17 July 2013

උං බිව්වා කියලා අපි මැරෙන්ඩ ද?






අරක්කු බිව්වාම සිරෝසිස් නම් රෝගී තත්ත්වයක් වැළඳෙනවා ලු ය.ඒ කියන්නේ අක්මාව හෙවත් පීකුද්දට කෙළ වෙලා යන එකටය.අරක්කු ඇඟ ඇතුලේදී බිඳ වැටී විෂ සහිත සංයෝගයක් හැදෙන අතර අක්මා සෛල මේ විෂ සංයෝගය මරාගෙන මැරෙන්නේ බොන එකා විෂෙන් බේරා ගන්ඩය.අක්මා සෛල මිය ගියාට අක්මාවට අළුතෙන් නැවත සෛල හදා ගැනීමේ හැකියාවක් තියෙනවා ය.නමුත් ගැටළුව තියෙන්නේ බොන උන් මේ අක්මාවේ සෛලවල නැවත ජනනය වීමේ වේගය අභිබවා සෛල මිය යන වේගය වැඩෛවන තරමට බොන්ඩ ගත්තාමය.එතකොට සෛල හැදෙන වේගෙට වඩා මැරෙන වේගය වැඩි වී සරල අනුකළනයට අනුව අක්මාවට කෙළ වෙනවාය.


නමුත් බොන උන් මේ කතාව පිළිගන්නේ නැත.උංට සිරෝසිස් ගැන කිව්වාම සමාජයේ අම්බානට බී අවුරුදු 80-90 ජීවත් වෙච්ච උන් ගැන උදාහරණ දික් කරන්නෝය.මගේ ජීවිත කාලය ඇතුලත මගේ අවට සිටි මා ඇසුරු කළ පුද්ගලයින් 6 දෙනෙක් බීම නිසා අකාලයේ ස්වර්ගස්ත වූහ.මේ මම ඉස්පිරිතාලයේදී මිය යනු දුටු සංඛ්‍යාවට අමතරවය.අර උදාහරණය ඉදිරිපත් කරන්නන්ට දෙන්නට මා ළඟ ද උදාහරණයක් ඇත.

උදා:- පොල් ගසක් යට සිටගෙන සිටින්නෙකුගේ ඔළුවට පොල් ගෙඩියක්, පොල් අත්තක්, ඇට්ටියක්, කළටියක් කුරුම්බැට්ටියක් හෝ හනස්සක් වැටීමේ අවධානමක් ඇත.මෙහිදී අවධාරණය කළ යුත්තේ අවධානමක් ඇත යන්නය.සමහර විට එකෙක් පොල් ගහක් යට අවුරුද්දක් හිටියත් කිසිවක් ඇඟට නොවැටීමටද ඉඩ ඇත.වැටෙන ඒවාත් කණ ගාවින් ඇඟේ නොගෑවී වැටීමට ඉඩ ඇත.එමෙන්ම නිකම් පොල් ගස යටින් යන්නෙකුට ඒ තත්ත්පරයේදී හොඳ සයිස් පොල් ගෙඩියක් හිස මතට වැටී ජන්මාන්තර ගත වීමේ භාග්‍යය ලැබීමට ද ඉඩ ඇත.එනිසා අපට උපදෙස් දිය හැක්කේ පොල් ගස් යට සිටීමෙන් වැළකෙන ලෙසය.එවිට පොල් ගෙඩියක් හිසට වැටීමේ අවධානම ආසන්න වශයෙන් ශුන්‍ය වේ.


මේ කොච්චර කිව්වත් බොන එකා බොනවාමය.උන්ට ජීවිතේ වෙන ආතල් ටික ටික නැති වෙලා යනවාය.ඒක අපිට කමක් නැත.උංගේ චූන් උංට චූන් නිසාය.නමුත් ගැටළුව එන්නේ උං තනියම චූන් එක ගන්නේ නැතුව අපිත් එක්ක බෙදා ගන්නට එන එකය.ඒ කියන්නේ නොබොන උන්ට පොවන එක විතරක් නෙමෙයිය.ගෑනිට වධ දීම, ළමයින්ට වධ දීම ආදිය ගැන අපිට කරන්ඩ දෙයක් නැත.අපේ රටේ ගෑනු මිනිස්සුංව පාලනය කර ගන්ඩ දන්නේ නැත.මිනිහා බොනවා නං ගෑනිත් බොන්ඩ පටං ගන්ඩ ඕනෑය.ළමයින්ටත් ටික ටික බොන්ඩ දෙන්ඩ ඕනෑය.එතකොට මිනිහා බීලා පිස්සු නටද්දී ඒක පිස්සුවක් මෙන් පෙනෙන්නේ නැතුව යනවාය.

එහෙම බොන්ඩ අවුල් වගේනම් ඒ කියන්නේ තමුන්ගේ අක්මාව, වකුගඩු, හෘදය ආදිය ගැන හිතන පතන ගෑනු මනුස්සයෙක් නම් දෙයියනේ කියලා තමුංගේ රස්සාවක් හොයාගෙන මිනිහාගෙන් දික්කසාද වෙන එක හොඳය.ඒ උනාට අපේ රටේ ගෑනු එහෙම කරන්නේ නැත.මිනිහාගෙන් ගුටි කන එක සහ බීපු මී හරකෙක් එක්ක (වමනය ගඳ සහ පාලනය කර ගන්ඩ බැරි ශරීරයක් එක්ක ) රමණයේ යෙදෙන්ඩ අපේ රටේ බොහොමයක් ගෑනු කැමතිය.ඒක නිසා උන් මිනිහාට දෙස් දෙවොල් තියමින් ඒකා එක්කම සිටිති.

උංගේ චූන් එක අපිත් එක්ක බෙදාගන්නවා කිව්වේ උං බීලා බීලා කෙළ උනාම ඒ බර අපිට දරන්ඩ වෙන එකය.මම ඒ දවස්වල මිනිස්සු බොන එක ගණන් ගත්තේ නැත.ඒකා බීලා මැරෙන එක උගේ අයිතියක් නිසා ඒ පිළිබඳව ඇස් කන් පියාගෙන ඉන්නට පුරුදු උනෙමි.නමුත් වාට්ටුවලට යන්ඩ පටන් ගත්තාට පස්සේ වාට්ටු භාර වෛද්‍ය නිළධාරියාට මේ බේබදු හරක්ගෙන් තියෙන කරදරය දැක්කාට පස්සේ මගේ ඒ අදහස් වෙනස් විය.මන්ද නුදුරු අනාගතයේ මාද ඒ කුණු කට්ටට කරගහන්නට සිතාගෙන සිටින නිසාය.බීලා කෙළ වෙලා එන උන්ගේ බොහොමයකගේ සිහි කල්පනාව හොඳ නැත.එක පොරක් සිහි විකලෙන් අතේ ගසා තිබූ සේලයින් කට්ට ගලවන්නට තැත් කළ නිසා ඔහුගේ දෑත් ඇඳට තබා බැඳ දැමීමට සිදු විය.නමුත් කට්ටිය එහෙ මෙහේ වූවාට පසු පොර කකුලෙන් සේලයින් බෝතලය එල්ලා තිබෙන තැනින් වැට්ටීමට උත්සාහ කරනු දුටු විට මට ඇති වූ ප්‍රහර්ෂය කියා ඉම කළ නොහැක.

තව එකෙක් ඇඳට දමා ඇඳෙන් වැටීම වැළැක්වීමට ඇඳේ දෙපස ආරක්ෂක වැට ඉහළට ඔසවා තැබූ විට මේකා එහි යකඩ කූරක් දෙපැත්තෙන් කකුල් දෙක දමාගෙන ඇඳෙන් බසින්නට උත්සාහ කරන්නට වීය.සිහි විකල්ලෙන් ඇඳෙන් බැසීමට දඟලද්දී යකඩ කූරේ වැදී ජුන්ඩා තැලෙනු දැක අනුකම්පාවක් ඇති විය.මෙවන් උන් වාට්ටුවේ ඉන්නා විට අනිත් ලෙඩ්ඩුන්ට අවධානය යොමු කරන්නට ඇති වෙලාව අඩු කරන්නට සිදු වේ.බඩේ වතුර පිරිලා හුස්ම ගන්ඩ අමාරු වෙනකොට ඒවා ඇදලා දාන්ඩ, ප්‍රතිශක්තිය අඩු නිසා ආසාදන ගැන විමසිල්ලෙන් ඉන්ඩ, රුධිරයේ අඩු සංඝටක අනුව පාරවිලයනය කරන්ඩ, අක්මාවේ , වකුගඩුවල ක්‍රියාකාරීත්වය මැනීමට රුධිර පරීක්ෂා කරන්ඩ ආදී එකී නොකී කර්තව්‍ය රැසක් මේ හරක් වාට්ටුවලට ගාල් කිරීම නිසා වෛද්‍යවරයාට පැවරේ.වෛද්‍යවරයාටත් වඩා වෙහෙසක් ඇති වන්නේ හෙදියන්ටය.ඒ නිසා මේ දෙගොල්ලෝම අර යක්කුන්ගේ ඇඟට කඩා පැනීම සාමාන්‍ය දෙයක් බවට පත් වී ඇත.

අනිත් ආතල් එක ඇත්තේ හදිසි අනතුරු වාට්ටුවේය.වාහන ඇක්සිඩන්ට් බොහොමයක් ඇල්කොහොල් හින්දාය.වලියක් ගිහින් කා කොටාගෙන නම් එතනද මුළිං ඇත්තේ ඇල්කොහොල්ය.මේ යක්කුන්ට වියදම් කරන්නේ මහජනයාගේ සල්ලි මිසක් බාර් කාරයින්ගෙන් ගන්නා හෝ උන්ගෙන් ගන්නා මුදල් නොවේ.බීලා එන උන්ගෙන් සල්ලි ගැනීමේ වැඩපිළිවෙලක් ක්‍රියාත්මක කිරීමට සැරසුනද එය ලත් තැනම ලොප් වූ බව කිව යුතු ය.ඒ නිසා මේ බොන උන්ගේ සෞඛ්‍ය රැක ගන්නට ඔබ අපි හැම දෙනාම උර දෙන්නෙමු.



අරක්කු විස්කි බ්‍රැන්ඩි රම් කසිප්පු හෝ රා යන ඕනෑම මගුලක ඇත්තේ එතනෝල් ය.ඒ නිසා එක එක ජාතිවලින් එක එක විදිහට වෙරි වෙනවා කියන්නේ පට්ට බොරුවක්ය.බීපු උන් සහ බොන උන් මේක පිළිගන්නේ නැති බව මම දන්නවාය.නමුත් ඇල්කොහොල් යනු මොළය නිද්‍රාවට පත් කරන්නා වූ සංයෝගයකි.එනම් ඇල්කොහොල් මඟින් මොළයේ ක්‍රියාකාරීත්වය අඩුකොට පානය කළ තැනැත්තා නින්දට යොමු කරවන සංයෝගයක් වේ.නමුත් මාධ්‍ය මඟින් සහ පූර්වජ බේබද්දන් විසින් වර්තමාන බේබද්දන්ට ඇල්කොහොල්වල වෙනස් මුහුණුවරක් ඇති බව මවා පෙන්වා ඇත.බිවූ පසු ඇතිවන (පෙන්වන ) අමුතු ජවය ඇත්තටම ඇල්කොහොල් මඟින් ඇති කරන්නක් නොවේ.එය පැව්ලොව්ගේ බලු පරීක්ෂාව හා සමාන වූ මොළයේ කෘත්‍රීමව ඇති කරන ලද ප්‍රතිචාරයකි.

ඒ කියන්නේ ජීවිතේට අරක්කු ගැන අසා හෝ දැක නැති එකෙකුට පෙවූ විට ඌ කරන්නේ කාටවත් කරදරයක් නොකර පැත්තකට වී නිදා ගන්නා එකය.එහෙම නැතුව බොරුවට සූර් වී ගෝරිවල පැටලෙන්නට යන්නේවත්, කුණුහරප කියා බෙරිහන් දෙන්නේවත්, ගෑනි සමඟ බලෙන් රමණයේ යෙදෙන්ඩ යන්නේ වත් නැත.

බොන උන් කියන තවත් සිරා කතාවක් ඇත.උන් කියන විදිහට බොන එක හෙණ ආතල් ය.ඒකෙන් ගන්නා ෆන් එක වෙන එකකින්වත් ගන්නට බැරිය.අනිත් උන් බොන එකට බණින්නේ බොන එකේ ආතල් එක විඳගන්ඩ දන්නේ නැති නිසාය. හරි අපි ඒක එහෙම යැයි මොහොතකට හිතමු.නමුත් මේ සුරලොව පෙන්වන අමෘත පානය බොන්නේ උන් විතරය.ඒකෙන් බිඳක් වත් උං උංගේ පෙම්වතියන්ට, බිරින්දෑවරුන්ට හෝ දරුවන්ට දෙන්නේ නැත.අනිත් හැම සැපතක්ම බෙදා හදා ගන්නා මේ බේබද්දන් සිය සහකාරියට සහ දරුවන්ට තමන් විඳින ඒ අමා මහ සැපත විඳින්නට දෙන්නේ නැත.ඒ කියන්නේ උන් මහා ආත්මාර්ථකාමී නරුම හැත්තක් ය.

මේ ගැන ලිව්වේ ළඟදී සිදුවූ නිමිත්තක් හේතු කොට ගෙනය.මගේ දෙවන මාමා ද බීලා මිය ගියේය.ඒ ගැන අපේ අම්මා මැරෙන්ඩ හැදුවාය.ඒකා මැරෙන්ඩ වැටී ඉද්දී බලන්ඩ නොයෑම ගැන මට දොස් කිව්වාය.මළාට පස්සේ මළ ගෙදරවත් යන්ඩ කිව්වාය.ඊට පස්සේ දානේට යන්ඩ කිව්වාය.මේ එක එකා බීලා මැරෙන මැරෙන පාරට මගේ වැඩ පාඩු කරගන්ඩ මම සූදානම් නැත.නමුත් මේ මාමා බිව්ව ආකාරයේ වෙනසක් ඇත.ඌ බැන්දේ ළමයි ලොකු මහත් වෙච්ච ගෑනියෙක්වය.ඌ බඳිද්දීත් ඒ ළමයින් සමාජයේ තැනකට ඇවිත් සිටියෝ ය.මාමාට ළමයි නැත.ඔහුගේ විශ්‍රාම වැටුප ඔහු මිය ගිය පසු නැන්දාට හිමි වේ.ඒ නිසා ඌ බීලා මළාට එච්චර දුකක් නැත.

නමුත් කළින් මිය ගිය එකා ළමයි හතක් හැදුවේය.ඒකා බිව්ව නිසාත් උගේ ගෑනිට ළමයි ගැන වගේ වගක් නැති නිසාත් ළමයි ටික නන්නත්තාර වෙන්ඩ් ගොස් යන්තම් ගොඩ ගියෝය.මේ දවස්වල අන්තිම එකා ගොඩ දාන්ඩ වලි කනවාය.ඌට සා\පෙ පළමුවර සමත් වෙන්ඩ බැරි වූ නිසා දෙවන වර ලියන්ඩ අපේ ගෙදර ගෙනත් නවත්තා ගත්තෙමු.ඌට ගණන් කියා දෙන්ඩ ගොස් මට එපා විය.1250-1000=250 යි කියා ගාණ හදන්ඩ ඌ දන්නේ නැත.ඌ එවරත් සා\පෙ අසමත් වූ බව කියන්ඩත් දෙයක් නොවේ යැයි සිතමි.


මේකේ ආතල්ම සීන් එක මේ දෙන්නාගේම මළ ගෙදරට සෙට් වෙච්ච කට්ටිය පදමට මත් වීම ය.මට කරන්නට ඉතුරුව තියෙන්නේ ඊලඟට ස්වර්ගස්ථ වන එකා අනුමාන කිරීම පමණකි.මේ ගැන අපේ චූටි මාමාට කිවූ විට ඔහු මරු කතාවක් කීවේ ය.

'ඒ දවස්වල ඇමරිකාවේ හොරකම් කළාම මරණ දඬුවම දෙනවලු ප්‍රසිද්දියේ.ඉතිං සෙනඟ මේ මරණ දඬුවම බලන්ඩ පිරිලා ඉන්න වෙලාවේ තවත් සෙට් එකක් බලන්ඩ ආව උංගෙන් පික් පොකට් ගහනවලු.'

ඒකත් එක්ක මට මතක් උනේ 'සොර දෙටුවෙල් කස තැලුම් කකා දං ගෙඩියට ගෙන යන වේලේ වධක බෙරේ දැක සොරා ගන්ඩ එය කදිමයි ලොබ සිතුවාලූ' කියන සීන් එකය.

කවුරුවත් බිව්වාට මට කමක් නැත.නමුත් බීලා අනිත් උන්ට වදයක් වෙන්ඩ එපා යැයි කාරුණිකව ඉල්ලා සිටිමි.මට ඇති අනිත් දුක හරක් වෙනුවෙන් ගිණි තියා ගත්තාට කවුරුවත් අරක්කු වෙනුවෙන් ගිණි තියා ගන්නේ නැති එක ය.ඉන් ගම්‍ය වන්නේ හරක් බේරා ගැනීම බේබද්දන් ගොඩ දැමීමට වඩා උතුම් බවද???

ඉස්තූතියි!!!



16 July 2013

උගේ පය බරවායට මුගේ පිටිකර බෙහෙත් බැඳීම

අපේ රට හරි ආතල් රටක් ය.ඒක හින්දා මේ රට දාලා යන්ඩ චාන්ස් එකක් ලැබුනත් දාලා යන්නේ නැත.මට එහෙම චාන්ස් එකක් එන්ඩ ඉඩක් ඇත්තේත් නැත.ආවත් ඒ ඩිංගි බෝට්ටුවේ ඕස්ට්‍රේලියාවට යන්ඩ චාන්ස් එකක් ය.එහෙම මාරක මැදින් පැනගෙන පීනාගෙන ඕස්ට්‍රේලියාවට පැන බෝරිං ජීවිතයක් ගෙනියනවාට වඩා මේ රටේ ජීවත් වෙන එක ආතල් ය.


මගේ මිත්‍රයෙක් කැනඩාවේ ජීවත් වන්නේය.ඌ ඒ රටේ ජීවත් වෙමින් අපේ රටේ අපි ජීවත් විය යුතු විදිහ අපිට කියා දෙන්නේය.ඌ කැනඩාවට බැණ වදින්නේ එහි ඒකාකාරී ජීවිතයෙන් හෙම්බත් වෙලාය.ඌ කෝච්චියේ ඒ දවස්වල හැමදාම කැම්පස් ගියේය.කෝච්චිය දුම්රිය වේදිකාවේ නවත්වන්නේ හැමදාම එකම තැනලුය.ඒ කියන්නේ දුම්රියේ (මේවාට දුම්රිය කියන එක වැරදිය.මොකද දුම් පිට වෙන්නේ අපේ වගේ රටවල ඉතුරු වී ඇති පෞරාණික දුම්රියවලින් නිසාය.විදුලියෙන් යන ඒවායේ දුම් පිට නොවේ යැයි උපකල්පනය කළ හැක.) නිශ්චිත දොරක් නතර කෙරෙන්නේ වේදිකාවේ නිශ්චිත ස්ථානයකය.වැරදීමකින් හෝ දුම්රිය නියාමක මහතා දුම්රිය අඩියක් දෙකක් ඉදිරියට ගෙන ගියහොත් ඔහු දුම්රිය නැවත ඒ අඩිය හෝ දෙක ආපස්සට ධාවනය කරන බව ඔහු කීවේ කළකිරීමෙනි.

'මේ රටේ යක්කු මේ සිස්ටම් එකේ ඒකාකාරී කමට කොච්චර පුරුදු වෙලාද කියනවා නං කෝච්චියට නගින්ඩ ඉන්න එකාට වැඩිපුර අඩියක්වත් යන්ඩ දෙන්නේ නෑ.පට්ට චාටර් බං.හැමදාම එකම සිද්දි ටික දැකලා එපා වෙනවා.' මගේ මිත්‍රයා මා සමඟ කීවේය.

ඇත්තය.හැමදාම එකම දේ නොදැක වෙනස්ම ආකාරයකින් සිතන පතන පාලකයින් සහ පරිපලකයින් සිටිනා රටක ජීවත් වීමේ ආශ්වාදය බලෙන් හෝ ලබාගත යුතුය.එනිසා මම විදෙස් ගතව සිටිනා සියළුම ශ්‍රී ලාංකිකයින්ට නැවත මෙරටට එන ලෙස ඉතාමත් ඕනෑකමින් ඉල්ලා සිටිමි.අඩුම තරමේ එවිට ෆේස්බුක් හා බ්ලොග් ආදියේ ලංකාවේ ඉන්න උන් ජීවත් විය යුතු විදිය කියා දෙන උන් ගණනවත් අඩු විය හැක.

හපුළුවාට උගේ පැටියා මැණිකක් ලු ය.

ලංකාවේ පහුගිය දිනවල ප්‍රසිද්ධ මාතෘකා බවට මාලක සිල්වා, දහම් සිරිසේන සහ රමිත රඹුක්වැල්ල පත්වූහ.ඒ පහර දීම් සහ අනවසරයෙන් ගුවන් යානා දොරක් ඇරීමට තැත් කිරීම නිසාය.එයිට අමතරව රටපුරාම ප්‍රාදේශීය මන්ත්‍රීවරුන් රැසක් ක්ෂණයකින් ප්‍රසිද්ධියට පත්වූයේ පහර දීම්, අල්ලස් ගැනීම්, ස්ත්‍රී දූෂණ සහ ළමා අපචාර, විදේශිකයෙක් ඝාතනය කිරීම සහ ගුරුවරියක් දණ ගැස්වීම ආදී වූ වීර වික්‍රමාන්විත ක්‍රියාවන්හි නිරත වී මාට්ටු වූ නිසාය.මෙකී ක්‍රියාවන් උදෙසා නීතිය ක්‍රියාත්මක වූ ආකාරය අපුල සහගතය.නමුත් රජය මේ වෙනුවෙන් පියවර ගෙන තිබේ.මෙකී අක්‍රමිකතාවයන් සඳහා ප්‍රධානම හේතුව නිසි විනයක් නොමැති වීම බව රජය තේරුම් ගෙන තිබේ.එමනිසා නිසි විනයක් රටතුල ක්‍රියාත්මක කිරීමට රජය විශ්වවිද්‍යාල ශිෂ්‍යයින්ට සහ විදුහල්පතිවරුන්ට සති දෙකේ හමුදා පුහුණුවක් ලබා දෙන්නට කටයුතු කළේය.එකී පුහුණුව ලැබූ විශ්වවිද්‍යාල ශිෂ්‍යයින් සහ විදුහල්පතිවරුන් සමාජගත වූ පසු ඉහත සඳහන් කොට ඇති මැර ක්‍රියාවන් සමාජයෙන් අතුගා දැමිය හැකිවනු ඇත.නමුත් එය සිදු කරන ආකාරය දන්නේ රජය පමණි.


නියෝජ්‍ය පොලිස්පති වාස් ගුණවර්ධන මහතා අල්ලස් ගෙන කෝටිපති ව්‍යාපාරිකයෙක් ඝාතනය කළ බව කියා ඔහුට විරුද්ධව නඩු පවරා ඇත.ඝාතනයට ඔහුගේ පුත්‍රයා මෙන්ම බිරිඳද සම්බඳ බව කියැවේ.ඇත්තෙන්ම ආදර්ශවත් පවුලකි.දුකේදීත් සැපේදීත් එකටම ඉන්නා බව විවාහ වෙද්දී පොරොන්දු උවද සිය සැමියා පුද්ගල ඝාතනයකට සැරසෙද්දී ඊට පූර්ණ දායකත්වය දෙන්නට බොහෝ බිරින්දෑවරු මැළි වෙති.නමුත් වාස් ගුණවර්ධන මහතා සොයාගෙන ඇත්තේ රත්තරන් බිරින්දෑවකි.සැමියා නීතිය ඉදිරියට ගෙන ආ විට සාක්ෂි කරුවන්ට තර්ජනය කිරීමට ද ඇය පැකිළුනේ නැත.මෙවන් වූ දෙමව්පියන්ගේ ආදර මැද හැදී වැඩුනු පුත්‍රයාටද මුදල් සෙවීමේ කෙටි ක්‍රම කියා දුන් මේ දෙමව්පියන් අපි සදා සැමරිය යුතු නොවේද?

එමෙන්ම ත්‍රිකුණාමලය පොලීසියේ ලොක්කෙක් අල්ලස් ගන්නා විට මාට්ටු වූ බව දැක්වෙන පුවතක් ඊයේ හෝ අද පත්‍රයේ පලවී තිබුණි.පොලිස් නිළධාරීන් අල්ලස් ගන්නා බව, සිර මැදිරිවල ඉන්නා රැඳවියන්ට අමානුෂික ලෙස පහර දෙන බව සමාජය දන්නා එහෙත් ගණන් නොගන්නා කරුණක් බවට පත් වී ඇත.මේ බව වටහා ගත් රජය මේ අකාර්යක්ෂමතා මග හැරීමට නම් සීසීටීවී කැමරා සවිකොට නිරීක්ෂණය කිරීම සුදුසු බව තීරණය කරන ලදී.එබැවින් වහාම ලංකාවේ විශ්ව විද්‍යාල තුල දැඩි පිරිවැයක් දරා සීසීටීවී කැමරා පද්ධති සවි කිරීමට රජය කටයුතු කරගෙන යයි.එමගින් සිසු සිසුවියන් පෙම් කෙළීම්, රති කෙළීම් අතරේ කුමන හෝ අල්ලස් ගැනීමක් හෝ පුද්ගල ඝාතන සැලැස්මක් හෝ සිදු කළහොත් වහාම අත් අඩංගුවට ගත හැකි නිසා තව වසර කීපයක් ඇතුලත රාජ්‍ය සේවය දූෂණයෙන් තොර තැනක් බවට පත් වීම කිසිවෙකුටත් වැළකිය නොහැක.




දුමින්ද සිල්වා මන්ත්‍රීවරයා භාරත ලක්ෂ්මන් මහතා ඝාතනය කළ බවට චෝදනා ලබා සිටී.කවුරු කවුරුත් ලොක්කෝ ගැන කතා කරනු මිස උන් නිසා මියගිය සොක්කෝ ගැන කතා කරන්නේ නැත.කෙසේ වෙතත් ලොක්කන් පස්සේ ඒ සොක්කන් යන්නට ඇත්තේ අවධානම දැනගෙන විය හැකි නිසා අපි ඒ ගැන කුලප්පු විය යුතුද නැත.එනමුත් භාරත ලක්ෂ්මන් ඇතුලු සිව් දෙනෙක් ඝාතනය කිරීමේ සිද්දියකට චෝදනා ලබා ඇති ඔහු ඇප මත නිදහස් වූවා පමණක් නොව විදෙස් ගත වීමේ අවසරයද ලබා ගත්තේය.පාර්ලිමේන්තුව ඔහුට තහනම් කලාපයක් බවට පත් කිරීමට ජනතාවාදී රජය ක්‍රියා කළේ නැත.

සංජීව බණ්ඩාර යනු අන්තර් විශ්වවිද්‍යාලීය ශිෂ්‍ය බල මණ්ඩලයේ කැදවුම්කරු ය.අනවසර රැස්වීම් සංවිධානය කිරීම, මහජනයා අපහසුවට පත්වන සේ උද්ඝෝෂණ සංවිධානය කිරීම ඇතුලු චෝදනා එල්ල කරමින් ඔහු රිමාන්ඩ් භාරයට පත් කර ඇත.ඔහුට කිසිඳු විශ්ව විද්‍යාලයකට ඇතුළු වීම තහනම් කර ඇති අතර සති තුනකට වරක් ඉරු දිනයක පොලිසියට ගොස් තමා ජීවත් වන බවත් පැනගොස් නැති බවත් සනාථ කළ යුතුය.කෙසේ වෙතත් එකී ක්‍රියා මාර්ග හේතු කොටගෙන ලංකාවේ මිනී මරාගැනීම් සීඝ්‍ර ලෙස අඩුවනු ඇත.ප්‍රජාතන්ත්‍රවාදී රටක ප්‍රධාන ලක්ෂණයක් වන නීතිය ඉදිරියේ සියල්ලෝම එක සමාන වීම ලංකාවේ ක්‍රියාත්මක වන බවට හොඳම උදාහරණය සංජීව බණ්ඩාර අත් අඩංගුවට ගැනීමය.අන්තරේ වේවා කුමන හෝ ශිෂ්‍ය සංගමයක කැඳවුම් කරුවෙකු වූ පමණින් නීතිය ඔහුට විශේෂයක් කිරීමට සූදානම් නැති බව පෙන්වා දෙමින් ඔහුට පැනවූ දණ්ඩනය සමස්ත ශ්‍රී ලාංකිකයින් දොහොත් මුදුන් දී අනුමත කළ යුතුය.

ස්තූතියි!!!





13 July 2013

ලෝකාන්තයට නොමග යෑම....

කොහොද අපේ ධනා නිකං නළුවා වගේ නේ....

අපි සබරගමුව කැම්පස් එකට එනකොට රෑ අටහමාරට විතර ඇති.ඒසී බස් එකක් උනත් ඒ මගුලෙත් අර කුණු බස් සින්දු දාලා තිබ්බා.මේ යක්කු නිකං මේ කතාබහ කර කර ඉන්න වචන ටිකක් රෙකෝර්ඩ් කරගෙන ඒකට චාටර් තනුවක් දාලා ගහනවා සින්දුවක්.ඊට පස්සේ ඒවා සීඩීවලට ගහලා බස් කාරයින්ට නොමිලේ බෙදලා දෙනවද කොහෙද. අසරණ මගී ජනතාව හෙම්බත්වෙනවා ඒ කුපාඩි සින්දු අහලා.කොහොම හරි ඔන්න කැම්පස් එක ගාව කඩේකිං රෑට කාලා හොස්ටල් එකට ගිහිං ඇඟපත හෝදගෙන නිදාගත්තා කියමුකෝ ඈ.

පහුවදා පාන්දරම නැගිටලා දතකට මැදගෙන (කළිං දවසේ බීපු නෙස්ටමෝල්ට් එකට පින් සිද්ද වෙන්ඩ ශරීර කෘත්‍ය කරන්ඩ උවමනාවක් උනේ නෑ.ඉමෝඩියම් පෙත්තක් ගැහුවනං ඒත් ගොඩම තමයි ) අපි ගමන යන්ඩ පිටත් උනා.කැම්පස් එක ගාවිං බස් එකකට නැගලා නන්පේරියල් වත්තට හැරෙන තැන හන්දියට ඇවිල්ලා නන්පේරියල් බස් එක එනකං බලාගෙන ඉන්නකොට අපිට නන්පේරියල් වත්තේ ඉස්කෝලේ විදුහල්පති මහත්තයා හම්බ වෙලා කතා කර කර හිටියා.ඒ ඉස්කෝලේ ළමයි 90ක් ඉගෙන ගන්නවලු.ඈත ඉඳං එන ළමයින්ට නවතින්ඩ හොස්ටල් එකක් හදන්ඩ ප්ලෑන් එකක් තියෙනවා කියලත් ඒ මහත්තයා අපිට කිව්වා.

ඔන්න පාන්දර 6.30 විතර වෙනකොට බස් එක ආවා.අපි සෙට් එක ඒ කිව්වේ මම හෙවත් මම, සිතුම් හෙවත් කුරුළෑවා, චිරාන් හෙවත් තට්ටයා, ධනා හෙවත් ධනා, පුලා හෙවත් ලාන්ස් සහ ශෂික හෙවත් කඩියා කියන වීරෝධාර තරුණයෝ හය දෙනා නැග්ගා බස් එකට.අපරාදේ කියන්ඩ බෑ නන්පේරියල් වත්තේ ඉස්කෝලේ ගාවට එනකං අපි හයදෙනා විතරයි බස් එකටම.ඉස්කෝලේ ගාවිං බස් එක නැවැත්තුවා.අපි හය දෙනා බැහැලා පයින් ගමන පටං ගත්තා.

ඔන්න මමත් ට්‍රයි කළා අපි ගිය පාරේ සිතියම දාන්ඩ.කොච්චර දුරට සාර්ථකද කියලනං දන්නේ නෑ.



View Larger Map
අපි ගිය පාර ඈ...

ඉස්කෝලේ පිහිටලා තිබ්බ තැනනං මරු.කියන්ඩ වචන නෑ.නිම්නයක් වගේ තැනක්.මෙහේ මිනිස්සුන්ටනං ඒක පුරුදු ඇති.ඒත් ගිණි කූටක අව්වේ දූවිලි කකා ඉස්කෝලේ ගිය අපිටනං ඒක සුරංගනා කතාවක සීන් එකක් වගෙයි පෙනුනේ.මම හොඳට බලං හිටියේ හිම කුමාරි වගේ කෑල්ලක් පන්තියකිං ඔළුව දායිද කියලා.ඒ උනාට දැකුම්කලු දෙමළ ගෑනු ළමයි ටිකක් විතරයි ඕං හිටියේ.

ඔය කඳු දෙක මැද්දේ පුංචියට පේන ගොඩනැගිල්ල තමයි ඉස්කෝලේ


මෙන්න හොඳ ළමයි උදේම ඉස්කෝලේ යනවා..

අපි එතන ඉඳං ඇවිදගෙන ඇවිදගෙන ඇවිදගෙන යනකොට අපිට හම්බ උනා උස දිය ඇල්ලක්.ඒකත් බලලා ෆොටෝ ගහලා ආයෙමත් ඇවිදගෙන ඇවිදගෙන ඇවිදගෙන යනකොට (මේ කියන්නේ සෑහෙන දුරක් ඇවිදගෙන ගිහිල්ලා ඈ...) මම පුලාගෙන් ඇහුවා මචං අපි කන්නේ කොහෙදිද කියලා.මොකද පුලා තමයි අපේ නඩේ ගුරා.ඌ සබරගමුව කැම්පස් එකේ ඔය ඉඩං මණින්ඩ ඉගෙනගන්න කෝස් එකක් කරනවා.ඌ මේ ගමන දැං තුන් පාරක් ඇවිල්ලා තියෙනවා කියලා තමයි ඌ කියන්නේ.ඌ කිව්වේ තව පොඩ්ඩක් උඩහට ගිහිං කමු කියලා.ඔය විදිහට මම කීප සැරයක්ම ඇහුවත් පුලා කිව්වේ තව උඩහට ගිහිං කමු කියලා.මූ අපිට කන්ඩ ගෙනල්ලා තිබ්බේ පාං.ඔව් අර සුද්දංගේ කෑම ජාතිය අනේ.කොහොම හරි මම හිතුවේ මූ පාං ටික කඩේකිං කුළියට ගෙනල්ලා කියලා.අපිට කන්ඩ නොදී ආපහු කඩේට පාං ටික රිටර්න් කරන්ඩයි මූ හදන්නේ කියලා හිතලා උදේ කෑම අමතක කරලා හිත හදා ගන්න කොට අපි ආවා හුළං කපොල්ලක් වගේ තැනකට.එතන පට්ටම හුළං ඈ.මං වගේ බර අඩු කට්ටිය කෙළිංම ගුවන් ගත වෙන්ඩ උනත් ඉඩ තියෙනවා.අපි එතන අස්සක තිබ්බ තැනක ඉඳං පාං කන්ඩ සෙට් උනා.


පාං කන්ඩ ගෙනත් තිබ්බේ උම්බලකඩ සම්බෝල සහ තක්කලි සෝස්.මේ ජාති දෙක එකට අනලා ගත්තම පාං තුං කාලක් විතර ලේසියෙන් බඩට දා ගත්තෑකි.ඒ උනත් අපි වගේම තවත් හරක් තුන් දෙනෙකුත් අපිට සෙට් වෙච්ච හින්දා පාං උං එක්කත් බෙදා ගන්ඩ සිද්ද උනා.වැඩි වෙලා නාස්ති නොකර අපි ආයෙත් ගමන පටං ගත්තා.

වටපිටාවේ සොබා සිරිය බල බල අපි උඩට නැගලා නැගලා නැගලා අන්තිමට පරිපථ බංගලාවට හෙවත් සර්කිට් බංගලාවට ආවා.මේක කට්ටියට නිවාඩුවට ඇවිත් ඉඳලා යන්ඩ මරු තැන.දවසක් නවතින්ඩ දහ දෙනෙක්ට 12,500ක් කියලයි කිව්වේ.කනබොන දේවල් අරං ආවොත් උයාගන්ඩ පුළුවං.ඒ උනාට අපිට එච්චර සල්ලි නැති හින්දා සහ අපේ ගමනාන්තය තව දුර හින්දා අපි ආයේත් ගමන පටං ගත්තා.

මෙන්න ගිහිං නවතිනවනං මරු තැන...

මේ බංගලාවේ වත්ත සීමාවෙන් තමයි කැළේ පටං ගන්නේ.ඒ කැළේ මැද්දෙන් යන අඩි පාර දිගේ අපි ඒ කඳුකර තෙත් සදාහරිත වනාන්තරයට ඇතුල් උනා.ඒක නියම නොයිඳුල් කැළයක්.කැළේ ආතල් එක ගන්න අපිට වෙන ෆන් එකක් ගන්ඩ තියා එක එකාව බයිට් කරගන්ඩත් අමතක වෙලා ගියා.කැළේ මැද්දෙං පීරගෙන අර පුංචි අඩි පාර දිගේ මඩේ ලිස්ස ලිස්ස අපි අපේ චාරිකාව දිගටම ගියා.අතර මග පොඩ්ඩක් පමා උනේ මගේ ළඟයි පුලා ළඟයි කැමරා දෙකක් තිබ්බ හින්දා.පුලාගේ කැමරාවනං පට්ටයි.මගේ එකත් එච්චරම අවුලක් නෑ.ඒක මේ ට්‍රිප් එක යන්ඩ අපේ මාමගෙන් ඉල්ලගෙන ආවෙ.






ගස්වල රැඳිලා බේරෙනෙ වතුරවලින් මුළු ඇඟම නෑවිලා කකුල්වල ඇඟිලි අස්සෙන් මඩ චිරි චිරි ගාලා පනිද්දි අපි හෙන හෙළක් අයිනට ආවා.එතන ඉඳං හෙළ අයින දිගේ ලෝකාන්තය කියලා ලෝකයා හඳුන්වන තැනට එනකං එනකොට අපේ හොඳ පණ ගිහිං.ලෝකාන්තය අයිනෙත් ඉඳං ෆොටෝ ගහලා අපි ඉක්මනටම ආයෙත් ගමන පිටත් උනා.අපේ අරමුණ උනේ හැකි ඉක්මනින් හෝර්ටන් තැන්නේ ප්‍රවිශ්ඨය ගාවට එන්ඩ.


හෝර්ටන් තැන්න හරහා එන ගමනේ සැරින් සැරේ ඇද හැලිච්ච පොද වැස්සට තෙමිච්ච එක ඇරෙන්ඩ කියන්ඩ තරං වැදගත් දෙයකට සිද්ද උනේ සුද්දෙක් උගේ පවුලයි තරුණ දෝණියැන්දයි එක්ක එන ගමන් තිබ්බ  දිය පාරක් හරහා පන්නවා ගන්ඩ ධනා සද්භාවයෙන් ඉදිරිපත් වෙච්ච එක තමයි.හැබැයි ධනාගේ බලාපොරොත්තු සුන් කරවමින් සුද්දා ධනාට උගේ දුවගේ අහලකටවත් එන්ඩ දුන්නේ නෑ.අතරමග තිබ්බ බක්කරේගේ ඇල්ල හෙවත් බේකර්ගේ ඇල්ල බලන්ඩත් අපි අමතක කළේ නෑ.ඒකේ ෆොටෝ ගහන්ඩ ට්‍රයි කළත් ලෙන්ස් එකේ වතුර බින්දු රැඳිලා ෆොටෝ එක පොඩ්ඩක් චාටර් උනා.


හෝර්ටන් තැන්නේ ප්‍රවිශ්ඨය ගාවට එනකොට අපේ හෘදය වස්තු 'ලබ්-බක් ලබ්-බක්' ගාලා හයියෙන් ගැහෙන්ඩ ගත්තේ කවුරුහරි අපේ ටිකට් චෙක් කළොත් බඩු මාට්ටු වෙන හින්දාය.කැළේ පාරෙන් ගමන් කිරීමට තහනම් බවත් අහු උනොත් දඩය 12,000ක් බවත් අපි දැන සිටිය නමුත් අපේ රටේ ඉබේ හැදිච්ච සොබාව සෞන්දර්ය බලන්ඩ යන්ඩ කොහෙවත් ඉන්න උන්ගෙන් අවසර ගන්ඩ අපි ලෑස්ති නැත.කෙසේ වෙතත් ලංකාවේ මිනිස්සුංගේ කාර්යක්ෂමතාවයට පින් සිද්ද වන්නට අපේ ටිකට් චෙක් කරන්ඩ කවුරුවත් හිටියේ නැත.


ප්‍රවිෂ්ඨය ගාව ඇති ආපන ශාලාවෙන් අපි රුපියල් 50 ගණනේ තේ මිළදී ගතිමු.වෙලාවට අපි ළඟ පාං තිබුණේය.නැත්තං පාං එතැනින් මිළදී ගන්නට ගොස් හෙන අවුලක් වෙනවාය.අපි පාං එතනින් මිළදී ගත්තානම් දෙබස මේ වාගේ වන්නේය.

'අයියේ අර බනිස් වගේ එයිට වඩා හයිය සයිස් එකෙ ලොකු ඒවා තියෙනවද?'

'මොනවද මල්ලි පාං ද?'

'ඔව් අයියේ'

'ඉතිං එහෙම කියන්ඩ එපායැ'

'අනේ ඒක කියාගන්ඩ බෑ අයියේ'

ඇත්තට ඒ වෙනකොට අපිට පාං කියාගන්ඩ බැරි තත්ත්වෙකය හිටියේ.උදේ කාපු විදිහටම පාං කා තේ බිවූ අපි නැවත් ගමන ආරම්භ කළෙමු.මෙතැන සිට ඔහියට කිලෝමීටර 11ක් බව දැක්වෙන පුවරුවක් විය.අපි දෙපාවලට වැඳ ඔහිය බලා ගමන ඇරඹීමු.අතරමග ගෝනෙක් දෙන්නෙක් හමු විය.ටිකක් දුර යනකොට ඈත 15-20ක් පමණ වූ ගෝන්නු රංචුවක් දැක මම ඈතින් සිටි පුලාට කතාකළේ හොඳ කැමරාව තිබුණේ උගේ ළඟ නිසාය.නමුත් නමුත් සිතුමාගෙන් පිටවූ අධෝවාතයක හඬ අසා ගෝන්නු කැළයට දුවන්නට වූවෝය.රංචුවේ සුළු පිරිසක් මගේ ළපටි කැමරාවට ඈතින් අසුවිය.
හොඳට කිට්ටු වෙලා බැලුවොත් ඈතිං ඉන්න ගෝන්නු ටික පෙනෙයි ඈ...

එතැන් පටන් විශේෂ සිදුවීම්වලින් තොරව අපි විටෙක තෙමෙමින්, විටෙක සීත සුළඟෙන් මැඩෙමින් අවට සොබා අසිරිය විඳිමින් ඔහිය දුම්රිය ස්ථානයට ළඟා උනෙමු.ඔහිය දුම්රිය ස්ථානයේ වැසිකිළිය දුටු මට එතුලට ගොස් බත් කන්නට හිතුනත් පමා වැඩි නිසා අපි හය දෙනා ත්‍රීරෝද රථයක නැග බොරලන්ද හන්දියට පැමිණීමු.

මේකේ එක හිතකිං කොහොම මුත්‍රා කරන්ඩද අප්පා


සාමාන්‍යයෙන් කෝච්චියේ නැග හපුතලේට ඒම මේ චාරිකාවේ ක්‍රමය වන නමුත් එදා කෝච්චි වර්ජනයක් නිසා අපට බසයෙන් යෑමට සිදුවිය.එනිසා බොරලන්දට ත්‍රීරෝද රථයෙන් ආ අපි එතැන සිට හපුතලේට බසයෙන් ආවෙමු.අපි හය දෙනාවම දමාගෙන ආ ඒ කාරුණික ත්‍රීරෝද රථ රියැදුරු මහතා අපට හපුතලේට බසයක් එනතුරු අප සමඟ කතා බහේ යෙදී සිටියේය.

අපි හය දෙනාම දාං එන්ඩ නිර්භීත වෙච්ච රියැදුරු මහත්තයා

හපුතලෙන් කොළඹ බසයක නැගී නැවත පඹහින්නට ආ අපි හොස්ටල් එකේ දමා ගිය අපේ බඩු මුට්ටුත් එකතු කරගෙන කැමරා දෙකේ ෆොටෝ ටිකත් හුවමාරු කරගෙන රෑට කා නැවත කොළඹ බසයක් එනතුරු පඹහින්න හන්දියට වී කල් මැරීමු.අන්තිමේ බසයක් පැමිණි අතර ඒ වන විට රෑ 8.30 පමණ වී තිබූ නිසා අපට ඉඳ ගැනීමට සීට් තිබුණේය.නැවතත් කර්ණ කටුක බස් සින්දුවලට සවන් දෙමින් එන්නට සිදු වූවත් බසයට නැගීමට කළින් ගත් ප්‍රොමෙතසින් පෙත්ත නිසා බසය හෙලවීමෙන් එන ඔක්කාරය නැති වූවා පමණක් නොව එහි ඇති නිද්‍රාජනක භාවය නිසා ටවුහෝල් එකට එනතුරු සුව නින්දක්ද ලබාගත හැකි විය.


12 July 2013

දුම් රිය මගී ජනතාවෙනි, මේ ඔබේ අවධානය පිණිසයි!!!


ඊයේ උදේ වරුවේ මගේ පුංචි බයිසිකල් කට්ට හදාගන්ඩ කියලා ඒකට අවශ්‍ය කරන අඩුම කුඩුම ටිකක් ගන්ඩ මම ගම්පහට ගියේ.මගේ බයිසිකලේ ලොවෙත් නැති එකක් හින්දා ඒකට ඕනෙ කරන අමතර කොටස් හොයන එක ලේසි නෑ කියලා මම දැනං හිටියා උනත් ගම්පහින් හොයාගන්ඩ බැරිවෙයි කියලානං හිතුවෙ නෑ.ඔන්න ගම්පහ එහෙ මෙහෙ දාඩිය පෙරාගෙන ඇවිද ඇවිද ඉද්දි තමයි මගේ සොඳුරගෙන් ආවෙ කෝල් එක.උන්දෑ අර ජේවීපී උංගේ උසිගැන්වීම්වලට අහුවෙලා කොළඹ ඇවිල්ලා පිකට් එකක් කරන්ඩ.ඔන්න බලන්ඩ සහෝදරවරුනි මේ විශ්වවිද්‍යාලවල උන්ට පුස්තකාලෙට වෙලා පොතක් පතක් බලාගෙන ඉන්නැතුව කොළඹ එනවා පිකට් කරන්ඩ.මේ රටේ ප්‍රශ්න ඔක්කොම විසඳිලා තියෙන වෙලාවේ මේව නං කරවන්නේ විදෙස් බළල් අත් ම තමයි.

කොහොම හරි සතියකින් විතර උන්දෑ මුන ගැහෙන්ඩ බැරි වෙච්ච හින්දා සහ බයිකලේට අවශ්‍ය කෑලි ගම්පහ හොයාගන්ඩ තිබ්බේ නැති හින්දාත් මම ඒ ඇඳං හිටපු මඩ ගෑවිච්ච සෙරෙප්පු දෙකයි කොට කළිසමයි හඩු කමිසෙයි පිටිං නැග්ගා කෝච්චියට.ඔන්න කොහොමහරි කොටුවට ගිහිල්ලා බයිසිකලේට අඩුමකුඩුම ටිකත් හොයාගෙන ස්ටේශන් එකේදි පවුලවත් මුණ ගැහුනා කියමුකෝ.

ඔන්න දැං තමයි කතාව පටං ගන්නේ ඈ.



කොටුවේ කෝච්චි දෙකක් නවත්තලා තිබ්බා ගම්පහ පැත්තට යන.එකක් පොල්ගහවෙල යන එක.ඒක කළිං යන හින්දා ඒකෙ සෙනඟ පිරිලයි හිටියේ.අපිටත් යන්ඩ හදිස්සි උනත් පොඩ්ඩක් කතා කර කර යන්ඩ ඕනේ හින්දා සහ පවුල උදේ ඉඳං අව්වේ හිටං ඉඳලා කකුල් රිදෙනවා කිව්ව හින්දා සහ කලිං දවසේ යෝධ පා ගමනක් ගිහිං ඇවිත් මගෙත් කකුල් රිදෙන හින්දා අපි පොල්ගහවෙල එකට නගින්නැතුව අනිත් වේදිකාවේ නවත්තලා තිබ්බ පැය බාගෙකිං විතර යන්ඩ නියමිත රඹුක්කන කෝච්චියට නැගලා ඉඳ ගත්තා.

ලව් කරද්දි කාලය යනවා තේරෙන්නේ නෑ නොවැ.ඉතිං ඔන්න අපි දන්නෙම නැතුව කෝච්චිය පිටත් වෙන වෙලාවත් ආවා කියමුකෝ.ඔන්න කෝච්චිය ආවා මරදානට.මේ වෙද්දි අපිට නොදැනීම කෝච්චිය සෙනඟගෙන් පිරිලයි තිබුනේ.ඔන්න බලන්ඩ සහෝදරවරුනි කරුමෙක මහත.මරදානෙන් නැග්ගා කියන්ඩකෝ ළඳක් කිරිකැටියෙකුත් වඩාගෙන.සෙනඟ අස්සෙන් ඔළුව දාපු අංකල් කෙනෙක් 'මල්ලි පොඩ්ඩක් සීට් එක දෙනවද?' කිව්වේ විධානාත්මක ස්වරූපයෙන්.අසරණ වෙච්ච මම අර මොනවද කාපු මොකාද එකා වගේ නැගිටලා සීට් එක පූජා කළා.




මට දුක මේකයි.මේ වගේ සීට් එක පූජා කරන්ඩ සිද්ද වෙච්ච පළවෙනි දවස මේක නෙමෙයි.මට පාං කියාගන්ඩ බැරි තරං මහන්සි වෙලා ඉඳගෙන යන්ඩ ඕනෑ කියලා හිතාගෙන මරදානෙන් නගින්නැතුව කොටුවට ගිහිල්ලා පොරකාලා සීට් එකක් අල්ලගෙන ඉඳගෙන එනකොට මරදානෙන් නගිනවා කවුරු හරි සීට් එක දෙන්ඩ වෙන කෙනෙක්.ඇයි වදේ අපිත් කියලා මිනිස්සුනේ නැද්ද මං අහන්නේ.ඒකත් කමක් නෑ කියමු.මේ මිනිස්සු සීට් එක දුන්නම නිකං මනුස්ස කමට හිනා වෙයවු.උං හැසිරෙන්නේ හරියට උංට ආණ්ඩුවෙන් ලියලා දීපු සීට් එකේ මම බලෙං ඉඳං ආවා වගේ.අනික උංට සීට් එක දීලා එතනම හිටං යන මාව පෙනි පෙනී වෙන එකෙක්ට සීට් එක දීලා බැහැලා යන උනුත් ඉන්නවා.

ඉතිං ඔන්න ඔහොමයි සහෝදරවරුනි මගේ සහ මගේ ප්‍රියාවගේ පෙම් හමුවට කෙළ උනේ.ඊට පස්සේ අපේ උන්දැත් නැගිටලා කකුල් රිදෙන එක අමතක කරලා ගම්පහට එනකං හිටගෙන ලව් කර කර ආවා.

දැං මේක කියවන ඇත්තන්ට මට කියන්ඩ තියෙන්නේ මේකයි.ඔය ඇත්තෝ දුර ගමනක් යනවනං සහ ඒක පොදු ප්‍රවාහන සේවෙකින් යන්ඩ හිතං ඉන්නවනං කළිං ප්ලෑන් කරලා සෙනඟ ඩු වෙලාවක යන්ඩ උත්සාහ කරන්ඩ.නැත්තං අනිත් මිනිස්සු කරනවා වගේ ටිකක් කළිං ඇවිත් තමුන්ට හෝ තමුංගේ බිරිඳට හෝ තමුන්ංගේ දරුවන්ට හෝ තමුංගේ දෙමව්පියන්ට සීට් එකක් හොයලා ඉන්දවන්ඩ.එහෙම කෙනෙක්ට සීට් එකක් දෙන එක අනිත් අයගේ වගකීමක් කියලා හිතන්ඩ එපා.අනිත් එක කවුරු හරි එහෙම සීට් එක දුන්නම පොඩ්ඩක් හිනාවෙලා තමුන් මනුස්සයෙක් කියලා පෙන්නන්ඩ.



ඉස්තූතියි!

01 July 2013

හැමෝටම සාධාරණ විසඳුමක්...


අනිද්දා ආයිත් විභාගයක්ය.ඒක නිසා ඇති වෙන්ඩ පාඩං එහෙම කරලා නිදාගන්ඩ කියලා ඇඳට ගියාට නින්ද ගියේ නැත.මම ඔය විමල් අයියලා ,පාඨලී අයියලා වගේ නෙමෙයිය.හැම තිස්සේම රට ගැනම හිත හිතාමය ඉන්නේ.දැං නින්ද ගියේත් නැත්තේ රට ගැන හිත හිත ඉඳලාය.රටේ ප්‍රශ්නවලට කල්පවත්නා ස්ථිරසාර ධරණිය විසඳුමක් හිත හිතා ඉන්නකොට හෙණ ගහන්නා වගේ පස්ට අයිඩියා එකක් ආවේය.උදේ වෙනකොට අමතක වෙලා තිබ්බොත් අපරාදේ හින්දා දැන්ම ලියලා තියලා නිදාගන්ඩ හිතුවෙමි.

කරන්ඩ තියෙන්නේ මේකය.කට්ටියම ඔය මැනිං මාර්කට් එක පැත්තේ ගිහිල්ලා රාබු,ගෝවා,කොස් ඇට වගේ වායු වඩන එළවලු ටිකක් අරං කැමති විදිහකට උයාගෙන කන්ඩ ඕනෑ.හොඳට රහට උයාගන්ඩ බැරිනං මාරයාට දෙන්ඩ කෝල් එකක්.ඔන්ලයින් කුකරි ක්ලාස් එකක් දාලා හරි උයන හැටි කියලා දෙයි ඕං.දැං මේ වායුබලය උදරයේ ක්‍රමයෙන් වර්ධනය වෙනකොට කට්ටියත් එක්ක යන්ඩ ගිහිල්ලා නගින්ඩ යාපනේ යන බස් එකකට.බස් එකේ සින්දු දාලා තිබ්බේ නැත්තං යාපනේට යනකං හොඳ නින්දක් එහෙම දාලා යාපනෙන් බැහැලා යන්ඩ මුහුදු වෙරළට.ගිහිල්ලා ඉන්දියාවට පසුලා දකුණට මුහුණලා හිටගන්ඩ.දැං ඉණෙන් අංශක 30-45ත් අතර කෝණයකට නැමී උදරයේ දැඩි පීඩනයෙන් එක් රැස්ව ඇති වාතය ඉන්දියාව දෙසට මුදාහරින්ඩ.

ඔන්න එච්චරයි.දැං ඉතිං නාගදීපේ යන කට්ටිය නාගදීපෙ යන්ඩ.ඩෙල්ෆ්ට් යන අය ඩෙල්ෆ්ට් යන්ඩ.නන්දිකඩාල් බලලා, කට්ටපරිච්චාන්, කිළිනොච්චි පැත්තෙ රස්තියාදුවක් එහෙම ගහලා තම තමුංගේ ගෙවල් බලා ගියාට කමක් නෑ.ඔබ තමුන්නාන්සේලා දේශප්‍රේමයෙන් කරන්ඩ යෙදුන ඒ මහා ශබ්ධ හා ගන්ධ පූජාව නිසා අපේ රටේ සියළු ප්‍රශ්න හිරු දුටු පිනි සේ නැතිවෙලා යන්වා නියතය.

ඒක සිද්ධ වෙන්නේ මෙහමය.එක්කෝ ඉන්දියාවේ උන්ට අධෝවාත ශබ්ධය ඇසී ලංකාව උන්ට එරෙහිව යුධ ප්‍රකාශ කළා කියලා කලබල වෙනවාය.සද්දේ ඇහුනේ නැතත් නිරිත දිග මෝසම් සුළං සමඟ ගසාගෙන යන ඔබගේ වීරෝධාර අධෝවාත ඉන්දියාවේ වෙරළබඩ ප්‍රදේශවල ජනතාව අතරේ වසංගත තත්ත්වයක් නිර්මාණය කරනු ඇති අතර විශ වාතය ඇතිවූ ආකාරය සොයා පරීක්ෂණ කරද්දී ඉන්දියාවේ රෝ ඔත්තු සේවයට වැඩේ මාට්ටු වනවා ඇත.මේ ක්‍රම දෙකටම ඉන්දියාවේ උන්ට අපි කළ වැඩේ මාට්ටු උනේ නැතත්, ඔබගේ උදරය තුල සෙල්සියස් අංශක 40ක පමණ වන උෂ්ණත්වයක සම්පීඩිතව පැවති වාතය වායු ගෝලයට මුදා හැරීමත් සමග ප්‍රසාරණය වී බෙංගාල බොක්කේ පහල වායු ස්ථරවල කැළඹීමක් හටගෙන එය සුළි සුළං තත්ත්වයක් දක්වා වර්ධනය වනවා ඇත.ඒ සුළි සුළඟට 'රාමා, හනුමා' වැනි ඉන්දීය නමක් තැබීමට අපේ කාළගුණ විද්‍යා දෙපාර්තමේන්තුව කටයුතු කරනු ඇති අතර එයින් ඉන්දීය ජනතාව අතර දරුණු කැළඹීමක් හට ගන්නවා ඇත.නම තබා ගැනීමට අපොහොසත් උවත් සුළි සුළඟෙන් දකුණු ඉන්දියාව චකබ්ලාස් වී ගිය විට ඒ ගැන සොයා බැලීමට ඉන්දියාවෙන් පත් කරන ත්‍රිපුද්ගල කමිටුවට අපේ අධෝ වාත ගැන සොයා ගැනීමට මහා කාලයක් යන්නේ නැත.ඉතින් ඔබට පෙනෙන ආකාරයට කෙසේ හෝ ඉන්දියාව අපේ රටත් එක්ක මළ පනින නිසා ඔවුන් අපත් සමඟ යුද්ධයට එනවා ඇත.

ඉන්දියාව මේ පාර පරිප්පු දාන්නේ නැති බව මට හොඳටම ශුවර් ය.පරිප්පු මේ දවස්වල ගණන් ය.අනික ඉන්දියාවේ ගංවතුරෙන් අනාථ වෙච්ච කට්ටියට දෙන්ඩ තියෙන පරිප්පු ලංකාවට ගෙනත් දාන එකක් නැත.දැම්මත් අපේ මහින්ද ලොක්කා ඒකත් පැකට් කරලා ටැන්සානියාවට හෝ ස්වාසිලන්තයට විකුණනවා ය.ඒ නිසා ඉන්දියාව අපේ රටට ගහන් එක ගහනවාය.කොච්චර පම්පෝරි ගැහුවත් අපේ දේශප්‍රේමී ඇත්තංගේ දේශප්‍රේමය ඒ වෙලාවට රෙද්ද පල්ලෙන් බේරෙන්ඩ පටං ගන්නවාය.එතකොට අපි හැමෝම එකාවගේ එකට එක්ව කොළඹ ලිප්ටන් වටරවුම අසළට එක් වී අත් උස්සා ඉන්දියාවට යටත් විය යුතුය.අපි ඉන්දියාවේ ප්‍රාන්තයක් බවට පත්විය යුතුය.ඔන්න සහෝදරවරුනි, මෙතැන් සිට අපේ ප්‍රශ්න එකින් එක විසඳෙන්ඩ ගන්නවාය.

අපි ඉන්දියාවේ ප්‍රාන්තයක් වූ සැනින් ඉන්දු ලංකා ගිවිසුම අහෝසි වන්නේය.මොකද ඉන්දියාවට ඉන්දියාව එක්කම ගිවිසුම් ගහන්ඩ බෑනේ.දහතුන ගැන කෙස් පැළෙන තර්ක ගේන්ඩ ඕනෑ නැත.ඉන්දියාවේ ප්‍රාන්තයක් හැටියට ප්‍රාන්තය ඇතුලේ බලය බෙදිල්ලක් ගැන කතා කර පලක් නැත.ඉන්දියාව ඇතුලේ වෙනම රටක් ගහන්ඩ ඉන්දීය මධ්‍යම රජය ඉඩ නොදෙන නිසා ඊළාම් කතාව හීනයක් වෙනවා ඇත.අන්වර් මනතුංග ඇතුළු මුස්ලිම් අන්තවාදීන් ටික 'මෙහෙ ඉන්ඩ බැරිනම් පලයව් පකිස්තානෙට' කියා එළවා දමනවා ඇත.

සේතු සමුද්‍රම් සම්පූර්ණයෙන්ම අමතක කර දමනවා නිසැක අතර න්‍යෂ්ඨික බලාගාරයද අපිට හානියක් නොවන දුරකින් ඉඳි කරනවා ඇතිවක් මෙන්ම අඩු මිලට ඉන් විදුලියද ලබා දෙනු ඇත.එවිට දැනට පවතින විදුලිය මාෆියාවට යන එන මං නැතිවනු ඇත.මෙතැන් පටන් මුහුදු සීමා උල්ලංගනය කළා යැයි ධීවරයින් අත් අඩංගුවට ගැනීම් නතර වනවා ඇත.ඇමරිකාව නෝර්වේ ඇතුළු බටහිර රටවල ඇඟිලි ගැසීම් නැතිවී යන අතර එවැනි දේශපාලන අත පෙවීම්වලදී කෝටි දෙසීයක් පමණවන ජනතාවක් අප සමඟ ඉන්නවා ඇත.අපේ ලොක්කා චීනයෙන් ගත් මහා ණය කන්දරාව මධ්‍යම ආණ්ඩුවෙන් ගෙවා දමනු ඇති අතර අපේ රටේ ඊළඟ ජන වර්ගය ලෙස ක්‍රමයෙන් වර්ධනය වන චීන ජනගහණය ද අඩු වී යනු ඇත.හැම දේම චීනයෙන් ගෙන්වීම නවතා දමා සියල්ල අපේ රටේම (ඉන්දියාවේ) නිපදවීමේ අභිමානය අපට ලැබෙනු ඇත.

ඉන්දියාවට බැණ බැණ හින්දි චිත්‍රපට බැලීමේ කැත පුරුද්ද නතර කොට ජාතිකාභිමානයෙන් යුතුව 'පිර්භී දිල් හේ හින්දුස්ථානී' කියමින් හින්දි චිත්‍රපට බැලීමට හැකිවනු ඇත.කඩාවැටෙන සිනමාවට හැමදාම බැණ අඬගසමින් ඉන්නවා වෙනුවට ජාත්‍යන්තරය හා කරට කර යන සිනමාවක් අපටත් ඇතැයි උදම් ඇනීමට ද හැකිවේ.අපේ කොල්ලන්ට හින්දි කෙල්ලන් හා විවාහ වීමටද අවස්ථාව ලැබෙනු ඇත.අපේ ජාතික ගීතයට දෙමළ කෑල්ලක් දානවාද නැද්ද යනුවෙන් හිත හිතා ඉන්න උවමනා වන්නේද නැත.හැමෝම බෙංගාලි බසින් 'ජන ගන මන' ගයනු ඇත.ලංකාවෙන් ඉන්දියාවට ගොස් සිටින්නන් තව දුරටත් සරණාගතයින් සේ නොසළකනු ඇත.ඔවුන් ඉන්දියාවේ පුරවැසියන් සේ සියළු අයිතිවාසිකම් සඳහා උරුමකම් කියනු ඇත.

තවත් උග්‍ර අර්බුධයක් වන ක්‍රිකට් ක්‍රීඩාවටද මෙයින් වන්නේ යහපතකි.අපේ කණ්ඩායම තව දුරටත් ඉන්දීය කණ්ඩායමට පරදින්නේ නැත.අපේ කණ්ඩායමේ දැනට ඉන්නා දක්ෂයින් ජාතික කණ්ඩායමට එක් කර ගන්නවා ඇත.පහුගියදා පැරදුනු කප් එකද නිකම්ම අපේ වනවා ඇත. අයි.පී.එල්.වලට අපේ කණ්ඩායමක් රංජන් රාමනායකගේ හෝ සංගීතා වීරරත්නගේ සංවිධානයෙන් දැමිය හැකි නිසා අපේ ක්‍රීඩකයින් රට පාවා දී අයි.පී.එල්. ගියා යැයි කියන චෝදනාවෙන්ද ගැලවෙනවා ඇත.

අපේ ප්‍රාන්තයේ මහ ඇමති ලෙස මහින්ද ලොක්කාවම පත් කර ගත යුතුය.ලොක්කාගේ තීක්ෂණ යුධෝපක්‍රම අධාරයෙන් (සරත් ෆොන්සේකා මෙව්වා දැනගෙන හිටියේ නැත ) ඉන්දියාව ද ත්‍රස්තවාදය පරාජය කරනු ඇත.ආරක්ෂක ලේඛම් ධූරයෙන් විශ්‍රාම යන ගෝඨාභය මාමාට නවදිල්ලියේත් මුම්බායේත් අනවසර ඉඳි කිරීම් ඉවත්කොට තණකොළ වවා ගල් අල්ලා අලංකාර කිරීමට බාර දෙනු ඇත.බැසිල් මාමාට ජීවිත කාලය පුරාවටම කාපට් කර කර සිටීමට තරම් පාරවල් ලැබෙනු ඇත.නාමල් සහ යෝෂිත ඉන්දියාවට රගර් ගැන කියා දෙනු ඇත.රෝහිතගේ බුද්ධි මහිමයෙන් ප්‍රභාවත් වන ඉන්දීය අභ්‍යාවකාශ ව්‍යාපෘතිය සක්වල තරණය කොට බ්‍රහස්පති මත ජනාවාස පිහිටවනු ඇත.චීනයෙන් යැවූ සහ ඉන්පසු කිසිඳු තොරතුරක් නොලද ලංකාවේ චන්ද්‍රිකාව මෙන් නොව නිසි ලෙස ක්‍රියාත්මක චන්ද්‍රිකා පද්ධතියක් අපටත් උරුම වනු ඇත.එස් බී දිසානායක මහතාගේ මනදොළ සපුරමින් පුද්ගලික විශ්ව විද්‍යාල රැසක් අපටද හිමිවන නිසා හැමටම (මුදල් ගෙවා ) අධ්‍යාපනය ලැබීමේ සම අයිතිය හිමිවනු ඇත.

මේ ආකාරයට අපේ රටේ දැවෙන අර්බුධ රැසකට සාර්ථක පිළියමක් ලෙස මම මේ යෝජනාව හෙට ජනපතිතුමන්ට පිළිගැන්වීමට සිතාගෙන සිටිමි.මෙයට ප්‍රතිගාමීන් විරුද්ධ විය හැකි උවත් ප්‍රගතිශීලී ජනතාව මාගේ මේ ව්‍යායාමය සාර්ථක කර ගැනීමට සහය දෙන බවට මට දැඩි සේ විශ්වාසය.