට පේන්ඩ තියෙන ඒවා ගැන කියන්ඩ තියෙන්නේ.

ස්ත්‍රී ප්‍රජනක පද්ධතියේ කොටස් නම් කළොත්,

# ඩිම්බ කෝෂ
# පැලෝපීය නාල
# ගර්භාශය
# ගැබ් ගෙල
# යෝනි මාර්ගය
# අභ්‍යන්තර යෝනි තොල්
# බාහිර යෝනි තොල්
# ක්ලිටොරිසය හෙවත් භගමණිය

ප්‍රජනක පද්ධතිය හා සම්බන්ධ අනිත් ඉන්ද්‍රිය තමයි පියයුරු.ඒ ගැන කළිං ලිපියක් ලිව්වා ඈ.නොකියවපු අය ගිහිං බලන්ඩ මෙතනිං.

දැං අර එක් එක් කොටස් ටිකක් විස්තර සහිතව බලමු.



ඩිම්බ කෝෂ

ස්ත්‍රීන්ගේ ඩිම්බකෝෂ කියන්නේ පුරුෂයින්ගේ වෘෂණවල අනුරූපකය කිව්වොත් හරි.ස්ත්‍රීන්ගේ ජනක සෛල වන ඩිම්බ හදන එක වගේම ස්ත්‍රී හෝමෝන හදන තැන්වලින් ප්‍රධාන තැනක් තමයි ඩිම්බ කෝෂ කියන්නේ.හැබැයි වෘෂණ වගේ නෙමෙයි මේ ඩිම්බ කෝෂ තියෙන්නේ ඇඟේ ඇතුලේ.මේ ඩිම්බකෝෂත් යුගලක් තියෙනවා.මේ දෙක ගර්භාශයේ දෙපැත්තේ පටක මගින් එල්ලලා තියෙන්නේ.3cm දිග 2cm පළල සහ 1cm උස ඕවලාකාර පුංචි බිත්තර දෙකක් මවා ගන්ඩ.ඩිම්බකෝෂත් අන්න ඒ වගේ ඈ.ඩිම්බ කෝෂවල හෝමෝන නිපදවීම සහ ඩිම්බ නිපදවීම ගැන ඔසප් චක්‍රය ගැන කතා කරද්දී බලමු.

පැලෝපීය නාල


පැලෝපීය නාල කියන්නේ ඩිම්බකෝෂයේ නිපදවෙන ඩිම්බයක් ගර්භාශයට අරං එන්ඩ තියෙන නලයකට.හරියටම කිව්වොත් ශුක්‍රාණු යෝනි මාර්ගයේ ඉඳං ගර්භාශය හරහා මේ පැලෝපීය නාලයෙත් කෙලවරටම යනවා.ඒ කෙලවර හරියෙදි තමයි ශුක්‍රාණුවලට ඩිම්බය හම්බ වෙන්නේ.එතනදි සංසේචනය උනාම ඒ සංසේචිත ඩිම්බය ගර්භාශයට එන්නේ මේ පැලෝපීය නාලය දිගේ.ඒත් හැම ඩිම්බයක්ම සංසේචනය වෙන්නේ නෑනේ.එතකොට ඒ ඩිම්බ නිකම්ම ගර්භාශය හරහා ඇවිත් යෝනි මාර්ගය හරහා ඔසප්වීමත් එක්කම පිට වෙලා යනවා.

පැලෝපීය නාලය එක කෙළවරක් ගර්භාශයට සම්බන්ද වෙලා තියෙනවා.අනිත් කෙළවර ඩිම්බකෝෂයේ ගෑවි ගෑවි තිබුණට ඒක ඩිම්බකෝෂයට තදින් සම්බන්ධ වෙලා නෑ.ඩිම්බකෝෂය පැත්තේ කෙළවර තියෙන විවරය වටේට ඇඟිලි වගේ ව්‍යුහ රැසක් තියෙනවා.



මේවායින් එකකින් තමයි ඩිම්බකෝෂ‍යට පැලෝපීය නාලය සම්බන්ධ වෙන්නේ.ඉතින් ඒ කියන්නේ පැලෝපීය නාලය තියෙන්නේ උදර කුහරය ඇතුලට විවෘත වෙලා.ඒක හින්දා ගෑනු අයගේ යෝනි මාර්ගය ආශ්‍රිතව යම් ආසදනයක් ඇති උනොත් ඒක ගර්භාශය පැලෝපීය නාල හරහා ගිහිං උදර කුහරය ඇතුලටත් පැතිරෙන්න පුළුවං.

මේ පැලෝපීය නාලය ඩිම්බකෝෂ‍යට හොඳින් සම්බන්ද වෙලා නැති උනාට මේ ඇඟිලි වගේ ව්‍යුහ ඩිම්බ මෝචනයක් කිට්ටුව ඒ කියන්නේ ඩිම්බ කෝෂයෙන් ඩිම්බයක් පිට කරන්ඩ සූදානම් වෙද්දි ඩිම්බකෝෂය හොඳින් ස්පර්ෂ කරමින් පිරි මැද මැද තමයි ඉන්නේ.ඉතිං ඩිම්බයක් පිට වෙනකොටම ටක් ගාලා අල්ලගෙන කුහරය ඇතුලට දා ගන්ඩ එයාලට පුළුවං.